A Orde do 27 de febreiro de 2024 (DOG núm. 49, do 8 de marzo), modificada pola Orde do 2 de maio de 2024 (DOG núm. 88, do 6 de maio), da Consellería do Medio Rural, regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao sistema integrado de xestión e control no ano 2024.

O artigo 17 da orde dispón que os informes de control de expedientes suxeitos a control mediante monitorización notificaranse conforme o indicado no artigo 26, que indica que as resolucións poderán ser notificadas de acordo co establecido na Lei 39/2015, do 1 de outubro. O artigo 45.1 da citada lei establece que a notificación poderá realizarse mediante a publicación no Diario Oficial de Galicia cunha ligazón á páxina web do Fogga.

Conforme o anterior, esta dirección

RESOLVE:

Primeiro. Dar publicidade na web do Fogga ás listaxes dos informes de control mediante monitorización citados na Orde do 27 de febreiro de 2024. As persoas interesadas poden acceder á dita web na seguinte ligazón:

https://fogga.xunta.gal/gl/pac/monitoraxe

Segundo. Poñer á disposición das persoas interesadas os informes indicados mediante a aplicación para teléfonos móbiles Sga@pp, dispoñible en Google Play ou en App Store, e no Portal de axudas PAC, a través da seguinte ligazón:

https://sgapac.xunta.es/SgaGpi

Terceiro. As persoas interesadas disporán dun prazo de 10 días a partir do día seguinte ao desta publicación para formular as alegacións ou presentar os documentos ou xustificacións que xulguen pertinentes, consonte o que dispón o artigo 73 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 23 de decembro de 2025

Juan José Cerviño Varela
Director do Fondo Galego de Garantía Agraria