A Lei orgánica 3/2022, do 31 de marzo, de ordenación e integración da formación profesional, estableceu un novo marco normativo que ten por obxectivo a constitución e ordenación dun sistema único e integrado de formación profesional.
Coa publicación do Real decreto 659/2023, do 18 de xullo, modificado posteriormente coa entrada en vigor do Real decreto 658/2024, do 9 de xullo, desenvolveuse a ordenación do Sistema de formación profesional.
A Comunidade Autónoma de Galicia, en aplicación do Decreto 69/1993, do 10 de marzo, asume as funcións e servizos transferidos pola Administración do Estado en materia de formación profesional para o emprego.
O Decreto 147/2024, do 20 de maio, polo que se establece a estrutura orgánica da Consellería de Emprego, Comercio e Emigración atribúe á Dirección Xeral de Formación e Cualificación para o Emprego as competencias relativas á formación profesional para o emprego en toda a súa extensión, incluídos os graos A, B e C da Lei orgánica 3/2022, do 1 de marzo, sen prexuízo das competencias da Consellería de Educación, Ciencia, Universidades e Formación Profesional e en coordinación con ela.
Mediante a Orde do 8 de xullo de 2025 (DOG núm. 130, do 9 de xullo), a Consellería de Emprego, Comercio e Emigración estableceu as bases reguladoras para o período 2025-2027 para a concesión de subvencións, en réxime de concorrencia non competitiva, para o financiamento de accións formativas do Sistema de formación profesional dos graos A, B e C para persoas traballadoras desempregadas, e realizou a súa primeira convocatoria para os exercicios 2025 e 2026.
A resolución das subvencións correspondentes á primeira convocatoria do Plan formativo para o emprego (persoas traballadoras desempregadas) da Comunidade Autónoma de Galicia para o período 2025-2026, e a posterior execución das accións formativas concedidas, puxo de manifesto a mellora que para a xestión das actividades formativas suporía simplificar determinadas formalidades suxeitas a requisitos susceptibles de flexibilización.
O presente proxecto de orde ten por obxecto a segunda convocatoria de subvencións e, así mesmo, a modificación parcial da Orde do 8 de xullo de 2025 pola que se establecen as bases reguladoras para o período 2025-2027 e se procede á primeira convocatoria de subvencións, en réxime de concorrencia non competitiva, para o financiamento de accións formativas do Sistema de Formación Profesional dos graos A, B e C para persoas traballadoras desempregadas, para os anos 2025-2026, en prol dunha mellora na eficacia, transparencia e eficiencia administrativa.
Estas modificacións responden a razóns de interese público e boa administración dirixidas a asegurar o cumprimento dos principios de igualdade, obxectividade e transparencia.
A Orde do 8 de xullo de 2025 pola que se establecen as bases reguladoras e se procede á primeira convocatoria para a concesión de subvencións para o financiamento de accións formativas do Sistema de formación profesional dos graos A, B e C para persoas traballadoras desempregadas, para os anos 2025-2026, foi aprobada co obxecto de fomentar a mellora da empregabilidade coa adquisición e aumento de competencias profesionais e o impulso da actividade empresarial en Galicia.
As modificacións incorporadas teñen carácter estritamente técnico ou aclaratorio e non alteran o sentido nin o contido esencial das bases reguladoras nin supoñen a alteración substancial das condicións establecidas nestas e están orientadas unicamente a mellorar a claridade e eficacia na xestión das subvencións. A continuación recóllense algunhas das máis salientables.
Durante o proceso de xestión e control das subvencións correspondentes á primeira convocatoria comprobouse que determinadas entidades beneficiarias non cumpriron coas obrigas establecidas nas devanditas bases, o que motiva a incoación de procedementos de reintegro. O redactado do artigo 5.7 establece que para ser beneficiaria se poderá exixir da subvención unha serie de requisitos de boa execución «con relación á última convocatoria regulada por estas bases para a que rematou o prazo e execución». Ao implementar este requisito analizouse que, tendo en conta o carácter plurianual das convocatorias, nunca se poderían aplicar estes requisitos, xa que as convocatorias abranguen un período superior ao ano natural. Esta circunstancia puxo de manifesto a conveniencia de modificar o período temporal de aplicación dos requisitos de acceso, co fin de reforzar o cumprimento das obrigas establecidas e garantir un uso eficaz e responsable dos recursos públicos. Estes incumprimentos teñen consecuencias negativas tanto na execución dos fondos públicos como na consecución dos obxectivos perseguidos pola subvención e xeran distorsións e desigualdades respecto daquelas entidades que si cumpren correctamente as súas obrigas.
No relativo ás accións formativas impartidas mediante modalidade virtual, establécese unha asistencia do 75 % das horas de duración das titorías presenciais no lugar do 100 % que recollían as bases reguladoras, co obxectivo de flexibilizar as condicións para ter a consideración de alumnado formado e, así mesmo, darlle a mesma equiparación que na modalidade presencial, onde tamén se exixe o 75 % de asistencia obrigatoria.
A presente orde divídese en dous capítulos. No primeiro capítulo, que consta dun único artigo, modifícase parcialmente a Orde do 8 de xullo de 2025, na cal se establecen as bases reguladoras. No capítulo II procédese á segunda convocatoria de accións formativas do Plan formativo para o emprego (persoas traballadoras desempregadas) para as anualidades 2026e 2027.
O orzamento desta convocatoria está financiado por fondos finalistas transferidos polo Ministerio de Educación, Formación Profesional e Deportes.
Esta disposición axústase ao disposto na Lei 9/2007, do 13 de xuño, de subvencións de Galicia, que no seu artigo 5.2, relativo aos seus principios xerais, establece que a concesión de axudas e subvencións se axustará aos principios de publicidade, transparencia, concorrencia, obxectividade, igualdade e non discriminación, aos cales se adecúa esta norma. Tamén será de aplicación o Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.
Esta segunda convocatoria tramítase ao abeiro do disposto no artigo 25 do Regulamento da Lei de Subvencións de Galicia, e no artigo 1.1 da Orde da Consellería de Economía e Facenda, do 11 de febreiro de 1998, pola que se regula a tramitación anticipada de expediente de gasto, na redacción dada pola Orde de 27 de novembro de 2000, modificada pola Orde do 25 de outubro de 2001, polo que a concesión das subvencións queda sometida á condición suspensiva de existencia de crédito adecuado e suficiente no momento da resolución.
Consecuentemente con todo o anteriormente exposto, logo de consultar o Consello Galego de Formación Profesional e o Consello Galego de Relacións Laborais, no exercicio das facultades que me confire o artigo 34 da Lei 1/1983, do 22 de febreiro (DOG núm. 23, do 21 de marzo), reguladora da Xunta e da súa Presidencia,
DISPOÑO:
Capítulo I
Modificación da Orde do 8 de xullo de 2025 pola que se establecen as bases reguladoras para o período 2025-2027 e se procede á primeira convocatoria de subvencións, en réxime de concorrencia non competitiva, para o financiamento de accións formativas do Sistema de formación profesional dos graos A, B e C para persoas traballadoras desempregadas, para os anos 2025 e 2026 (código de procedemento TR301K) (en diante, Orde do 8 de xullo de 2025)
Artigo 1. Modificación da Orde do 8 de xullo de 2025
Un. Modificación do artigo 5.7 da Orde do 8 de xullo de 2025, relativo aos requisitos das entidades beneficiarias.
O artigo 5.7 queda redactado do seguinte xeito:
«Se así o determina a correspondente convocatoria, será requisito para ser beneficiaria da subvención que, para o censo concreto e con relación á última convocatoria regulada por estas bases, sempre que transcorrese un mínimo de tres meses desde a data de resolución da concesión da subvención,
• Non se incorrese nun incumprimento total do expediente.
• A entidade comunicase e iniciase máis do 60 % das prazas financiadas con respecto ao total das accións formativas financiadas e sempre que o número de accións formativas concedidas fose superior a tres. Para os efectos do cálculo do tanto por cento, non serán computables as renuncias xustificadas as que se refire o artigo 16 desta orde».
Dous. Modificación do artigo 19.5 da Orde do 8 de xullo de 2025, relativo á ficha do alumnado.
