A presente orde ten por obxecto concretar os criterios que rexerán a terceira convocatoria de concesión de axudas para impartir accións formativas de formación profesional dos graos A, B e C, e competencias clave, para persoas traballadoras ocupadas.
Esta convocatoria apróbase ao abeiro do disposto na Orde do 13 de agosto de 2024 pola que se establecen as bases reguladoras para o período 2024-2026 e se efectúa a primeira convocatoria de subvencións, en réxime de concorrencia non competitiva, co fin de financiar accións formativas do Sistema de formación profesional dos graos A, B e C, e competencias clave, destinadas a persoas traballadoras ocupadas, para o exercicio 2024.
A Lei orgánica 3/2022, do 31 de marzo, de ordenación e integración da formación profesional, estableceu un novo marco normativo que ten por obxectivo a constitución e ordenación dun sistema único e integrado de formación profesional.
A súa finalidade é regular un réxime de formación e acompañamento que sexa capaz de responder con flexibilidade aos intereses, expectativas e aspiracións de cualificación profesional das persoas ao longo da súa vida e ás competencias demandadas polas novas necesidades produtivas e sectoriais, tanto para o aumento da produtividade como para a xeración de emprego.
O Decreto 147/2024, do 20 de maio, polo que se establece a estrutura orgánica da Consellería de Emprego, Comercio e Emigración, atribúe á Dirección Xeral de Formación e Cualificación para o Emprego as competencias relativas á formación profesional para o emprego en toda a súa extensión, incluídos os graos A, B e C da Lei orgánica 3/2022, do 1 de marzo, sen prexuízo das competencias da Consellería de Educación, Ciencia, Universidades e Formación Profesional e en coordinación con ela.
O Real decreto 659/2023, do 18 de xullo, polo que se desenvolve a ordenación do Sistema de formación profesional, establece no seu artigo 209.3.c) que as administracións competentes poderán establecer unha rede de centros sostidos total ou parcialmente con financiamento público para impartir graos A, B e C, que lles permitan axilizar a posta en marcha das ofertas de formación. Para tales efectos cita, entre outras opcións, os centros e entidades autorizados para impartir accións formativas do Sistema de formación profesional que concorran ás convocatorias de subvencións destinadas á impartición de accións formativas.
Tendo en conta as características deste tipo de formación e o perfil do alumnado participante, enténdese que un sistema que permita solicitar as accións formativas cando exista demanda constatada para a súa impartición é o modo máis idóneo de seguir con esta liña de subvencións.
A Lei 9/2007, do 13 de xuño, de subvencións de Galicia, dispón no seu artigo 5.2 que a concesión de axudas e subvencións se axustará aos principios de publicidade, transparencia, concorrencia, obxectividade, igualdade e non discriminación, aos cales se axusta esta disposición. Tamén será de aplicación o Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.
O orzamento desta convocatoria está financiado por fondos finalistas transferidos polo Ministerio de Educación, Formación Profesional e Deportes.
A concesión e a xustificación das subvencións concedidas realizarase a través do réxime de módulos económicos. Para os efectos de aplicar o dito réxime, a determinación da contía dos módulos económicos específicos das distintas especialidades formativas que se van ofertar establecerase na correspondente convocatoria e de acordo co disposto no artigo 3 e no anexo I da Orde EFP/942/2022.
Esta terceira convocatoria tramítase ao abeiro do disposto no artigo 25 do Regulamento da Lei de subvencións de Galicia, e no artigo 1.1 da Orde da Consellería de Economía e Facenda, do 11 de febreiro de 1998, pola que se regula a tramitación anticipada de expediente de gasto, na redacción dada pola Orde do 27 de novembro de 2000, modificada pola Orde do 25 de outubro de 2001, pola que a concesión das subvencións queda sometida á condición suspensiva de existencia de crédito adecuado e suficiente no momento da resolución.
Consecuentemente con todo o anterior e no exercicio das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1. Obxecto e ámbito de aplicación
1. Esta orde ten por obxecto proceder, no ámbito da Comunidade Autónoma de Galicia, á terceira convocatoria de subvencións para a realización de accións formativas do Sistema de formación profesional dos graos A, B e C, e competencias clave, para persoas traballadoras ocupadas (código de procedemento TR301X).
2. As subvencións que se concedan ao abeiro do disposto nesta orde de convocatoria terán como finalidade o financiamento das especialidades formativas relacionadas no anexo III, e estarán dirixidas á adquisición e mellora de competencias profesionais con impacto no mercado laboral conducentes a unha formación formal total ou parcial incluída nun certificado profesional, ou á adquisición de competencias clave.
3. As bases reguladoras desta convocatoria están recollidas na Orde do 13 de agosto de 2024 pola que se establecen as bases reguladoras para o período 2024-2026 e se efectúa a primeira convocatoria de subvencións, en réxime de concorrencia non competitiva, co fin de financiar accións formativas do Sistema de formación profesional dos graos A, B e C, e competencias clave, destinadas a persoas traballadoras ocupadas, para o exercicio 2024 (DOG núm. 167, do 30 de agosto) modificada pola Orde do 20 de marzo de 2025 publicada no DOG núm. 59, do 26 de marzo.
En data do 29 de xaneiro de 2025, mediante a Orde do 12 de decembro de 2024, efectuouse a segunda convocatoria de subvencións.
Artigo 2. Procedemento de concesión das subvencións
A concesión das axudas realizarase polo procedemento de concesión directa en réxime de concorrencia non competitiva.
Artigo 3. Financiamento
1. Destínase a esta terceira convocatoria, correspondente á anualidade 2026, un crédito por importe total de catro millóns de euros (4.000.000 €), que se imputarán con cargo ás aplicacións orzamentarias 14.03.323B.471.0 e 14.03.323B.481.0, ou aquelas que a substitúan de conformidade coa normativa orzamentaria aplicable, con código de proxecto 2021 00150. Esta aplicación está financiada con fondos finalistas transferidos polo Ministerio de Educación, Formación Profesional e Deportes.
O crédito orzamentario está recollido no proxecto de Lei de orzamentos xerais da Comunidade Autónoma de Galicia para o ano 2026, aprobado polo Consello da Xunta de Galicia na súa reunión do día 17 de outubro de 2025.
|
Aplicación orzamentaria |
Total |
|
14.03.323B.471.0 |
3.200.000,00 € |
|
14.03.323B.481.0 |
800.000,00 € |
|
Total |
4.000.000,00 € |
2. Esta terceira convocatoria, dado o seu carácter de tramitación anticipada, queda sometida á condición suspensiva da existencia de crédito adecuado e suficiente no momento da resolución de concesión.
