BDNS (Identif.): 884409.

De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións:

https://www.infosubvenciones.es/bdnstrans/GE/es/convocatoria/884409

Primeiro. Obxecto e ámbito de aplicación

1. Esta Orde ten como obxecto convocar e regular o procedemento de solicitude e concesión de axudas, en réxime de concorrencia competitiva, a centros docentes privados concertados da Comunidade Autónoma de Galicia para participar no programa de inmersión lingüística activa en lingua inglesa, Spring Week, durante o curso 2025/26 (código de procedemento ED531F).

2. O procedemento de concesión destas axudas tramitarase en réxime de concorrencia competitiva.

Segundo. Destinatarios

Poderán ser beneficiarios das axudas establecidas nesta orde os centros docentes privados, que teñan concerto educativo vixente coa Consellería de Educación, Ciencia, Universidades e Formación Profesional, nos cales se imparta 6º de educación primaria e/ou de 1º e 2º de educación secundaria obrigatoria durante o curso 2025/26, cuxas titularidades, persoas físicas ou xurídicas cumpran os requisitos establecidos no artigo 10 da Lei 9/2007, do 13 de xuño, de subvencións de Galicia (DOG núm. 121, do 25 de xuño). Cada centro poderá participar cun máximo de 25 alumnos e/ou alumnas, do mesmo nivel educativo.

Non poderán ter a condición de centros beneficiarios das axudas previstas nesta orde os centros privados concertados en que se dea algunha das circunstancias previstas no artigo 10.2 e 3 da Lei 9/2007, do 13 de xuño, de subvencións de Galicia.

Terceiro. Bases reguladoras

Orde do 13 de xaneiro de 2026, pola que se regula o réxime de axudas a centros docentes privados concertados da Comunidade Autónoma de Galicia para participar no programa de inmersión lingüística activa en lingua inglesa, Spring Week, dirixido ao alumnado de sexto curso de educación primaria e de educación secundaria obrigatoria durante o curso 2025/26 (código de procedemento ED531F).

Cuarto. Financiamento e contía das axudas

1. A contía das axudas a que se refire esta orde aboarase directamente á empresa que resulte adxudicataria da licitación pública convocada para tal efecto e será financiada con cargo á partida orzamentaria 07.03.423A.780.3 por un importe máximo de 166.000,00 € con cargo ao orzamento de 2025.

Número de prazas: 400.

Número de prazas máxima por centro: 25.

Prezo máximo de cada praza: 400 €.

Centros	Quenda	Datas 2026	Cursos	Alumnado
Centros privados concertados	1ª quenda	Do 24 ao 30 de maio	1º e 2º de ESO	125
	2ª quenda	Do 31 de maio ao 6 de xuño	1º de ESO	125
	3ª quenda	Do 7 ao 13 de xuño	6º educación primaria	150
Total				400

2. O custo total de cada actividade inclúe:

a) Os monitores ou monitoras que acompañarán o alumnado en cada un dos grupos durante a actividade.

b) Os gastos de docencia e o material escolar.

c) As actividades culturais, deportivas e complementarias dos cursos.

d) Os gastos de mantenza e aloxamento do alumnado e do profesorado acompañante.

e) Certificado de realización da actividade.

f) Seguro de accidentes e de responsabilidade civil.

Quinto. Prazo de presentación de solicitudes

O prazo de presentación de solicitudes será de un mes, contado a partir do día seguinte ao da publicación desta orde no Diario Oficial de Galicia. Entenderase como último día do prazo o correspondente ao mesmo ordinal do día da publicación. Se o último día de prazo for inhábil entenderase prorrogado ao primeiro día hábil seguinte, e se no mes do vencemento non houber día equivalente ao inicial do cómputo, entenderase que o prazo remata o último do mes.

Santiago de Compostela, 13 de xaneiro de 2026

O conselleiro de Educación, Ciencia, Universidades e Formación Profesional
P.D. (Orde do 5.6.2024; DOG núm.114, do 13 de xuño)
Manuel Vila López
Secretario xeral técnico da Consellería de Educación, Ciencia,
Universidades e Formación Profesional