O artigo 19.5 queda redactado do seguinte xeito:
«5. No momento da incorporación do alumnado á acción formativa, requiriráselle a este a seguinte información, que se incorporará ao expediente electrónico localizado na aplicación informática SIFO.
a) Ficha electrónica individual que, para os efectos de posibles notificacións, envío de diplomas ou remisión de certificados emitidos por solicitude da persoa interesada, deberá incluír o enderezo de correo electrónico.
Unha vez xestionada a documentación necesaria para a cobertura da ficha a través da aplicación SIFO, deberán eliminarse as copias da documentación proporcionada polas persoas seleccionadas e polas persoas candidatas non seleccionadas, en particular, as copias dos seus documentos identificativos e calquera outra que conteña datos de carácter persoal.
Para aquelas accións formativas que impartan parte dos seus contidos mediante aula virtual, o usuario de acceso do alumnado ao campus realizarase utilizando a conta de correo electrónico que se deu de alta no sistema informático SIFO.
Se, posteriormente, a persoa alumna modifica a dita conta de correo, a entidade deberá comunicar o dito cambio, no prazo de 3 días desde que este teña lugar, ao equipo de soporte do campus virtual (soporte-campusvirtual.emprego@xunta.gal), para facilitarlle os datos de conexión. Se a conta de correo que emprega a persoa alumna non estivese actualizada, será preciso que a entidade faga o cambio correspondente no sistema informático SIFO e, ademais, verifique que o dito cambio conste na matriculación de campus virtual.
b) Asociada a cada participante, deberá incorporarse ao expediente electrónico de SIFO a seguinte documentación:
• No marco da normativa vixente en materia de protección de datos persoais, un documento asinado polo alumnado participante de que foi informado, conforme o exixido nos artigos 13 e 14 do Regulamento (UE) 2016/679, xeral de protección de datos, do tratamento dos seus datos persoais para a xestión, control e seguimento das accións formativas.
Na aplicación informática SIFO estará dispoñible para a súa descarga o modelo normalizado que deberán facilitar as entidades ao alumnado.
• Para o seguimento da acción formativa, a Consellería de Emprego, Comercio e Emigración consultará automaticamente os datos do DNI/NIE do alumnado en poder da Administración actuante ou elaborados polas administracións públicas, agás que a persoa interesada se opoña á súa consulta. No caso de opoñerse á consulta, que deberá manifestarse por escrito, as persoas alumnas deberán facilitar unha copia do seu DNI/NIE á entidade de formación para a súa incorporación ao expediente.
• Documentación acreditativa do cumprimento dos requisitos de acceso para realizar a formación ou, de ser o caso, de ter iniciado e pendente de resolución un proceso de homologación de títulos estranxeiros ou de expedición dun certificado profesional que se corresponda cos requisitos exixidos para poder asistir á actividade de formación.
• Documentación acreditativa necesaria para a exención dun módulo profesional incluído nunha oferta formativa do grao C ou dun módulo transversal incluído na acción formativa, de ser o caso.
• Documentación acreditativa requirida para a exención da formación en empresa, de ser o caso.
• Documento informativo sobre dereitos e obrigas que entregará a entidade ao alumnado, debidamente asinado polas persoas participantes.
Na aplicación informática SIFO estará dispoñible para a súa descarga o modelo normalizado que deberán facilitar os centros de formación ao alumnado».
Tres. Modificación do artigo 19.6 da Orde do 8 de xullo de 2025, relativo á sinatura dos partes manuais unicamente en caso de incidencia do sistema de fichaxe.
O artigo 19.6 queda redactado do seguinte xeito:
«6. Mensualmente achegarase a seguinte información:
Nas actividades de carácter presencial, e de se teren producido incidencias no sistema de control de asistencia debidamente acreditadas perante o equipo de soporte informático, partes diarios individualizados de asistencia no modelo xerado pola aplicación informática SIFO asinados, ao inicio e ao final de cada sesión, polo alumnado participante e polo persoal formador afectado pola incidencia, así como da persoa responsable da beneficiaria.
Os ditos partes deberán identificar as persoas participantes e expresar as horas realizadas en cada sesión por cada unha delas, reflectindo expresamente o número de horas de ausencia.
Comunicación das incidencias producidas, de ser o caso».
Catro. Modificación do punto 4 do artigo 20 da Orde do 8 de xullo de 2025, relativo aos requisitos do persoal formador en modalidade virtual.
O punto 4 do artigo 20 queda redactado do seguinte xeito:
«As persoas responsables da titorización-formación que impartan formación na modalidade virtual deberán acreditar o cumprimento dos requisitos específicos requiridos para cada especialidade e contar con formación ou experiencia verificable nesta modalidade.
Para acreditar a formación e/ou a experiencia requirida na modalidade virtual e na utilización das tecnoloxías da información e comunicación exixirase, cando menos, unha formación de 30 horas ou unha experiencia de 60 horas na impartición de accións formativas nesta modalidade, sen prexuízo do establecido na disposición adicional 5ª da Orde TMS/369/2019».
Cinco. Modificación do punto 2 do artigo 21 da Orde do 8 de xullo de 2025, relativo á obrigatoriedade da comunicación da solicitude de subvencións para a mesma finalidade.
O punto 2 do artigo 21 queda redactado do seguinte xeito:
«2. De ser o caso, comunicar ao departamento territorial correspondente a solicitude e/ou obtención de subvencións ou axudas para esta mesma finalidade procedentes de calquera outra Administración ou ente público».
Seis. Modificación do punto 10.a) do artigo 21 da Orde do 8 de xullo de 2025, relativo á obrigatoriedade do uso do sistema de fichaxe mediante QR ou DNI-e en modalidade presencial.
O punto 10.a) do artigo 21 queda redactado do seguinte xeito:
«Na modalidade presencial e na parte presencial da modalidade virtual, o control de asistencia realizarase mediante o uso dun sistema de identificación seguro e unívoco baseado nun código QR e/ou DNI-e, que identifique as persoas participantes e, subsidiariamente, por fallo do sistema ou imposibilidade acreditada de utilizar os medios de control citados reportada ao equipo de soporte de COBIPE no momento en que esta se produza, mediante o uso de partes de asistencia asinados. Estes partes deberán ser mecanizados pola entidade beneficiaria en COBIPE no mesmo día en que aconteza a incidencia.
O control deberá realizarse diariamente ao inicio e ao remate de cada sesión, de ser a acción formativa en horario de mañá ou de tarde, e 4 veces ao día, de impartirse a acción formativa en xornada partida, ao inicio e ao fin da sesión de mañá e ao inicio e ao remate da sesión de tarde.
Tanto o conxunto do alumnado como o persoal docente estarán obrigados a efectuar o referido control de presenza.
A utilización dun código QR ou dun DNI-e por unha persoa distinta á titular do código ou do documento identificativo, ou a existencia de irregularidades na sinatura dos partes de sinatura, dará lugar, de acordo co procedemento establecido no artigo 22.7 desta orde, á expulsión da acción formativa da persoa infractora. Sen prexuízo de que as citadas incidencias poidan ser detectadas a través das actuacións de seguimento e control que realice a Administración, estas anomalías deberán ser comunicadas pola entidade ao órgano administrativo competente no momento da súa detección.
De ser o caso, a participación da beneficiaria nalgún tipo de fraude no rexistro do control de presenza poderá dar lugar, logo de resolución do órgano competente, á suspensión da acción formativa e a perda do dereito a percibir a subvención concedida, sen prexuízo das actuacións sancionadoras que procedan».
Sete. Modificación do artigo 21.10.d) da Orde do 8 de xullo de 2025, relativo ao prazo de presentación da documentación.
O artigo 21.10.d) queda redactado do seguinte xeito:
d) No relativo á realización da formación en empresa, o control de presenza efectuarase mediante partes de asistencia que deberán asinarse diariamente ao inicio e ao remate de cada sesión, de ser a acción formativa en horario de mañá ou de tarde, e 4 veces ao día, de impartirse a acción formativa en xornada partida, ao inicio e ao fin da sesión de mañá e ao inicio e ao remate da sesión de tarde.