3. Os créditos orzamentarios a que se refire este artigo poderán ser obxecto de modificacións como consecuencia da asignación ou da redistribución de fondos para o financiamento dos programas de formación para o emprego.
Poderá ampliarse a contía máxima dos créditos dispoñibles para esta convocatoria. O incremento de crédito estará condicionado á declaración de dispoñibilidade do crédito como consecuencia dunha xeración, ampliación, incorporación de crédito ou da existencia de remanentes doutras convocatorias financiadas con cargo ao mesmo crédito ou créditos incluídos no mesmo programa ou en programas do mesmo servizo.
Calquera modificación ou ampliación dos créditos dispoñibles estará condicionada ao cumprimento dos supostos e as condicións previstas nos artigos 30 e 31 do Decreto 11/2009, do 8 de xaneiro, polo que se aproba o Regulamento de subvencións de Galicia.
4. Na modalidade presencial, o módulo económico euro/hora por persoa alumna aplicable a esta convocatoria será o establecido, para cada especialidade formativa, no anexo III. Nas especialidades formativas impartidas na modalidade virtual será de aplicación o 70 % do importe do módulo económico presencial euro/hora por persoa alumna, cunha contía máxima de 6 €.
5. Para os custos adicionais de adaptación da acción formativa á participación do alumnado con discapacidade establécese un custo unitario de 16 € por hora lectiva.
6. Para os gastos destinados a promover a adecuación das condicións físicas e/ou tecnolóxicas, e a dotación de recursos materiais e medios didácticos apropiados ás persoas con discapacidade, establécese unha contía máxima por persoa alumna de 500 €.
7. O módulo de formación en empresa financiarase, de ser o caso, con 3 € por alumna ou alumno e horas da formación en empresa efectivamente titorizadas, que se destinarán ao financiamento dos custos da actividade da titorización da formación en empresa, así como ao custo da subscrición dunha póliza colectiva de accidentes de traballo e de responsabilidade civil.
Excluiranse deste cómputo as horas correspondentes ás horas de formación en empresa non realizadas polas persoas participantes exentas.
Artigo 4. Entidades beneficiarias
1. Poderán solicitar e obter a condición de beneficiarias das subvencións reguladas nesta orde as empresas e as entidades sen ánimo de lucro que, con anterioridade á data de presentación da solicitude de subvención, estean acreditadas ou, de ser o caso, inscritas para impartiren no ámbito da Comunidade Autónoma as ofertas formativas do Sistema de formación profesional dos graos A, B e C e/ou as competencias clave para as cales soliciten subvención, xa sexa na modalidade presencial ou virtual, entendida esta última como modalidade de teleformación.
As entidades solicitantes deberán estar acreditadas ou inscritas para impartir as ofertas de formación profesional dos graos A, B e C ou as especialidades formativas de competencias clave, no Rexistro de Centros e Entidades de Formación da Comunidade Autónoma de Galicia ou, de ser o caso, que a formación se imparta na modalidade virtual, no correspondente rexistro estatal.
2. As entidades deberán dispor, no ámbito territorial da Comunidade Autónoma de Galicia, das instalacións debidamente homologadas que permitan a impartición das actividades presenciais das accións formativas solicitadas.
3. As entidades que soliciten impartir a formación na modalidade virtual deberán contar con autorización previa para a impartición das mesmas ofertas na modalidade presencial.
Caso de contar coa autorización para impartir a oferta presencial, deberá garantirse que se dispón dos requisitos de espazos e recursos necesarios para a súa realización ou, de ser o caso, formalizar un convenio ou acordo público cun centro de formación profesional localizado na Comunidade Autónoma de Galicia que, estando acreditado con anterioridade á data de presentación da solicitude de subvención para impartir as referidas ofertas na modalidade presencial, garanta a presencialidade nos casos necesarios, incluídas, de ser o caso, as probas finais de cada módulo profesional. Estes centros non se poderán modificar durante o desenvolvemento da acción formativa.
O convenio ou acordo de vinculación deberá estar formalizado, vixente e dado de alta no Rexistro de Centros e Entidades de Formación da Comunidade Autónoma de Galicia, logo de resolución favorable da Dirección Xeral de Formación e Cualificación para o Emprego, con anterioridade á presentación da solicitude de subvención.
4. O incumprimento por parte da entidade solicitante do requisito de acreditación e inscrición en prazo para impartir algunha certificación profesional ou algunha competencia clave solicitada dará lugar á exclusión das accións formativas afectadas da solicitude.
5. As entidades beneficiarias poderán facer uso da aula virtual nos termos establecidos na orde de bases reguladoras do 13 de agosto de 2024, na presente orde de terceira convocatoria e nas instrucións que, ao respecto, publique a Consellería de Emprego, Comercio e Emigración.
6. Non poderán obter a condición de entidades beneficiarias das subvencións previstas nesta Orde aquelas nas cales concorran algunhas das circunstancias establecidas no artigo 10 da Lei 9/2007, do 13 de xuño, de subvencións de Galicia, e no artigo 7.6 da Orde EFP/942/2022, do 23 de setembro.
A xustificación polas entidades solicitantes de non estar incursas en ningunha das anteditas circunstancias realizarase mediante unha declaración responsable incluída no modelo de solicitude definido no anexo I da convocatoria, cuxo contido deberá respectar o disposto no artigo 69 da Lei 39/2015, do 1 de outubro, do procedemento administrativo común das administracións públicas.
Tampouco poderán ser persoas beneficiarias, en aplicación do disposto no artigo 82 da Lei 4/2023, de 28 de febreiro, para a igualdade real e efectiva das persoas trans e para a garantía dos dereitos das persoas LGTBI, aquelas entidades que cometan, inciten ou promocionen LGTBIfobia, incluíndo a promoción ou realización de terapias de conversión.
7. Para poder seren persoas beneficiarias da subvención, as entidades deberán contar co compromiso de participación do número mínimo de persoas traballadoras ocupadas que se estipula no artigo 19 desta orde para poder iniciar a acción formativa, así como do persoal docente acreditado encargado da súa impartición.
Este compromiso acreditarase, de acordo co disposto no artigo 7.1.d) desta orde, mediante a presentación dunha declaración responsable por cada acción formativa solicitada. A declaración incluirá a relación de persoas que se comprometen a asistir á formación, con indicación do persoal formador.
8. As entidades deberán dispor e manter durante todo o período de execución da formación solicitada, a capacidade suficiente, en termos económicos, técnicos, de recursos humanos, materiais e organizativos, e de aulas, talleres e instalacións e equipamento en xeral, para asumir a xestión e a impartición da totalidade das accións formativas que solicitan.
