A Instrución da Xerencia 9/2025, do 19 de decembro, sobre calendario laboral, vacacións e días de libre disposición para o ano 2026 do persoal de administración e servizos da Universidade de Vigo, establece na base 7, punto 1: «Na procura de avanzar no compromiso da Universidade de Vigo e do seu persoal coa sustentabilidade e o cambio climático, con base nos obxectivos de optimización dos recursos que permitan un aforro enerxético e económico, pecharanse todos os centros, dependencias e instalacións da Universidade de Vigo nos seguintes períodos do ano 2026:

a) Entre o 30 de marzo e o 1 de abril, ambos os dous incluídos (…).

b) Entre o 3 e o 14 de agosto, ambos os dous incluídos (…)».

O punto 2 da antedita base prevé: «Nestes períodos, a Xerencia poderá acordar cos órganos de representación do PTXAS outro horario de apertura, a alteración dos períodos ou a continuidade dalgúns servizos e actividades».

Co obxecto de facilitar o cumprimento dos prazos establecidos nos correspondentes procedementos administrativos, de conformidade co disposto nos artigos 30 e 31 da Lei 39/2015, do 1 de outubro, do procedemento administrativo común das administracións públicas (LPACAP), e os prazos de calquera outro procedemento de xestión interna dos servizos administrativos da universidade, tendo en conta que aqueles prazos establecidos por normas autonómicas, estatais ou da Unión Europea non poden ser modificados, alterados e/ou interrompidos por esta universidade.

Tendo en consideración as necesidades organizativas e o cumprimento dos compromisos asumidos pola Universidade de Vigo no relativo aos prazos estipulados na Lei 9/2017, do 8 de novembro, de contratos del sector público, pola que se traspoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro, na tramitación de expedientes de contratación,

Esta reitoría, en uso das competencias que lle confire a Lei orgánica 2/2023, do 22 de marzo, do Sistema universitario, e os Estatutos da Universidade de Vigo, aprobados polo Decreto 13/2019, do 24 de xaneiro (DOG do 22 de febreiro),

RESOLVE:

Primeiro. Declarar inhábiles, para os efectos do cómputo dos prazos correspondentes a procedementos incoados cuxa resolución lle corresponda á Universidade de Vigo, tanto para presentar solicitudes como para realizar trámites ou resolver e notificar o acto de que se trate, os seguintes períodos:

1. Entre o 30 de marzo e o 1 de abril do 2026, ambos os dous incluídos.

2. Entre o 3 e o 14 de agosto do 2026, ambos os dous incluídos.

Segundo. Durante este período, a tramitación administrativa que deba realizarse en prazos regulados en procedementos que se xestionen internamente nesta universidade quedará interrompida no seu cómputo, tanto para os efectos de solicitudes entre órganos como de tramitación, resolución e notificación entre estes. O dito cómputo reiniciarase ao finalizar este, sen que isto poida vulnerar os dereitos das persoas interesadas.

Terceiro. A devandita interrupción de prazos non atinxe aos determinados como prazos de iniciación ou resolución de procedementos en normas con rango de lei ou de regulamento de ámbito estatal ou autonómico.

Cuarto. Dado que as oficinas de asistencia en materia de rexistro da Universidade de Vigo permanecerán pechadas os días citados, os documentos que as persoas interesadas dirixan á Universidade de Vigo nese período poderán presentarse por medio da sede electrónica da Universidade de Vigo (https://sede.uvigo.gal/ ) ou as restantes formas previstas no artigo 16.4 da LPACAP.

Quinto. Declarar hábiles unicamente para os efectos de presentación de ofertas nos expedientes de contratación que estean en fase de licitación nos períodos indicados no punto primeiro, do 30 de marzo ao 1 de abril e do 3 ao 14 de agosto do 2026.

Contra esta resolución, que esgota a vía administrativa, poderase interpor recurso ante a xurisdición contencioso-administrativa no prazo de dous meses, contados desde o día seguinte ao da súa publicación, de conformidade co disposto na Lei 29/1998, do 13 de xullo, reguladora da xurisdición contencioso-administrativa.

Non obstante, as persoas interesadas poderán optar por interpor contra esta resolución un recurso de reposición no prazo dun mes, contado a partir do día seguinte ao da súa publicación, ante o mesmo órgano que a ditou. Neste caso non se poderá interpor un recurso contencioso-administrativo ata que sexa resolto expresamente ou se produza a desestimación presunta do recurso de reposición interposto, segundo o previsto no artigo 123.2 da Lei 39/2015, do 1 de outubro, do procedemento administrativo común das administracións públicas.

Vigo, 30 de xaneiro de 2026

Manuel Joaquín Reigosa Roger
Reitor da Universidade de Vigo