Os datos de asistencia do alumnado deberán ser mecanizados pola entidade beneficiaria na aplicación informática COBIPE, no prazo de 5 días hábiles desde a impartición da sesión a que se refiran. O incumprimento da obriga de mecanización en prazo suporá a perda do dereito a percibir a liquidación correspondente á sesión non mecanizada das persoas participantes das cales non se rexistrasen os datos».
Oito. Modificación do punto 21 do artigo 21 da Orde do 8 de xullo de 2025, relativo aos cuestionarios que debe realizar o alumnado.
O artigo 21.21 queda redactado do seguinte xeito:
«21. Realizar dous cuestionarios de valoración do curso para que cubra o alumnado. O primeiro deles durante o primeiro cuarto da acción formativa, para a detección de posibles desviacións ou incidencias no desenvolvemento do curso, e o segundo ao remate da acción formativa.
Para os efectos da realización do segundo cuestionario, a Consellería de Emprego, Comercio e Emigración remitirá unha enquisa electrónica de avaliación de calidade para cubrir as alumnas e alumnos participantes.
A Administración poderá facilitar ao alumnado no momento que considere oportuno, e especialmente se se detectasen incidencias na impartición da formación, formularios dirixidos a coñecer a súa opinión en relación co desenvolvemento da acción formativa».
Nove. Modificación do punto 24 do artigo 21 da Orde do 8 de xullo de 2025, relativo aos requisitos das persoas alumnas.
O artigo 21.24 queda redactado do seguinte xeito:
«24. Verificar o cumprimento dos requisitos de acceso que debe cumprir o alumnado.
No proceso de liquidación da subvención, non serán computables para a determinación do importe liquidable aqueles alumnos ou alumnas que non cumpran os requisitos exixidos para o acceso á acción formativa.
Tampouco se expedirán diplomas nin certificados de ningún tipo ás persoas alumnas que accedan á formación sen reunir os requisitos exixidos, nin asumirá ningún tipo de responsabilidade económica a Administración derivada da súa participación, o que inclúe que non terán dereito a percibir ningún tipo de bolsas e axudas.
Como excepción ao disposto nos anteriores parágrafos, poderán participar nunha acción formativa os seguintes colectivos:
a) As persoas candidatas que iniciasen e teñan pendente de resolución un proceso de homologación de títulos e estudos estranxeiros ou de expedición dun certificado profesional e sempre e cando estes se correspondan cos requisitos exixidos para poder asistir á actividade de formación.
O recoñecemento oficial da formación estará condicionado a que se produza a validación ou homologación dos ditos estudos ou á obtención do certificado profesional. No caso de que finalmente esta non teña lugar, a acción formativa considerarase como non efectuada , para os efectos da expedición do diploma ou certificado oficial. Non obstante, xerará para a entidade dereitos liquidatorios, de acordo cos criterios establecidos para estes efectos nesta orde.
b) As persoas titulares de autorización de arraigo socioformativo, de acordo co disposto no artigo 39 do Real decreto 659/2023, do 18 de xullo».
Dez. Modificación do punto 3 do artigo 22 da Orde do 8 de xullo de 2025, en relación co dereito a percibir bolsas e axudas.
O artigo 22.3 queda redactado do seguinte xeito:
«3. O alumnado desempregado que cumpra os requisitos establecidos na correspondente normativa reguladora terá dereito a percibir as axudas ou bolsas que estableza a Consellería de Emprego, Comercio e Emigración para as persoas traballadoras desempregadas que participen en accións formativas de formación profesional para o emprego (procedemento TR301V).
Para estes efectos, no suposto de seren persoas desempregadas, terá dereito á percepción de bolsas e axudas o alumnado que iniciase e teña pendente de resolución un proceso de homologación de títulos e estudos estranxeiros ou de expedición dun certificado profesional que se corresponda cos requisitos exixidos para poder asistir á actividade de formación e, así mesmo, as persoas titulares da autorización de arraigo socioformativo, de acordo co disposto no artigo 39 do Real decreto 659/2023, do 18 de xullo».
Once. Modificación do punto 6 do artigo 22 da Orde do 8 de xullo de 2025, relativo á reincorporación de alumnado no mesmo curso en que causase baixa.
O punto 6 do artigo 22 queda redactado do seguinte xeito:
«6. As alumnas e alumnos deberán ser dados de baixa nunha acción formativa cando se dea algunha das causas de exclusión que se relacionan nas seguintes epígrafes. Agás no suposto de baixa por colocación, por enfermidade ou accidente acreditado, o alumnado que causou baixa non poderá reincorporarse posteriormente ao mesmo curso en que fose dado de baixa».
Doce. Modificación do punto 8 do artigo 22 da Orde do 8 de xullo de 2025, relativo ao procedemento de expulsión dunha persoa alumna.
O punto 8 do artigo 22 queda redactado do seguinte xeito:
«8. O procedemento que se seguirá para resolver se procede a expulsión por causas disciplinarias será o seguinte:
• O proceso iniciarase mediante unha solicitude debidamente motivada presentada pola entidade formadora.
• No prazo de 5 días hábiles dende a presentación da solicitude, a persoa proposta para a exclusión será obxecto de audiencia polo órgano instrutor, o Servizo de Formación e Cualificación para o Emprego do departamento territorial da provincia en que teña lugar a acción formativa en cuestión, logo da cal esta unidade formulará a súa proposta de resolución.
• A resolución corresponderá á persoa titular do departamento territorial competente.
• Durante a tramitación do procedemento a persoa alumna que o motiva poderá, mediante resolución motivada emitida polo órgano competente, ser suspendida de asistencia á acción formativa até a notificación da resolución definitiva. Esta resolución non pon fin á vía administrativa e contra ela poderán interpoñer recurso de alzada as persoas interesadas.
As persoas alumnas que resulten expulsadas por causas disciplinarias dunha acción formativa non poderán ser seleccionadas para ningunha outra acción formativa que se imparta ao abeiro da convocatoria do procedemento TR301K en que resultaron excluídas».
Trece. Modificación do punto 7 do artigo 30 da Orde do 8 de xullo de 2025, relativo á impartición dos módulos transversais.
«7. A impartición dos módulos formativos transversais en materia de igualdade recollidos no artigo 30.1 poderá realizarse en calquera momento dentro do intervalo de datas da acción formativa, agás ao inicio dela. A formación en materia de prevención de riscos laborais deberá impartirse con carácter previo á formación en empresa.
Non poderá simultanearse a impartición dos contidos específicos dos módulos transversais cos contidos propios do programa formativo da especialidade. Neste senso, os módulos transversais poderán desenvolverse tanto ao remate da acción formativa como no período que vai desde o remate dun módulo profesional ata o comezo do seguinte».
Catorce. Modificación do punto 3 do artigo 33 da Orde do 8 de xullo de 2025, relativo ao requisito de asistencia ás titorías presenciais na modalidade virtual.
O punto 3 do artigo 33 queda redactado do seguinte xeito:
«3. Nas formacións correspondentes a ofertas dos graos B e C impartidas na modalidade virtual, a presentación á proba de avaliación final de cada módulo profesional exixirá unha asistencia ás actividades presenciais (titorías) do 75 % e a superación dunha proba de avaliación final de carácter presencial.
No caso de que unha persoa alumna non cumpra a porcentaxe do 75 % de asistencia obrigatoria ás titorías, poderá, con anterioridade ao remate da acción formativa, recuperar aquelas ás que non asistise».
Quince. Modificación do artigo 36.1 da Orde do 8 de xullo de 2025, relativo á solicitude de anticipos.
«1. Ditada e notificada a resolución de concesión, as entidades, unha vez que conste a aceptación tácita ou expresa da subvención e resulte acreditado o inicio da acción formativa, poderán solicitar o pagamento dun anticipo de ata o 60 %, calculado sobre o importe global concedido para a acción formativa a que se refira.