Para estes efectos, deberán dispor da documentación acreditativa do cumprimento dos citados requisitos; documentación que porán á disposición da Administración cando esta llo demande.
Artigo 5. Forma e lugar de presentación das solicitudes
1. As solicitudes presentaranse obrigatoriamente por medios electrónicos a través do formulario electrónico normalizado dispoñible na aplicación SIFO, anexo I, accesible a través da sede electrónica da Xunta de Galicia no enderezo https://sede.xunta.gal ou no enderezo directo https://emprego.xunta.es/sifo-solicitudes
De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela en que fose realizada a emenda.
2. No suposto de que a solicitude non cumpra os requisitos establecidos na Orde de bases reguladoras do 13 de agosto de 2024 e/ou na presente orde de terceira convocatoria, ou a documentación presentada conteña erros ou sexa insuficiente, requirirase a persoa solicitante para que, nun prazo de 10 días hábiles, emende a falta ou achegue os documentos preceptivos, con indicación de que, se así non o fixer, se considerará desistida da súa solicitude, logo de resolución que así o declare.
Caso de que o requirimento afecte só algunha das accións formativas da solicitude, entenderanse como desistidas unicamente estas, continuándose coa tramitación do resto do expediente.
Non se admitirán a trámite, e por conseguinte non existirá a posibilidade de emenda, as solicitudes presentadas fóra de prazo.
3. As solicitudes dirixiranse á Dirección Xeral de Formación e Cualificación para o Emprego da Consellería de Emprego, Comercio e Emigración.
As entidades de formación poderán formular unha única solicitude de subvención e incluirán nela, dentro da súa capacidade real de execución e atendendo aos límites e requisitos que se determinan na Orde de bases reguladoras do 13 de agosto de 2024 e nesta Orde de terceira convocatoria, todas as accións formativas para as que solicita subvención.
Para os posibles efectos de superación, de ser o caso, do límite máximo do importe de subvención que se vai conceder que se establece nesta convocatoria, ou de esgotamento do orzamento dispoñible, as accións formativas para as que se solicita subvención deberán ir ordenadas en función da prioridade de impartición que lles outorgue a entidade solicitante, de xeito que estas figuren ordenadas segundo criterio de maior a menor preferencia.
Non poderán formularse solicitudes de subvencións para impartir accións formativas que teñan previsto comezar nunha data anterior ao prazo ou data que se recolle nesta convocatoria.
4. A solicitude, que incluirá a ficha das accións formativas que se pretende impartir (anexo II), deberá presentarse acompañada da documentación complementaria relacionada no artigo 7 desta orde.
Artigo 6. Declaración responsable que forma parte da solicitude
1. Forma parte da solicitude a declaración responsable que se contén nela e na cal se farán constar os aspectos seguintes:
a) Que, en relación con outras axudas concedidas ou solicitadas:
• Non se solicitou nin se concedeu ningunha outra axuda para este mesmo proxecto e conceptos para os que se solicita esta subvención.
• De se solicitar e/ou conceder outras axudas para este mesmo proxecto e conceptos para os que se solicita esta subvención, deberán relacionarse estas.
b) Que todos os datos contidos na solicitude e nos documentos que se xuntan son certos.
c) Que coñece as estipulacións da presente orde, que cumpre cos requisitos establecidos nela e que se compromete a destinar o importe da axuda ao obxecto da subvención indicada.
d) Que cumpre os requisitos para obter a condición de persoa beneficiaria, que está ao día no pagamento de obrigas por reintegro de subvencións e que non está incursa en ningunha das circunstancias previstas nos números 2 e 3 do artigo 10 da Lei 9/2007, do 13 de xuño, de subvencións de Galicia, no artigo 9 do Regulamento de subvencións de Galicia, aprobado polo Decreto 11/2009, do 8 de xaneiro, e no artigo 7 da Orde EFP/942/2022, do 23 de setembro.
e) Que as dotacións, os equipamentos, os medios materiais, as instalacións, os lugares e as modalidades de impartición das accións formativas serán aquelas para as que están acreditadas e inscritas para tal fin, e que son aptas e que cumpren e manterán durante todo o período de impartición das accións formativas as condicións e os requisitos que exixe a normativa aplicable.
f) Que conta con capacidade suficiente, en termos económicos, técnicos, de recursos humanos, materiais e organizativos, así como, de ser o caso, de aulas, talleres e instalacións en xeral, para asumir na súa totalidade a execución completa das accións formativas que solicita.
g) Que dispón da documentación que acredita o cumprimento dos anteriores puntos e que a porá á disposición da Administración cando lle sexa requirida.
2. A presentación dunha declaración responsable que falsee ou oculte circunstancias que impidan ou limiten a concesión da subvención ou o seu pagamento terá a consideración dunha infracción moi grave nos termos do artigo 56 da Lei 9/2007, do 13 de xuño, de subvencións de Galicia, coas posibles consecuencias sancionadoras que se recollen na dita norma e no texto refundido da Lei sobre infraccións e sancións na orde social, aprobado polo Real decreto lexislativo 5/2000, do 4 de agosto.
Coa finalidade de garantir a veracidade das declaracións responsables contidas neste artigo, poderán realizarse comprobacións durante calquera das fases do procedemento por parte do persoal técnico da Dirección Xeral de Formación e Cualificación para o Emprego, das cales poderán derivar, de ser o caso, as consecuencias sinaladas neste punto para os supostos de falseamento do contido das declaracións responsables.
Se así se encomenda a través do instrumento xurídico correspondente, estas actuacións de comprobación poderán efectuarse a través doutra entidade, pública ou privada.
Artigo 7. Documentación complementaria
1. As persoas interesadas deberán achegar coa solicitude a seguinte documentación:
a) Ficha da acción formativa (anexo II).
b) Acreditación da capacidade legal suficiente para asinar a solicitude (escritura notarial de poderes ou calquera outro medio válido en dereito).
c) De ser o caso, cando as accións formativas que se solicitan se correspondan con ofertas formativas do grao C, compromiso de subscrición dun convenio ou acordo coa empresa ou empresas en que terá lugar a formación en empresa incluída no certificado profesional.
d) Declaración responsable asinada pola persoa responsable da entidade manifestando que, para cada acción formativa que solicita, conta co compromiso de participación do número mínimo de persoas traballadoras ocupadas que se determine na convocatoria, así como do persoal docente acreditado encargado de impartir a acción formativa. A declaración deberá incluír a relación de docentes acreditados e de persoas comprometidas en asistir a cada acción formativa solicitada.
e) De ser o caso, naquelas accións formativas en que estea previsto o uso de aula virtual como medio complementario e adicional para desenvolver o proceso formativo, memoria explicativa detallada que acredite, de acordo co disposto no artigo 24.6 da Orde de bases reguladoras do 13 de agosto de 2024, a viabilidade de impartir mediante aula virtual aqueles contidos da/das acción/s formativa/s solicitada/s que estea previsto realizar utilizando este medio.
A memoria deberá indicar expresamente que contidos se impartirán mediante aula virtual, a súa duración e datas de realización, así como o calendario de sesións presenciais e de exames que se van realizar.
f) De ser o caso, as entidades de formación que soliciten impartir ofertas formativas na modalidade virtual deberán acreditar que contan con autorización previa para impartilas na modalidade presencial. Esta acreditación non será necesaria caso de estar dada de alta no Rexistro de Centros e Entidades de Formación da Comunidade Autónoma de Galicia para impartir as ofertas solicitadas na modalidade presencial.
De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos que xa fosen presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán solicitados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, agás que conste no procedemento a oposición expresa da persoa interesada.
De forma excepcional, se non se poden obter os citados documentos, poderá solicitarse novamente á persoa interesada a súa achega.
2. A documentación complementaria deberá presentarse electronicamente.
Se algunha das persoas interesadas presenta a documentación complementaria presencialmente, requiriráselle para que a emende a través da súa presentación electrónica. Para estes efectos, considerarase como data de presentación aquela en que fose realizada a emenda.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar, de maneira motivada, o cotexo das copias achegadas pola persoa interesada, para o que poderá requirir a exhibición do documento ou da información orixinal.
3. Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.
4. No caso de que algún dos documentos que se vai presentar de forma electrónica supere os tamaños máximos establecidos ou teña un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no número anterior.
A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
5. De existir discrepancia entre a información contida na solicitude (anexo I) e/ou na ficha da acción formativa (anexo II), en relación coa información achegada no resto de documentación que se vai presentar, será considerada como correcta, para os efectos de tramitar e revisar a solicitude, a alegada nos citados anexos I e II, con independencia, de ser o caso, de que para ter validez esta deba acreditarse documentalmente.
Artigo 8. Comprobación de datos
1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, agás que a persoa interesada se opoña á súa consulta:
a) DNI/NIE da persoa solicitante.
b) DNI/NIE da persoa representante.
c) NIF da entidade solicitante.
d) Certificado de estar ao día no pagamento de obrigas tributarias coa AEAT.
e) Certificado de estar ao día no pagamento coa Seguridade Social.
f) Certificado de estar ao día no pagamento de obrigas tributarias coa Atriga.
2. No caso de que as persoas interesadas se opoñan á consulta, deberán indicalo no recadro correspondente habilitado no formulario correspondente e achegar os documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
3. Excepcionalmente, no caso de que algunha circunstancia imposibilitase a obtención dos citados datos, poderase solicitar ás persoas interesadas a presentación dos documentos correspondentes.
Artigo 9. Trámites posteriores á presentación da solicitude
Todos os trámites administrativos que as persoas interesadas deban efectuar tras a presentación da solicitude deste procedemento deberán ser realizados electronicamente a través da aplicación informática SIFO, debendo adecuarse a presentación de documentación derivada das notificacións practicadas pola Administración ao disposto no artigo 11.6 da presente orde.
Artigo 10. Prazo de presentación de solicitudes
A presentación das solicitudes deberá axustarse ao disposto nos artigos 5, 6, 7 e 8 da presente orde.
O prazo de presentación de solicitudes estará aberto desde o día da entrada en vigor da orde ás 9.00 horas, de conformidade co establecido na disposición derradeira segunda, ata o 30 de setembro de 2026 ás 20.00 horas ou, de ser o caso, ata que se esgote o crédito orzamentario dispoñible.
No caso de que o día de inicio do prazo sexa inhábil, o prazo comezará o día hábil seguinte.
Artigo 11. Réxime das notificacións
1. As notificacións de resolucións e actos administrativos practicaranse só por medios electrónicos, nos termos previstos na normativa reguladora do procedemento administrativo común.
2. De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas efectuaranse mediante a comparecencia na sede electrónica da Xunta de Galicia e a través do Sistema de notificación electrónica de Galicia-Notifica.gal.
Este sistema remitirá ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación practicada e a súa falta non impedirá que a notificación sexa considerada plenamente válida.
3. De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, para todos os procedementos administrativos tramitados pola Administración xeral e as entidades instrumentais do sector público autonómico.
En todo caso, a Administración xeral e as entidades do sector público autonómico de Galicia poderán, de oficio, crear o indicado enderezo, para os efectos de asegurar o cumprimento polas persoas interesadas da súa obriga de relacionarse por medios electrónicos.
4. As notificacións entenderanse practicadas no momento en que se produza o acceso ao seu contido, e rexeitadas cando transcorran dez días naturais desde a posta á disposición da notificación sen que se acceda ao seu contido.
5. Se o envío da notificación electrónica non é posible por problemas técnicos, practicarase a notificación polos medios previstos na normativa reguladora do procedemento administrativo común.
6. A presentación de documentación derivada das notificacións practicadas será realizada exclusivamente mediante o programa informático SIFO ou, de ser o caso, a través do programa de notificación xenérico do aplicativo FORMAN, https://emprego.xunta.es/forman, que disporá dun punto único para efectuar todos os envíos de documentación á Administración.
Unicamente no caso de que non fose posible, por problemas técnicos acreditados que imposibilitasen a presentación de documentación polos medios establecidos no parágrafo anterior, a persoa interesada podería realizar a súa presentación por medio dos trámites ordinarios da sede electrónica da Xunta de Galicia (https://sede.xunta.gal), a través do procedemento PR004A.
Artigo 12. Recursos
As resolucións ditadas poñen fin á vía administrativa, e contra elas poderá interporse, potestativamente, recurso de reposición ante o órgano que ditou o acto, no prazo dun mes desde a súa notificación, se o acto for expreso, ou en calquera momento a partir do día seguinte a aquel en que se produza o acto presunto, se o acto non for expreso, de conformidade co que preceptúan os artigos 123 e 124 da Lei 39/2015, do 1 de outubro, do procedemento administrativo común das administracións públicas, ou, directamente, recurso contencioso-administrativo ante o órgano xurisdicional competente, no prazo de dous meses contados desde o día seguinte ao da súa notificación, de conformidade co establecido na Lei 29/1998, do 13 de xullo, reguladora da xurisdición contencioso-administrativa.