Nos termos do artigo 63 do Decreto 11/2009, do 8 de xaneiro, polo que se aproba o Regulamento da Lei 9/2007, de subvencións de Galicia, e no artigo 13.2 da Orde EFP/942/2022, do 23 de setembro, pola que se regula a oferta formativa do Sistema de formación profesional no ámbito laboral asociada ao Catálogo nacional de cualificacións profesionais efectuada polas administracións competentes, e se establecen as súas bases reguladoras, así como as condicións para o seu financiamento, poderán realizarse pagamentos anticipados que suporán entregas de fondos con carácter previo á xustificación como financiamento necesario para poder levar a cabo as actuacións inherentes ás subvencións. Os anticipos non poderán superar a anualidade prevista en cada exercicio orzamentario e, polo tanto, no caso de tratarse dunha convocatoria plurianual, o pagamento poderá ser dividido en dúas anualidades para respectar este límite, para o cal se adoptarán as correspondentes medidas de xestión orzamentaria que permitan a percepción do importe total do anticipo ou suma de anticipos a que se teña dereito».
Dezaseis. Modificación do artigo 39.2 II da Orde do 8 de xullo de 2025, relativo aos supostos de incumprimento parcial.
Suprímese a letra d) do artigo 39.2 II.
Capítulo II
Segunda convocatoria de subvencións, en réxime de concorrencia non competitiva, para o financiamento de accións formativas do Sistema de formación profesional dos graos A, B e C para persoas traballadoras desempregadas, para
os anos 2026 e 2027
Artigo 2. Obxecto e ámbito de aplicación
1. Esta orde ten por obxecto realizar, no ámbito da Comunidade Autónoma de Galicia, a segunda convocatoria de subvencións, en réxime de concorrencia non competitiva, para o financiamento de accións formativas do Sistema de formación profesional dos graos A, B e C para persoas traballadoras desempregadas, para os anos 2026 e 2027 (código de procedemento TR301K).
2. As bases reguladoras desta convocatoria están recollidas na Orde do 8 de xullo de 2025 pola que se establecen as bases reguladoras para o período 2025-2027 e se procede á primeira convocatoria de subvencións, en réxime de concorrencia non competitiva, para o financiamento de accións formativas do Sistema de formación profesional dos graos A, B e C para persoas traballadoras desempregadas, para os anos 2025 e 2026, modificada polo artigo 1 desta orde.
Artigo 3. Procedemento de concesión das subvencións
A concesión das axudas realizarase polo procedemento de concesión directa, en réxime de concorrencia non competitiva.
Artigo 4. Financiamento
1. Destínase a esta segunda convocatoria un crédito por importe total de 40.000.000,00 €, distribuído en dúas anualidades, que se imputará con cargo ás aplicacións orzamentarias que a seguir se relacionan, ou aquelas que as substitúan de conformidade coa normativa orzamentaria aplicable, con código de proxecto 2021 00149. Esta aplicación está financiada con fondos finalistas transferidos polo Ministerio de Educación, Formación Profesional e Deportes.
|
Aplicación orzamentaria |
Entidades que financia |
Anualidade 2026 |
Anualidade 2027 |
Importe total |
|
14.03.323A.460.1 |
Entidades locais |
1.564.514,00 € |
567.000,00 € |
2.131.514,00 € |
|
14.03.323A.471.0 |
Empresas |
21.088.868,00 € |
7.363.000,00 € |
28.451.868,00 € |
|
14.03.323A.481.0 |
Entidades sen ánimo de lucro |
7.346.618,00 € |
2.070.000,00 € |
9.416.618,00 € |
|
Total |
30.000.000,00 € |
10.000.000,00 € |
40.000.000,00 € |
|
Este crédito orzamentario está recollido no proxecto de Lei de orzamentos xerais da Comunidade Autónoma de Galicia para o ano 2026, aprobado polo Consello da Xunta de Galicia na súa reunión do día 17 de outubro de 2025.
2. Esta orde tramítase de conformidade co artigo 25 do Regulamento da Lei 9/2007, do 13 de xuño, de subvencións de Galicia, aprobado polo Decreto 11/2009, do 8 de xaneiro, e coa Orde da Consellería de Economía e Facenda do 11 de febreiro de 1998, pola que se regula a tramitación anticipada de expedientes de gasto, modificada polas ordes da Consellería de Economía e Facenda do 27 de novembro de 2000 e do 25 de outubro de 2001, polo que a concesión das subvencións queda condicionada á existencia de crédito adecuado e suficiente no momento da resolución de concesión.
3. Os créditos orzamentarios a que se refire este artigo poderán ser modificados como consecuencia da asignación ou da redistribución de fondos para o financiamento dos programas de formación.
Poderá ampliarse a contía máxima dos créditos dispoñibles para esta convocatoria. O incremento de crédito estará condicionado á declaración de dispoñibilidade do crédito como consecuencia dunha xeración, ampliación, incorporación de crédito ou da existencia de remanentes doutras convocatorias financiadas con cargo ao mesmo crédito ou créditos incluídos no mesmo programa ou en programas do mesmo servizo.
Calquera modificación ou ampliación dos créditos dispoñibles estará condicionada ao cumprimento dos supostos e as condicións previstas no artigo 31 da Lei 9/2007, do 13 de xuño, de subvencións de Galicia, e nos artigos 30 e 31 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.
4. A concesión das solicitudes de subvención presentadas estará condicionada á existencia de crédito suficiente na anualidade que corresponda.
5. Poderán ser obxecto de financiamento aquelas especialidades formativas que se determinen no anexo III desta convocatoria, así como os módulos formativos transversais que se impartan asociados a estas.
Na modalidade presencial, o módulo económico €/hora por persoa alumna aplicable a esta convocatoria de subvencións será o establecido, para cada especialidade formativa, no anexo III. Nas especialidades formativas impartidas na modalidade virtual será de aplicación o 70 % do importe do módulo económico presencial €/hora por persoa alumna, cunha contía máxima de 6 €.
Para os custos adicionais derivados da contratación de persoas especializadas na atención do alumnado con discapacidade establécese unha contía unitaria de 16 € por hora lectiva.
Para os gastos destinados a promover a adecuación das condicións físicas e/ou tecnolóxicas, e a dotación de recursos materiais e medios didácticos apropiados ás persoas con discapacidade, establécese unha contía máxima por persoa alumna de 500 €.
6. A formación en empresa financiarase con 3 € por alumna ou alumno e hora de prácticas efectivamente titorizadas, que se destinarán ao financiamento dos custos da actividade da titorización e ao relativo á subscrición dunha póliza colectiva de accidentes de traballo e de responsabilidade civil.
Excluiranse deste cómputo as horas correspondentes á formación en empresa non realizada polas persoas participantes exentas.
Artigo 5. Solicitudes e prazo de presentación da segunda convocatoria
1. As solicitudes presentaranse obrigatoriamente por medios electrónicos a través do formulario electrónico normalizado dispoñible na aplicación SIFO, anexo I, accesible a través da sede electrónica da Xunta de Galicia no enderezo https://sede.xunta.gal ou no enderezo directo https://emprego.xunta.es/sifo-solicitudes
De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude ou a documentación presencialmente, será requirida para que a emende mediante a súa presentación electrónica. Para estes efectos, considerarase como data de presentación da solicitude aquela en que fose realizada a emenda.
2. No suposto de que a solicitude non cumpra os requisitos sinalados nas bases reguladoras e/ou nesta convocatoria, ou a documentación presentada conteña erros ou sexa insuficiente, requirirase a persoa solicitante para que, nun prazo de 10 días hábiles, emende a falta ou achegue os documentos preceptivos, con indicación de que, se así non o fixer, considerarase desistida da súa solicitude, logo da resolución que así o declare.
Caso de que o requirimento afecte só algunha das accións formativas da solicitude, entenderanse como desistidas unicamente tales accións, e continuará a tramitación do resto do expediente.
Non se admitirán a trámite e, por conseguinte, non existirá a posibilidade de emenda, as solicitudes presentadas fora de prazo.
3. As solicitudes dirixiranse ao departamento territorial en cuxa provincia se imparta a correspondente acción formativa.
No suposto de que a formación se imparta na modalidade virtual, a solicitude deberá dirixirse ao departamento territorial da provincia en que estea localizado o centro de formación en que se impartirá a parte presencial da acción formativa.
4. A solicitude, que incluirá a ficha das accións formativas que se van impartir (anexo II), deberá presentarse acompañada da documentación complementaria relacionada no artigo 7 desta orde.