Artigo 13. Transparencia e bo goberno
1. Deberá darse cumprimento ás obrigas de transparencia contidas no artigo 17 da Lei 1/2016, do 18 de xaneiro, de transparencia e bo goberno, e no artigo 15 da Lei 9/2007, do 13 de xuño, de subvencións de Galicia.
2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións están obrigadas a subministrar á Administración, ao organismo ou á entidade das previstas no artigo 3.1 da Lei 1/2016, do 18 de xaneiro, a que se atopen vinculadas, logo de requirimento, toda a información necesaria para o cumprimento por aquela das obrigas previstas no título I da citada lei.
3. Calquera persoa que teña coñecemento de feitos que puidesen ser constitutivos de fraude ou irregularidade en relación coas accións formativas financiadas no marco da Orde de bases reguladoras do 13 de agosto de 2024 e da orde de terceira convocatoria poderá, a través da canle de denuncias da Xunta de Galicia, de comunicación de información en materia de integridade institucional, dispoñible na ligazón https://transparencia.xunta.gal/canle-de-denuncias, pór os ditos feitos en coñecemento desta Administración.
Artigo 14. Protección de datos persoais
A Secretaría Xeral Técnica da Consellería de Emprego, Comercio e Emigración terá a condición de responsable do tratamento dos datos persoais recadados para a xestión e tramitación da subvención obxecto da presente convocatoria, así como daqueles datos persoais achegados pola entidade beneficiaria para a xustificación da devandita subvención. A base lexitimadora para o tratamento destes datos será o cumprimento dunha misión realizada en interese público e o cumprimento dunha obriga legal (Lei 9/2007, do 13 de xuño, de subvencións de Galicia). Os datos poderán ser comunicados a outras administracións públicas cando sexa estritamente necesario para o exercicio das súas competencias. As persoas interesadas poderán solicitar, ante o responsable do tratamento o acceso, rectificación, limitación e supresión dos seus datos, así como opoñerse ao seu tratamento, a través da sede electrónica da Xunta de Galicia ou nos lugares e nos rexistros establecidos na normativa reguladora do procedemento administrativo común, segundo se recolle en https://www.xunta.gal/es/exercicio-de-dereitos. No caso de precisar poñerse en contacto coa persoa delegada de protección de datos e demais información adicional, poderá consultarse en https://www.xunta.gal/es/informacion-xeral-proteccion-datos
As entidades que resulten beneficiarias da subvención deberán informar as persoas afectadas, conforme o exixido no artigo 13 do Regulamento (UE) 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento de datos persoais e á libre circulación destes datos e polo que se derroga a Directiva 95/46/CE-Regulamento xeral de protección de datos (en diante, RXPD) dos aspectos establecidos nos parágrafos anteriores.
Así mesmo, a Secretaría Xeral Técnica da Consellería de Emprego, Comercio e Emigración considerarase responsable do tratamento dos datos persoais que se poidan derivar das accións formativas realizadas ao abeiro da presente convocatoria.
Pola súa banda, as entidades beneficiarias terán a condición de encargado do tratamento dos datos persoais aos cales teñan acceso, ou directamente soliciten, para a xestión e execución das devanditas accións formativas, polo que, para os efectos do disposto nos artigos 28 e 29 do RXPD e no artigo 33 da Lei orgánica 3/2018, do 5 de decembro, de protección de datos persoais e garantía dos dereitos dixitais (en diante, LOPDGDD) deberán dar cumprimento ás obrigas que se inclúen a continuación, e exixindo idéntico compromiso do persoal, propio ou externo, ao seu servizo:
a) Dar cumprimento ás obrigas establecidas polo RXPD, LOPDGDD e demais disposicións vixentes en materia de protección de datos, en cada momento, adoptando as medidas que resulten necesarias para cumprir as súas previsións e, en particular, para garantir a seguridade e integridade dos datos e a súa protección fronte a alteracións, perdas, tratamentos ou accesos non autorizados, así como a tratar os datos persoais de acordo coas instrucións do responsable do tratamento e só para os fins deste encargo.
b) Non comunicar os datos a terceiros, salvo que se conte coa autorización expresa do responsable do tratamento, ou nos supostos legalmente admisibles. O encargado poderá comunicar os datos a outros encargados do tratamento do mesmo responsable, de acordo coas instrucións deste.
O encargado do tratamento non poderá subcontratar ningún dos servizos que formen parte do obxecto da subvención e que impliquen o tratamento de datos persoais, salvo os traballos auxiliares necesarios para o normal funcionamento dos seus servizos e o persoal docente.
Nestes supostos, o encargado do tratamento deberá respectar as condicións indicadas nos puntos 2 e 4 do artigo 28 do RXPD para recorrer a outro encargado do tratamento.
c) Manter o deber de segredo sobre os datos persoais aos que teña acceso en virtude da presente convocatoria, aínda despois de concluída a execución das actividades subvencionables.
d) Garantir que as persoas autorizadas para o tratamento dos datos persoais se comprometan, de forma expresa e por escrito, a respectar a confidencialidade e a cumprir as medidas de seguridade correspondentes, das cales o encargado lles informará oportunamente.
e) Asistir ao responsable do tratamento na resposta ao exercicio dos dereitos recoñecidos pola lexislación vixente en materia de protección de datos persoais, mediante as medidas técnicas e organizativas apropiadas, para que poida cumprir coa súa obrigación de responder ás referidas solicitudes das persoas interesadas no prazo previsto pola lexislación vixente. Para iso, o encargado facilitaralle ao responsable, ao primeiro requirimento deste, e coa maior brevidade posible, canta información sexa necesaria ou relevante para estes efectos. No caso de que as persoas afectadas solicitasen o exercicio dos seus dereitos ante o encargado do tratamento, este informaraos, a través de calquera medio fidedigno, do procedemento previsto para iso en https://www.xunta.gal/es/exercicio-de-dereitos, e dará traslado, así mesmo, ao responsable, do contido das devanditas solicitudes.
f) Axudar ao responsable do tratamento a garantir o cumprimento das obrigas establecidas nos artigos 32 a 36 do RXPD, tendo en conta a natureza do tratamento e a información á disposición do encargado. En particular, o encargado do tratamento notificará ao responsable de forma inmediata e implementando as medidas de seguridade necesarias, as violacións da seguridade dos datos persoais ao seu cargo das que teña coñecemento, xunto con toda a información relevante para a documentación, e comunicación da incidencia, de ser o caso, á Axencia Española de Protección de Datos, conforme o previsto no artigo 33 do RXPD.
g) Implantar, nos casos que sexa de aplicación, as disposicións contidas no Real decreto 311/2022, do 3 de maio, polo que se regula o Esquema nacional de seguridade (ENS). En todo caso, implantará as medidas de seguridade necesarias para:
• Garantir a confidencialidade, a integridade, a dispoñibilidade e a resiliencia permanente dos sistemas e servizos de tratamento.
• Restaurar a dispoñibilidade e o acceso aos datos persoais rapidamente, en caso de incidencia física ou técnica.
• Verificar, avaliar e valorar, de forma periódica, a eficacia das medidas técnicas e organizativas postas en marcha para garantir a seguridade do tratamento.
• Pseudonimizar e cifrar os datos persoais, se é necesario.
h) Designar, segundo o establecido no artigo 13.5 do devandito Real decreto 311/2022, un punto ou persoa de contacto (POC). O POC de seguridade será o propio responsable de seguridade da organización, unha persoa que forme parte da área de seguridade ou unha persoa que teña comunicación directa con esta ou un departamento ou unidade da organización. O POC contará co apoio dos órganos de dirección, e será quen canalice e supervise tanto o cumprimento dos requisitos de seguridade do servizo que presta ou solución que provexa, como as comunicacións relativas á seguridade da información e a xestión das incidencias para o ámbito do dito servizo. Indicarase, en todo caso, o nome e apelidos ou denominación do POC, o posto ou cargo en caso que sexa unha persoa física, así como o correo electrónico e teléfono de contacto.
i) Poñer á disposición do responsable toda a información necesaria para acreditar o cumprimento das súas obrigas, en particular, certificados de cumprimento da normativa expedidos polas entidades acreditadas ou, de non existir, facilitando a realización das auditorías ou inspeccións que faga o responsable ou outro auditor autorizado.
j) Designar un delegado de protección de datos, se correspondese segundo o previsto no artigo 37 do RXPD e no artigo 34 da LOPDGDD, e comunicarlle a súa identidade e datos de contacto ao responsable, sen prexuízo da preceptiva inscrición na AEPD.
k) Devolver ao responsable do tratamento, unha vez finalice a execución das accións formativas, os datos persoais e, se é o caso, os soportes onde figuren. A devolución suporá o borrado total dos datos existentes nos equipos informáticos utilizados polo encargado e subencargados. Non obstante, de conformidade coa normativa en materia de protección de datos, o encargado poderá conservar unha copia dos datos estritamente necesarios, debidamente bloqueados, mentres se poidan derivar responsabilidades da execución das devanditas accións formativas.
Co fin de dar cumprimento ao deber de información exixido no artigo 13 do RXPD, as entidades beneficiarias informarán as persoas participantes nas accións formativas obxecto da subvención, e sen prexuízo de calquera outra información en materia de protección de datos persoais que sexa necesario proporcionar relativa a actividades ou tratamentos de datos específicos que poidan levarse a cabo no marco da súa xestión, dos seguintes aspectos:
A Consellería de Emprego, Comercio e Emigración, na súa condición de responsable, tratará os datos persoais solicitados para a xestión das accións formativas do Sistema de formación profesional dos graos A, B e C, para as persoas participantes nelas. A base lexitimadora para o tratamento dos devanditos datos persoais, incluíndo, de ser o caso, os datos de categoría especial como os relativos á saúde, será o cumprimento dunha misión realizada en interese público (Lei orgánica 3/2022, do 31 de marzo, de ordenación e integración da formación profesional) fundamentada nun interese público esencial. Os datos poderán ser comunicados a outras administracións públicas de ámbito autonómico e estatal cando sexa estritamente necesario para o exercicio das súas competencias, así como ás entidades e profesionais colaboradores na impartición e a xestión das devanditas accións formativas. As persoas interesadas poderán solicitar ante o responsable do tratamento o acceso, a rectificación, a limitación e a supresión dos seus datos, así como opoñerse ao seu tratamento, a través da sede electrónica da Xunta de Galicia ou nos lugares e nos rexistros establecidos pola normativa reguladora do procedemento administrativo común, segundo se recolle en https://www.xunta.gal/exercicio-de-dereitos. Contacto co delegado/a de protección de datos e información adicional ao respecto na seguinte ligazón: https://www.xunta.gal/informacion-xeral-proteccion-datos
De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as persoas beneficiarias quedan informadas cos datos consignados no modelo normalizado de solicitude, dos aspectos básicos previstos no Regulamento (UE) 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento dos seus datos persoais e á libre circulación destes datos (RXPD), e na Lei orgánica 3/2018, do 5 de decembro, de protección de datos persoais e garantía dos dereitos dixitais.
Artigo 15. Publicidade das subvencións
1. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as entidades beneficiarias quedan informadas da existencia do Rexistro Público de Subvencións e dos aspectos previstos na Lei orgánica 3/2018, do 5 de decembro, de protección de datos persoais e garantía dos dereitos dixitais.
2. Así mesmo, e tal como se recolle no artigo 15.1 da Lei 9/2007, do 13 de xuño, os órganos administrativos concedentes publicarán no Diario Oficial de Galicia as subvencións concedidas, indicando a convocatoria, o programa e o crédito orzamentario ao que se imputan, a persoa beneficiaria, a cantidade concedida e a finalidade ou as finalidades da subvención.
3. Igualmente, publicaranse na páxina web oficial da Consellería de Emprego, Comercio e Emigración nos termos previstos no artigo 17 da Lei 1/2016, do 18 de xaneiro, de transparencia e bo goberno, polo que a presentación da solicitude leva implícita a autorización para o tratamento necesario dos datos das persoas beneficiarias e da súa publicación na citada páxina web.
Artigo 16. Accións formativas
A acción formativa está constituída polo contido específico da especialidade formativa que se vai impartir e polos módulos formativos transversais a que se refire esta orde.
Para os efectos desta orde, entenderase con carácter xenérico como especialidade formativa calquera oferta do Sistema de formación profesional dos graos A, B e C, ou calquera competencia clave, que se vaia impartir nunha acción formativa.
Artigo 17. Módulos formativos transversais
1. En todas as accións formativas subvencionadas ao abeiro da presente orde será obrigatoria a impartición dos módulos transversais establecidos no punto 1 e, de ser o caso, no punto 2, do artigo 30 da orde de bases reguladoras do 13 de agosto de 2024.
A modalidade de impartición do módulo formativo transversal non poderá ser obxecto de modificación con respecto á establecida na resolución de concesión da subvención.
2. A impartición dos módulos formativos transversais requirirá ao alumnado participante a superación dunha proba final de aptitude.
Artigo 18. Modalidade de impartición
1. A formación obxecto de financiamento por esta orde poderá realizarse, de acordo co que para tal efecto estableza e autorice o correspondente programa formativo da especialidade que se vai impartir, nas modalidades presencial ou virtual.