5. O prazo de presentación de solicitudes estará aberto desde o día da entrada en vigor da orde ás 9.00 horas, de conformidade co establecido na disposición derradeira segunda, ata o día 30 de novembro de 2026 ás 20.00 horas ou, de ser o caso, ata que se esgote o crédito orzamentario dispoñible.
No caso de que o día de inicio do prazo sexa inhábil, o prazo comezará o día hábil seguinte.
Artigo 6. Declaración responsable que forma parte da solicitude
1. Forma parte da solicitude a declaración responsable que se contén nela e na cal se farán constar os aspectos seguintes:
a) Que, en relación con outras axudas concedidas ou solicitadas:
• Non se solicitou nin se concedeu ningunha outra axuda para este mesmo proxecto e conceptos para os que se solicita esta subvención.
• De se solicitar e/ou conceder outras axudas para este mesmo proxecto e conceptos para os que se solicita esta subvención, deberán relacionarse estas.
b) Que todos os datos contidos na solicitude e nos documentos que se achegan son certos.
c) Que coñece as estipulacións da presente orde, que cumpre cos requisitos establecidos nela e que se compromete a destinar o importe da axuda ao obxecto da subvención indicada.
d) Que cumpre os requisitos para obter a condición de persoa beneficiaria, que está ao día no pagamento de obrigas por reintegro de subvencións e que non está incursa en ningunha das circunstancias previstas nos números 2 e 3 do artigo 10 da Lei 9/2007, do 13 de xuño, de subvencións de Galicia, no artigo 9 do Regulamento de subvencións de Galicia, aprobado polo Decreto 11/2009, do 8 de xaneiro, e no artigo 7 da Orde EFP/942/2022, do 23 de setembro.
e) Que as dotacións, equipamentos, medios materiais, instalacións, lugares e modalidades de impartición das accións formativas serán aquelas para as que están acreditadas e inscritas para tal fin, e que son aptas e que cumpren e manterán durante todo o período de impartición das accións formativas as condicións e requisitos que exixe a normativa aplicable.
f) Que conta con capacidade suficiente, en termos económicos, técnicos, de recursos humanos, materiais e organizativos, así como, de ser o caso, de aulas, talleres e instalacións en xeral, para asumir na súa totalidade a execución completa das accións formativas que solicita.
g) Que para cada acción formativa que solicita conta co compromiso de participación do número mínimo de persoas traballadoras que nesta convocatoria se determina, así como do persoal docente encargado de impartir a acción formativa.
h) Que dispón da documentación que acredita o cumprimento dos anteriores puntos e que a porá á disposición da Administración cando lle sexa requirida.
2. A presentación dunha declaración responsable que falsee ou oculte circunstancias que impidan ou limiten a concesión da subvención ou o seu pagamento terá a consideración dunha infracción moi grave nos termos do artigo 56 da Lei 9/2007, do 13 de xuño, de subvencións de Galicia, coas posibles consecuencias sancionadoras que se recollen na dita norma e no texto refundido da Lei sobre infraccións e sancións na orde social, aprobado polo Real decreto lexislativo 5/2000, do 4 de agosto.
Coa finalidade de garantir a veracidade das declaracións responsables contidas neste artigo, poderá realizar comprobacións durante calquera das fases do procedemento o persoal técnico dos departamentos territoriais, das cales poderán derivar, de ser o caso, as consecuencias sinaladas neste punto para os supostos de falseamento do contido das declaracións responsables.
Artigo 7. Documentación complementaria
1. As persoas interesadas deberán achegar coa solicitude, anexo I, a seguinte documentación:
a) Ficha das accións formativas que se solicitan, anexo II.
b) Acreditación da capacidade legal suficiente para asinar a solicitude (escritura notarial de poder ou calquera outro medio válido en dereito).
c) De ser o caso, cando as accións formativas que se solicitan se correspondan con ofertas formativas do grao C, compromiso de subscrición dun convenio ou acordo coa empresa ou empresas en que terá lugar a formación en empresa incluída no certificado profesional.
d) De ser o caso, naquelas accións formativas en que estea previsto o uso de aula virtual como medio complementario e adicional para desenvolver o proceso formativo, memoria explicativa detallada que acredite a viabilidade de impartir mediante aula virtual aqueles contidos formativos que estea previsto realizar utilizando este medio.
A memoria deberá indicar expresamente que contidos se impartirán mediante aula virtual, a súa duración e datas de realización, así como o calendario de sesións presenciais e de exames a realizar.
e) De tratarse de entidades locais, xustificación documental de ter remitido ao Consello de Contas as contas xerais do último exercicio a que estean obrigadas, segundo o establecido no artigo 223 do Real decreto lexislativo 2/2004, do 5 de marzo, polo que se aproba o texto refundido da Lei reguladora das facendas locais.
f) De ser o caso, as entidades de formación que soliciten impartir ofertas formativas na modalidade virtual deberán acreditar que contan coa autorización previa para impartilas na modalidade presencial. Esta acreditación non será necesaria no caso de estaren dadas de alta no Rexistro de Centros e Entidades de Formación da Comunidade Autónoma de Galicia para impartir as ofertas solicitadas na modalidade presencial.
De conformidade co artigo 28.3 da Lei 39/2015, do 1 de outubro, do procedemento administrativo común, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán obtidos electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.
De forma excepcional, se non se puidesen obter os citados documentos, poderáselle solicitar novamente á persoa interesada a súa achega.
2. A documentación complementaria deberá presentarse electronicamente.
Se algunha das persoas interesadas presenta a documentación complementaria presencialmente, será requirida para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o que poderá requirir a exhibición do documento ou da información orixinal.
3. Sempre que se realice a presentación de documentos separadamente da solicitude, deberanse indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.
4. No caso de que algún dos documentos que se vaia presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a súa presentación de forma presencial dentro dos prazos previstos e na forma indicada no punto anterior.
A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
5. De existir discrepancia entre a información contida na solicitude (anexo I) e/ou na ficha da acción formativa (anexo II), en relación coa información achegada no resto de documentación que se vaia presentar, será considerada como correcta, para os efectos de tramitar e revisar a solicitude, a alegada nos citados anexos I e II, con independencia de que para ter validez esta deba acreditarse documentalmente.
Artigo 8. Trámites posteriores á presentación de solicitudes
Todos os trámites administrativos que as persoas interesadas deban efectuar tras a presentación da solicitude deberán ser realizados electronicamente a través da aplicación informática SIFO. A presentación da documentación derivada das notificacións practicadas pola Administración deberase adecuar ao disposto no artigo 10.6 desta orde.
Artigo 9. Instrución e resolución
1. Os órganos instrutores do procedemento serán os servizos de Formación e Cualificación para o Emprego de cada un dos departamentos territoriais da Consellería de Emprego, Comercio e Emigración, correspondentes á provincia do enderezo do centro de formación onde se vai impartir a formación presencial.
Para o exercicio das funcións que lles corresponden en aplicación destas bases reguladoras, os departamentos territoriais poderán actuar a través das unidades administrativas competentes en materia de formación profesional competencia desta consellería, das oficinas de emprego e dos centros de formación profesional adscritos a elas.
O procedemento que se seguirá na tramitación e instrución dos expedientes será o establecido no artigo 22 da Lei 9/2007, do 13 de xuño, de subvencións de Galicia, coas concrecións que se establecen na presente orde.
Á vista das propostas emitidas polos respectivos servizos de Formación e Cualificación para o Emprego, a resolución dos expedientes de axudas corresponderalles, unha vez fiscalizada a proposta pola Intervención competente, ás persoas titulares dos departamentos territoriais, por delegación da persoa titular da consellería.
2. O prazo para resolver e notificar será dun mes contado desde a data de presentación da solicitude de subvención.
O dito prazo suspenderase cando deba requirirse á entidade interesada a emenda de deficiencias ou a achega de documentos e elementos de xuízo necesarios, polo tempo que medie entre a notificación do requirimento e o seu efectivo cumprimento pola entidade interesada.
3. Transcorrido o prazo dun mes para resolver sen que se notifique resolución expresa, entenderase desestimada a solicitude, de acordo co establecido no artigo 23.5 da Lei 9/2007, do 13 de xuño, de subvencións de Galicia, e co disposto no artigo 25 da Lei 39/2015, do 1 de outubro, do procedemento administrativo común das administracións públicas.
Artigo 10. Réxime das notificacións
1. As notificacións de resolucións e actos administrativos practicaranse só por medios electrónicos, nos termos previstos na normativa reguladora do procedemento administrativo común.
2. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas practicaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia, Notifica.gal
Este sistema remitirá ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación practicada e a súa falta non impedirá que a notificación sexa considerada plenamente válida.
3. De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia - Notifica.gal, para todos os procedementos administrativos tramitados pola Administración xeral e as entidades instrumentais do sector público autonómico.
En todo caso, a Administración xeral e as entidades do sector público autonómico de Galicia poderán de oficio crear o indicado enderezo, para os efectos de asegurar que as persoas interesadas cumpran a obriga de relacionarse por medios electrónicos.
4. As notificacións entenderanse practicadas no momento en que se produza o acceso ao seu contido e rexeitadas cando transcorresen 10 días naturais desde a posta á disposición da notificación sen que se acceda ao seu contido.
5. Se o envío da notificación electrónica non for posible por problemas técnicos, a Administración xeral e o sector público autonómico practicarán a notificación polos medios previstos na normativa reguladora do procedemento administrativo común.
6. A presentación de documentación derivada das notificacións practicadas será realizada exclusivamente mediante o programa informático SIFO ou, de ser o caso, a través do programa de notificación xenérico da aplicación Forman, https://emprego.xunta.es/forman, que disporá dun punto único para efectuar todos os envíos de documentación á Administración.
Unicamente no caso de que non fose posible por problemas técnicos acreditados que imposibilitasen a presentación de documentación polos medios establecidos no parágrafo anterior, a persoa interesada podería realizar a súa presentación por medio dos trámites comúns da sede electrónica da Xunta de Galicia, https://sede.xunta.gal, a través do procedemento PR004A.
Artigo 11. Recursos
As resolucións ditadas poñen fin á vía administrativa e contra elas poderá interporse, potestativamente, recurso de reposición ante o órgano que ditou o acto, no prazo dun mes desde a súa notificación, se o acto fose expreso, ou en calquera momento a partir do día seguinte a aquel en que se produza o acto presunto, se o acto non fose expreso, de conformidade co que preceptúan os artigos 123 e 124 da Lei 39/2015, do 1 de outubro, do procedemento administrativo común das administracións públicas, ou, directamente, recurso contencioso-administrativo ante o órgano xurisdicional competente, no prazo de dous meses contados desde o día seguinte ao da súa notificación, de conformidade co establecido na Lei 29/1998, do 13 de xullo, reguladora da xurisdición contencioso-administrativa.
Artigo 12. Transparencia e bo goberno
1. Deberá darse cumprimento ás obrigas de transparencia contidas no artigo 17 da Lei 1/2016, do 18 de xaneiro, de transparencia e bo goberno, e no artigo 15 da Lei 9/2007, do 13 de xuño, de subvencións de Galicia.
2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións están obrigadas a subministrar á Administración, ao organismo ou á entidade das previstas no artigo 3.1 da Lei 1/2016, do 18 de xaneiro, a que se atopen vinculadas, logo de requirimento, toda a información necesaria para que aquela cumpra as obrigas previstas no título I da citada lei.
3. Calquera persoa que teña coñecemento de feitos que puidesen ser constitutivos de fraude ou irregularidade en relación coas accións formativas financiadas no marco da presente orde poderá, a través da canle de denuncias da Xunta de Galicia, de comunicación de información en materia de integridade institucional, dispoñible na ligazón https://transparencia.xunta.gal/canle-de-denuncias, pór os ditos feitos en coñecemento desta Administración.
Artigo 13. Protección de datos persoais
A Secretaría Xeral Técnica da Consellería de Emprego, Comercio e Emigración ten a condición de responsable do tratamento dos datos persoais recadados para a xestión e tramitación da subvención obxecto da presente convocatoria, así como daqueles datos persoais achegados pola entidade beneficiaria para a xustificación da devandita subvención. A base lexitimadora para o tratamento destes datos será o cumprimento dunha misión realizada en interese público e o cumprimento dunha obrigación legal (Lei 9/2007, do 13 de xuño, de subvencións de Galicia). Os datos poderán ser comunicados a outras administracións públicas cando sexa estritamente necesario para o exercicio das súas competencias. As persoas interesadas poderán solicitar, ante o responsable do tratamento o acceso, rectificación, limitación e supresión dos seus datos, así como opoñerse ao seu tratamento, a través da sede electrónica da Xunta de Galicia ou nos lugares e rexistros establecidos na normativa reguladora do procedemento administrativo común, segundo se recolle en https://www.xunta.gal/es/exercicio-de-dereitos. No caso de precisar poñerse en contacto coa persoa delegada de protección de datos e demais información adicional, poderá consultarse en https://www.xunta.gal/es/informacion-xeral-proteccion-datos
As entidades que resulten beneficiarias da subvención deberán informar as persoas afectadas, conforme o exixido no artigo 13 do Regulamento (UE) 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento de datos persoais e á libre circulación destes datos e polo que se deroga a Directiva 95/46/CE - Regulamento xeral de protección de datos (en diante, RXPD), dos aspectos establecidos nos parágrafos anteriores.
Así mesmo, a Secretaría Xeral Técnica da Consellería de Emprego, Comercio e Emigración considerarase responsable do tratamento dos datos persoais que poida derivar das accións formativas realizadas ao abeiro da presente convocatoria.
Pola súa banda, as entidades beneficiarias terán a condición de encargadas do tratamento dos datos persoais a que teñan acceso ou directamente recaden, para a xestión e execución das devanditas accións formativas, polo que, para os efectos do disposto nos artigos 28 e 29 do RXPD e no artigo 33 da Lei orgánica 3/2018, do 5 de decembro, de protección de datos persoais e garantía dos dereitos dixitais (en diante, LOPDGDD), deberán dar cumprimento ás obrigas que se inclúen a continuación, e esixir idéntico compromiso do persoal, propio ou externo, ao seu servizo:
a) Dar cumprimento ás obrigas establecidas polo RXPD, LOPDGDD e demais disposicións vixentes en materia de protección de datos, en cada momento, adoptando as medidas que resulten necesarias para cumprir as súas previsións e, en particular, para garantir a seguridade e integridade dos datos e a súa protección fronte a alteracións, perdas, tratamentos ou accesos non autorizados, así como a tratar os datos persoais de acordo coas instrucións do responsable do tratamento e só para os fins deste encargo.
b) Non comunicar os datos a terceiros, salvo que se conte coa autorización expresa do responsable do tratamento, ou nos supostos legalmente admisibles. O encargado poderá comunicar os datos a outros encargados do tratamento do mesmo responsable, de acordo coas instrucións deste.
O encargado do tratamento non poderá subcontratar ningún dos servizos que formen parte do obxecto da subvención e que impliquen o tratamento de datos persoais, salvo os traballos auxiliares necesarios para o normal funcionamento dos seus servizos e o persoal docente.
Nestes supostos, o encargado do tratamento deberá respectar as condicións indicadas nos puntos 2 e 4 do artigo 28 do RXPD para recorrer a outro encargado do tratamento.
c) Manter o deber de segredo sobre os datos persoais a que teña acceso en virtude da presente convocatoria, mesmo despois de concluída a execución das actividades subvencionables.
d) Garantir que as persoas autorizadas para o tratamento dos datos persoais se comprometan, de forma expresa e por escrito, a respectar a confidencialidade e a cumprir as medidas de seguridade correspondentes, das que o encargado as informará oportunamente.
e) Asistir o responsable do tratamento na resposta ao exercicio dos dereitos recoñecidos pola lexislación vixente en materia de protección de datos persoais, mediante as medidas técnicas e organizativas apropiadas, para que poida cumprir coa súa obrigación de responder ás referidas solicitudes das persoas interesadas no prazo previsto pola lexislación vixente. Para iso, o encargado facilitaralle ao responsable, ao primeiro requirimento deste e coa maior brevidade posible, canta información sexa necesaria ou relevante para estes efectos. No caso de que as persoas afectadas solicitasen o exercicio dos seus dereitos ante o encargado do tratamento, este informaraas, a través de calquera medio fidedigno, do procedemento previsto para iso en https://www.xunta.gal/es/exercicio-de-dereitos, e dará traslado ao responsable, asemade, do contido das devanditas solicitudes.
f) Axudar ao responsable do tratamento a garantir o cumprimento das obrigas establecidas nos artigos 32 a 36 do RXPD, tendo en conta a natureza do tratamento e a información á disposición do encargado. En particular, o encargado do tratamento notificará ao responsable, de forma inmediata e implementando as medidas de seguridade necesarias, as violacións da seguridade dos datos persoais ao seu cargo das que teña coñecemento, xunto con toda a información relevante para a documentación, e comunicación da incidencia, de ser o caso, á Axencia Española de Protección de Datos, conforme o previsto no artigo 33 do RXPD.
g) Implantar, nos casos en que sexa de aplicación, as disposicións contidas no Real decreto 311/2022, do 3 de maio, polo que se regula o Esquema nacional de seguridade (ENS). En todo caso, implantará as medidas de seguridade necesarias para:
• Garantir a confidencialidade, integridade, dispoñibilidade e resiliencia permanente dos sistemas e servizos de tratamento.