Non serán obxecto de subvención aquelas accións formativas solicitadas polas entidades de formación que incumpran o disposto no parágrafo anterior.
O tipo de modalidade de impartición estará definido pola modalidade en que se imparta o contido específico da especialidade formativa da acción formativa.
2. As accións formativas dirixidas a impartir competencias clave desenvolveranse na modalidade presencial, e non estará permitida a formación a través de aula virtual.
3. Independentemente da modalidade de impartición en que se desenvolva a parte específica da acción formativa, os módulos formativos transversais poderán impartirse na modalidade virtual.
Artigo 19. Persoas destinatarias da formación
As accións formativas obxecto de financiamento dirixiranse ás persoas traballadoras ocupadas.
A consideración de persoa traballadora ocupada virá determinada pola súa situación laboral referida á data de validación da acta de selección polas oficinas de emprego. As persoas traballadoras ocupadas que accedan á situación de desemprego cando se encontren en período formativo poderán seguir participando na acción formativa que están cursando.
Artigo 20. Máximo e mínimo de participantes nas accións formativas
1. O número mínimo de persoas traballadoras ocupadas por acción formativa solicitada para as que as entidades deberán contar cun compromiso de participación previo á presentación da solicitude de subvención será do 30 % dos participantes programados arredondado ao enteiro superior se a primeira cifra decimal é igual ou superior a 5. A entidade, con respecto ao dito compromiso de participación, deberá cumprir coa normativa recollida na LOPD e o RXPD e para iso conservará a documentación acreditativa correspondente no modelo normalizado, que estará á súa disposición en SIFO.
Unha mesma entidade, nunha ou varias solicitudes de subvención, non poderá incluír á mesma persoa candidata como comprometida a participar en varias delas. Non obstante, permitirase a súa inclusión simultánea cando a persoa comprometida figure en accións formativas dos graos A ou B, sempre que estas sexan conducentes ao mesmo módulo ou certificado profesional, respectivamente.
2. O número máximo de participantes en accións formativas que se impartan na modalidade presencial será de 15.
Non poderá iniciarse ningunha acción formativa que non reúna o primeiro día do curso un mínimo de 8 persoas alumnas.
Entre as persoas participantes que inician deberán figurar como asistentes cando menos o 50 %, arredondado ao enteiro superior se a primeira cifra decimal é igual ou superior a 5, das persoas ocupadas que asumiron o compromiso de participar. Da cifra resultante descontaranse as persoas traballadoras comprometidas que causasen baixa por enfermidade ou accidente acreditado, ou como consecuencia de estaren seleccionadas noutra acción formativa, e sempre e cando estes supostos se producisen con posterioridade á presentación da solicitude de subvención.
As accións formativas para impartir na modalidade presencial non poderán desagregarse en grupos.
3. Na formación que se imparta na modalidade virtual o número máximo de participantes por acción formativa será de 30 persoas e o mínimo 15. Para os efectos de cumprir os requisitos de capacidade das actividades presenciais previstas, a acción formativa poderá desagregarse en grupos.
Non poderá iniciarse ningunha acción formativa ou, de ser o caso, ningún grupo, que non reúna os requisitos de capacidade e conte co mínimo de participantes por grupo establecidos no número 2 deste artigo. A acreditación da existencia deste número mínimo de persoas alumnas realizarase polo acceso á plataforma de formación das persoas participantes durante os 5 primeiros días lectivos, que se corresponden cos 5 primeiros días naturais, contados desde a data de inicio da acción formativa.
Se, transcorrido o prazo establecido na convocatoria para que o alumnado acceda á plataforma, o número de persoas alumnas que se conectou é inferior ao número mínimo de participantes exixido, a entidade de formación deberá comunicar tal circunstancia ao órgano competente e a acción formativa entenderase como non iniciada e non poderá continuar a súa impartición, e non xerará dereitos económicos para a entidade.
4. Nas ofertas de grao C, as persoas que estean exentas de realizar o primeiro módulo profesional e figuren incluídas na relación nominal do alumnado seleccionado a que se refire o artigo 19.2.a) da Orde do 13 de agosto de 2024, computarán como participantes da acción formativa.
5. De se produciren baixas no alumnado participante unha vez iniciada a acción formativa, será de aplicación o disposto no artigo 28 da orde de bases reguladoras do 13 de agosto do 2024.
Artigo 21. Límites de aplicación na convocatoria
1. As entidades poderán publicar simultaneamente no buscador de formación Diplos da Consellería de Emprego, Comercio e Emigración, o número máximo de accións formativas por censo que teñan permitido solicitar en aplicación do disposto no punto 2 deste artigo. A publicación en Diplos estará visible durante dous meses ou ata a notificación da resolución de concesión.
Notificada a resolución de concesión de accións formativas para un determinado censo, as entidades poderán solicitar publicar no buscador Diplos novas ofertas formativas a impartir no citado censo sen que se supere o número máximo de accións formativas establecidas no parágrafo anterior.
O número máximo de accións formativas dunha mesma especialidade que poderán publicarse simultaneamente no buscador de formación para un censo concreto será de catro.
2. As entidades poderán incluír nas súas solicitudes ata un máximo de 6 accións formativas por censo. Este número poderá incrementarse ata acadar, cun límite máximo de 10, o número de accións formativas do procedemento TR301X iniciadas polo censo solicitante na última convocatoria finalizada no momento da entrada en vigor desta orde.
Unha vez iniciadas, como mínimo, o 40 % das accións formativas concedidas arredondado ao enteiro superior se a primeira cifra decimal é igual ou superior a 5, a persoa beneficiaria poderá presentar unha nova solicitude de subvención.
Por cada censo poderán presentarse unha ou varias solicitudes respectando o número máximo de accións formativas.
3. Sen prexuízo do disposto no artigo 23.2 da Orde de bases reguladoras do 13 de agosto de 2024 respecto ao incumprimento do prazo establecido para o inicio das accións formativas, as renuncias a impartir unha acción formativa subvencionada que teñan a consideración de non xustificadas darán lugar á perda, durante un período de seis meses contados desde a data de notificación da resolución de consideración da renuncia como non xustificada, do dereito da entidade beneficiaria a obter unha nova subvención para o financiamento de accións formativas reguladas por esta orde.
4. Poderán ser obxecto de subvención aquelas especialidades formativas que se determinen no anexo III desta convocatoria, así como os módulos formativos transversais que se impartan asociados a estas. Serán igualmente subvencionables todos os graos A e B contidos dentro dos graos C do citado anexo, así como as competencias clave.
5. Unha mesma entidade de formación non poderá ser beneficiaria dunha subvención, entendida como o sumatorio de todas as subvencións que lle foron concedidas na convocatoria, que supere o 25 % do crédito orzamentario total da convocatoria, calculado con base na aplicación orzamentaria que lle corresponda.
6. De acordo co disposto no artigo 16.2 da Orde de bases reguladoras do 13 de agosto de 2024, o prazo para resolver e notificar a resolución da Administración será dun mes contado desde a data de presentación da solicitude de subvención.
Transcorrido o prazo dun mes para resolver sen que se notifique resolución expresa, entenderase desestimada a solicitude, de acordo co establecido no artigo 23.5 da Lei 9/2007, do 13 de xuño, de subvencións de Galicia, e co disposto no artigo 25 da Lei 39/2015, do 1 de outubro, do procedemento administrativo común das administracións públicas.
7. En aplicación do disposto no artigo 210 do Real decreto 659/2023, do 18 de xullo, non será compatible a condición de centro asociado beneficiario, coa participación en convocatorias de outorgamento de subvencións destinadas ao desenvolvemento de accións formativas, destinadas a centros e entidades autorizados e non catalogados como centros asociados, naquelas especialidades ou familias profesionais comprendidas na súa condición de centro asociado.
A condición de centro asociado beneficiario requirirá da existencia dunha relación contractual ou convenio formalizado e da asignación dunha consignación orzamentaria para impartir accións formativas do Sistema de formación profesional.
Caso de que o centro asociado xa sexa, no momento de adquirir esta condición, beneficiario dunha subvención ou adxudicatario dunha licitación para impartir accións formativas do Sistema de formación profesional, deberá renunciar a impartir aquelas especialidades incluídas na súa condición de centro asociado cuxa realización aínda non comezase. Esta renuncia terá a consideración de xustificada.
Artigo 22. Prazos de execución das accións formativas
As accións formativas deberán comezar no prazo máximo de dous meses contados desde a data de notificación da resolución de concesión, e requirirán a validación previa do persoal técnico da unidade administrativa competente, a través da aplicación informática SIFO.
A data límite para o remate das accións formativas desta terceira convocatoria será o 29 de novembro de 2026.
Artigo 23. Prazos de xustificación das accións formativas
A xustificación das accións formativas do expediente deberá realizarse a través da aplicación informática SIFO, nos prazos establecidos no artigo 37.2 da Orde de bases reguladoras do 13 de agosto de 2024 e coa data límite para a presentación da xustificación final do 12 de decembro de 2026.
Artigo 24. Anexos
Son anexos desta orde os seguintes:
• Anexo I: modelo de solicitude.
• Anexo II: ficha da acción formativa.
• Anexo III: oferta de graos C e competencias clave subvencionables ao abeiro desta convocatoria, con indicación do importe dos módulos económicos por hora e alumna/o, e da obriga, de ser o caso, de impartir o módulo transversal de prevención de riscos laborais
Disposición adicional primeira. Resolucións adicionais
Poderán ditarse resolucións adicionais cando existan fondos provenientes de renuncias de subvencións inicialmente concedidas, da asignación ou redistribución de fondos ou de incrementos das cantidades asignadas á comunidade autónoma pola Administración do Estado.
Disposición adicional segunda. Modificación da resolución en caso de alteración das condicións
Toda alteración das condicións tidas en conta para a concesión da subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, estatais, da Unión Europea, ou internacionais, poderá dar lugar á modificación ou revogación da resolución de concesión e o reintegro da subvención percibida.
Disposición adicional terceira. Delegación de atribucións
Apróbase a delegación de atribucións da persoa titular da Consellería de Emprego, Comercio e Emigración na persoa titular da Dirección Xeral de Formación e Cualificación para o Emprego para resolver a concesión, a denegación, a modificación e o reintegro das subvencións, así como para a autorización, a disposición, o recoñecemento da obriga e a proposta de pagamento ou outras incidencias das subvencións reguladas nesta orde.
Disposición adicional cuarta. Normativa de aplicación supletoria
En todo o non disposto nesta orde será de aplicación o establecido na Lei 9/2007, do 13 de xuño, de subvencións de Galicia; no Decreto 11/2009, do 8 de xaneiro, polo que se aproba o Regulamento da Lei 9/2007; na Lei 38/2003, do 17 de novembro, xeral de subvencións, no que sexa de aplicación, e no Real decreto 887/2006, do 21 de xullo, que a desenvolve.
Así mesmo, será de aplicación o establecido na Lei orgánica 3/2022, do 31 de marzo, de ordenación e integración da formación profesional; no Real decreto 659/2023, do 18 de xullo, que a desenvolve, e no Real decreto 658/2024, do 9 de xullo, polo que se modifica o Real decreto 132/2010, do 12 de febreiro, e o Real decreto 659/2023, do 18 de xullo. Será tamén de aplicación a Orde EFP/942/2022, do 23 de setembro, pola que se regula a oferta formativa do Sistema de formación profesional no ámbito laboral asociada ao Catálogo nacional de cualificacións profesionais efectuada polas administracións competentes, se establecen as bases reguladoras, así como as condicións para o seu financiamento.
Disposición adicional quinta. Información sobre a xestión de subvencións
1. En cumprimento do disposto no artigo 20 da Lei 38/2003, do 17 de novembro, xeral de subvencións, o texto desta convocatoria pública efectuada no marco das bases e a información requirida no ordinal oitavo do devandito artigo será comunicado á Base de datos nacional de subvencións (BDNS), nos termos do Real decreto 130/2019, do 8 de marzo, polo que se regula a Base de datos nacional de subvencións e a publicidade das subvencións e demais axudas públicas.
A BDNS dará traslado ao Diario Oficial de Galicia do extracto da correspondente convocatoria para a súa publicación.
2. De acordo co establecido no artigo 14, letra ñ), da Lei 9/2007, do 13 de xuño, de subvencións de Galicia, as entidades beneficiarias quedan informadas da existencia do Rexistro Público de Subvencións e dos aspectos previstos na Lei orgánica 3/2018, do 5 de decembro, de protección de datos persoais e garantía dos dereitos dixitais.
Disposición derradeira primeira. Autorización para ditar resolucións e instrucións
Autorízase á persoa titular da Dirección Xeral de Formación e Cualificación para o Emprego para ditar, no ámbito das súas competencias, as resolucións e instrucións necesarias para o desenvolvemento e execución desta disposición.
Disposición derradeira segunda. Entrada en vigor
Esta orde entrará en vigor aos 5 días hábiles da súa publicación no Diario Oficial de Galicia.
Santiago de Compostela, 23 de decembro de 2025
José González Vázquez
Conselleiro de Emprego, Comercio e Emigración