• Restaurar a dispoñibilidade e o acceso aos datos persoais rapidamente, en caso de incidencia física ou técnica.
• Verificar, avaliar e valorar, de forma periódica, a eficacia das medidas técnicas e organizativas postas en marcha para garantir a seguridade do tratamento.
• Pseudonimizar e cifrar os datos persoais, se é necesario.
h) Designar, segundo o establecido no artigo 13.5 do devandito Real decreto 311/2022, un punto ou persoa de contacto (POC). O POC de seguridade será o propio responsable de seguridade da organización, unha persoa que forme parte da área de seguridade ou unha persoa que teña comunicación directa con esta ou un departamento ou unidade da organización. O POC contará co apoio dos órganos de dirección e será quen canalice e supervise, tanto o cumprimento dos requisitos de seguridade do servizo que presta ou solución que provexa, como as comunicacións relativas á seguridade da información e a xestión dos incidentes para o ámbito do dito servizo. Indicaranse, en todo caso, o nome e apelidos ou denominación do POC, o posto ou cargo en caso que sexa unha persoa física, así como o correo electrónico e teléfono de contacto.
i) Poñer á disposición do responsable toda a información necesaria para acreditar o cumprimento das súas obrigas, en particular, certificados de cumprimento da normativa expedidos polas entidades acreditadas ou, de non existiren, facilitando a realización das auditorías ou inspeccións que faga o responsable ou outro auditor autorizado.
j) Designar un delegado de protección de datos, se corresponde segundo o previsto no artigo 37 do RXPD e no artigo 34 da LOPDGDD, e comunicarlle a súa identidade e datos de contacto ao responsable, sen prexuízo da preceptiva inscrición na AEPD.
k) Devolver ao responsable do tratamento, unha vez que finalice a execución das accións formativas, os datos persoais e, se é o caso, os soportes onde figuren. A devolución suporá o borrado total dos datos existentes nos equipamentos informáticos utilizados polo encargado e subencargados. Non obstante, de conformidade coa normativa en materia de protección de datos, o encargado poderá conservar unha copia dos datos estritamente necesarios, debidamente bloqueados, mentres poidan derivar responsabilidades da execución das devanditas accións formativas.
A fin de dar cumprimento ao deber de información exixido no artigo 13 do RXPD, as entidades beneficiarias informarán as persoas participantes nas accións formativas obxecto da subvención, e sen prexuízo de calquera outra información en materia de protección de datos persoais que sexa necesario proporcionar relativa a actividades ou tratamentos de datos específicos que poidan se levar a cabo no marco da súa xestión, dos seguintes aspectos:
A Consellería de Emprego, Comercio e Emigración, na súa condición de responsable, tratará os datos persoais recadados para a xestión das accións formativas do Sistema de formación profesional dos graos A, B e C para as persoas participantes nelas. A base lexitimadora para o tratamento dos devanditos datos persoais, incluíndo de ser o caso os datos de categoría especial como os relativos á saúde, será o cumprimento dunha misión realizada en interese público (Lei orgánica 3/2022, do 31 de marzo, de ordenación e integración da formación profesional) fundamentada nun interese público esencial. Os datos poderán ser comunicados a outras administracións públicas de ámbito autonómico e estatal cando sexa estritamente necesario para o exercicio das súas competencias, así como ás entidades e profesionais colaboradores na impartición e xestión das devanditas accións formativas. As persoas interesadas poderán solicitar ante o responsable do tratamento o acceso, rectificación, limitación e supresión dos seus datos, así como opoñerse ao seu tratamento, a través da sede electrónica da Xunta de Galicia ou nos lugares e rexistros establecidos pola normativa reguladora do procedemento administrativo común, segundo se recolle en https://www.xunta.gal/exercicio-de-dereitos. Contacto co delegado/a de protección de datos e información adicional ao respecto na seguinte ligazón: https://www.xunta.gal/informacion-xeral-proteccion-datos
Artigo 14. Entidades beneficiarias
1. Poderán solicitar e obter a condición de beneficiarias das subvencións reguladas nestas bases as entidades e centros de formación que, con anterioridade á data de presentación da solicitude, estean acreditados para impartiren no ámbito da Comunidade Autónoma as ofertas formativas do Sistema de formación profesional dos graos A, B e C para as cales soliciten subvención, xa sexa na modalidade presencial ou virtual, entendida esta última como modalidade de teleformación.
As entidades solicitantes deberán estar acreditadas para impartir as ofertas de formación profesional dos graos A, B e C no Rexistro de Centros e Entidades de Formación da Comunidade Autónoma de Galicia ou, no caso de que a formación se imparta na modalidade virtual, no correspondente rexistro estatal.
2. Será requisito para ser beneficiaria da subvención que, para o censo concreto e con relación á ultima convocatoria regulada pola Orde de bases do 8 de xullo de 2025, sempre que transcorrese un mínimo de tres meses desde a data de resolución da concesión da subvención,
• Non se incorrese nun incumprimento total do expediente.
• A entidade comunicase e iniciase máis do 60 % das prazas financiadas con respecto ao total das accións formativas financiadas e sempre que o número de accións formativas concedidas fose superior a tres. Para os efectos do cálculo do tanto por cento, non serán computables as renuncias xustificadas as que se refire o artigo 16 da Orde do 8 de xullo de 2025.
Artigo 15. Máximo e mínimo de participantes nas accións formativas
1. O número mínimo de persoas traballadoras desempregadas por acción formativa solicitada para as que as entidades deberán contar cun compromiso de participación previo á presentación da solicitude de subvención será do 30 % dos participantes programados arredondado ao enteiro superior se a primeira cifra decimal é igual ou superior a 5. A entidade, con respecto ao dito compromiso de participación, deberá cumprir coa normativa recollida na LOPD e no RXPD e para iso conservará a documentación acreditativa correspondente no modelo normalizado, que estará á súa disposición en SIFO.
Unha mesma entidade, nunha ou en varias solicitudes de subvención, non poderá incluír a mesma persoa candidata como comprometida a participar en máis dunha acción formativa. Non obstante, permitirase a súa inclusión simultánea cando a persoa comprometida figure en accións formativas dos graos A ou B, sempre que estas sexan conducentes ao mesmo módulo ou certificado profesional, respectivamente.
2. O número máximo de participantes en accións formativas que se impartan na modalidade presencial será de 15 persoas.
Non poderá iniciarse ningunha acción formativa que non reúna o primeiro día do curso un mínimo de 8 persoas alumnas.
Entre as persoas participantes que inician deberán figurar como asistentes cando menos o 50 %, arredondado ao enteiro superior se a primeira cifra decimal é igual ou superior a 5, das persoas desempregadas que asumiron o compromiso de participar. Da cifra resultante descontaranse as persoas traballadoras comprometidas que accedesen a un emprego, que causasen baixa por enfermidade ou accidente acreditado, ou como consecuencia de estaren seleccionadas noutra acción formativa financiada con fondos públicos do ámbito da formación para o emprego, e sempre e cando estes supostos se producisen con posterioridade á presentación da solicitude de subvención.
As accións formativas que se impartan na modalidade presencial non poderán desagregarse en grupos.
3. Na formación que se imparta na modalidade virtual o número máximo de participantes será de 30 persoas por acción formativa. Para os efectos de cumprir os requisitos de capacidade das actividades presenciais previstas, a acción formativa poderá desagregarse en grupos.
Non se poderá iniciar ningunha acción formativa ou, de ser o caso, ningún grupo, que non reúna os requisitos de capacidade e conte co mínimo de participantes por grupo establecidos no número 2 deste artigo. A acreditación da existencia deste número mínimo de persoas alumnas realizarase polo acceso á plataforma de teleformación das persoas participantes durante os 5 primeiros días lectivos, que se corresponden cos 5 primeiros días naturais contados desde a data de inicio da acción formativa.
Se, transcorrido o prazo establecido na convocatoria para que o alumnado acceda á plataforma, o número de persoas alumnas que se conectou é inferior ao número mínimo de participantes exixido, a entidade de formación deberá comunicar tal circunstancia ao órgano competente e a acción formativa entenderase como non iniciada e non poderá continuar a súa impartición, non xerando dereitos económicos para a entidade.
4. Nas ofertas de grao C, as persoas que estean exentas de realizar o primeiro módulo profesional e figuren incluídas na relación nominal do alumnado seleccionado a que se refire o artigo 19.3.a) da Orde do 8 de xullo de 2025, computarán como participantes da acción formativa.
5. De se produciren baixas no alumnado participante unha vez iniciada a acción formativa, será de aplicación o disposto no artigo 28 da Orde do 8 de xullo de 2025.
Artigo 16. Límites e criterios de aplicación para a resolución da convocatoria
1. Ademais das persoas traballadoras desempregadas, poderán participar nas accións formativas reguladas nesta orde as persoas traballadoras ocupadas, ata un límite do 30 % do número de persoas participantes na acción formativa arrendondado ao enteiro inferior. Este límite será aplicado polas oficinas de emprego sobre os participantes programados no momento de validación da acta e será revisado por SIFO sobre os participantes iniciados o día de inicio do curso.
2. As entidades poderán publicar simultaneamente, no buscador de formación Diplos da Consellería de Emprego, Comercio e Emigración, o número máximo de accións formativas por censo que teñan permitido solicitar en aplicación do disposto no punto 3 deste artigo. A publicación en Diplos estará visible durante dous meses ou ata a notificación da resolución de concesión.
Notificada a resolución de concesión de accións formativas para un determinado censo, as entidades poderán solicitar publicar no buscador Diplos novas ofertas formativas que impartir no citado censo sen que se supere o número máximo de accións formativas establecidas no parágrafo anterior.
O número máximo de accións formativas dunha mesma especialidade que poderán publicarse simultaneamente no buscador de formación para un censo concreto será de 2 por provincia.
3. As entidades poderán incluír nas súas solicitudes ata un máximo de 6 accións formativas por censo. Este número poderá incrementarse ata acadar, cun límite máximo de 10, o número de accións formativas do procedemento TR301K iniciadas polo censo solicitante na última convocatoria finalizada no momento da entrada en vigor desta orde.
No caso de que a solicitude non inclúa o número máximo de accións formativas para ese censo, poderanse presentar novas solicitudes sempre que o total non supere o dito número máximo.
Unha vez iniciadas o 40 % das accións formativas concedidas a un censo arredondado ao enteiro superior se a primeira cifra decimal é igual ou superior a 5, a beneficiaria poderá presentar novas solicitudes de subvención para o dito censo.
4. O incumprimento do prazo establecido para o inicio das accións formativas e as renuncias a impartir unha acción formativa subvencionada que teñan a consideración de non xustificadas darán lugar á perda, durante un período de 3 meses contado, respectivamente, desde o día seguinte ao da data límite para o inicio da acción formativa ou desde a data de notificación da resolución de consideración da renuncia como non xustificada, do dereito da entidade beneficiaria a solicitar unha nova subvención para o financiamento de accións formativas para impartir no censo que renunciou, sempre que as accións formativas non executadas superen o 20 % das concedidas.
5. Poderán ser obxecto de subvención aquelas especialidades formativas que se determinen no anexo III desta convocatoria, así como os módulos formativos transversais que se impartan asociados a estas. Serán igualmente subvencionables todos os graos A e B contidos dentro dos graos C do citado anexo.
Artigo 17. Comprobación de datos
1. Para a tramitación deste procedemento consultaranse automaticamente os datos incluídos nos seguintes documentos en poder da administración actuante ou elaborados polas administracións públicas, agás que a persoa interesada se opoña á súa consulta:
a) DNI/NIE da persoa solicitante.
b) DNI/NIE da persoa representante.
c) NIF da entidade solicitante.
d) Certificado de estar ao día no pagamento de obrigas tributarias coa AEAT.
e) Certificado de estar ao día no pagamento coa Seguridade Social.
f) Certificado de estar ao día no pagamento de obrigas tributarias coa Atriga.
g) Concesión de subvencións e axudas.
h) Inhabilitación para obter subvencións e axudas.
2. No caso de que as persoas interesadas se opoñan a esta consulta, deberán indicalo no recadro habilitado no formulario correspondente e achegar os correspondentes documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
3. Excepcionalmente, no caso de que algunha circunstancia imposibilitase a obtención dos citados datos, poderáselles solicitar ás persoas interesadas a presentación dos documentos correspondentes.
Artigo 18. Prazos de execución das accións formativas da segunda convocatoria
Na solicitude de subvención, as entidades deberán indicar a data prevista de inicio da acción formativa. En todo caso, as accións formativas deberán comezar no prazo máximo de 3 meses contado desde a data de notificación da resolución de concesión, e requirirán a validación previa do persoal técnico da unidade administrativa competente, a través da aplicación informática SIFO.
A data límite para o remate das accións formativas desta segunda convocatoria será o 31 de marzo de 2027.
Artigo 19. Prazos de xustificación das accións formativas da segunda convocatoria
1. Consonte o disposto no artigo 37.2 da Orde do 8 de xullo de 2025, a xustificación das accións formativas deberá realizarse a través da aplicación informática SIFO, no prazo máximo dun mes desde o remate da acción formativa e de acordo cos seguinte criterios:
a) Nas accións formativas que rematen ata o 30 de novembro de 2026, a data límite para a presentación da xustificación final será o 15 de decembro de 2026.
b) Nas accións formativas que rematen despois do 30 de novembro de 2026, a data límite para a presentación da xustificación final será o 30 de abril de 2027.
2. No caso de concesión de anticipos, os gastos realizados con cargo a eles deberán referirse á anualidade orzamentaria para a cal foron concedidos, e deberán xustificarse na data límite do 31 de xaneiro de 2027, para o caso de anticipos concedidos con cargo a 2026, e do 30 de abril de 2027, para o caso de anticipos concedidos con cargo a 2027.
Artigo 20. Anexos
Son anexos desta orde os seguintes:
• Anexo I: Modelo de solicitude
• Anexo II: Ficha da acción formativa
• Anexo III: Relación de especialidades formativas que poden ser obxecto de subvención na convocatoria, co importe dos módulos económicos por hora e persoa alumna, e da obriga, de ser o caso, de impartir o módulo transversal de prevención de riscos laborais na modalidade presencial
Disposición transitoria. Accións formativas impartidas na primeira convocatoria ao abeiro do disposto na Orde de bases reguladoras do 8 de xullo de 2025
Non será de aplicación nas accións formativas concedidas e impartidas ao abeiro da primeira convocatoria o disposto no artigo 1 desta Orde pola que se modifica parcialmente a orde de bases reguladoras do 8 de xullo de 2025.
Disposición derradeira primeira. Autorización para ditar resolucións e instrucións
Autorízase a persoa titular da Dirección Xeral de Formación e Cualificación para o Emprego para ditar, no ámbito das súas competencias, as resolucións e instrucións necesarias para o desenvolvemento e a execución desta disposición.
Disposición derradeira segunda. Entrada en vigor
Esta orde entrará en vigor aos 5 días hábiles seguintes da súa publicación no Diario Oficial de Galicia.
Santiago de Compostela, 29 de decembro de 2025
José González Vázquez
Conselleiro de Emprego, Comercio e Emigración
