Expediente: IN407A 2024/347-4.

Promotora: UFD Distribución Electricidad, S.A.

Denominación: LMT CII818-CII819 e CT para peche polígono de Castiñeiras-Bueu.

Concellos: Bueu e Cangas.

Feitos:

1. O 12.11.2024, a empresa UFD Distribución Electricidad, S.A., solicitou a autorización administrativa previa e a autorización administrativa de construción da instalación eléctrica denominada LMT CII818-CII819 e CT para peche polígono de Castiñeiras-Bueu.

A solicitude inclúe o proxecto de execución asinado polo enxeñeiro eléctrico Fabián Fernández Martínez, colexiado 4783 do Colexio Oficial de Enxeñeiros Técnicos Industriais de Vigo, e contén un orzamento total de 429.810,31 euros.

Examinado o proxecto de execución, conclúese que ten como finalidade crear un peche entre as liñas de media tensión CII818 e CII819 mediante as seguintes actuacións no lugar da Portela e no parque empresarial Castiñeiras, nos concellos de Bueu e Cangas (Pontevedra):

– Proxéctase a instalación dun novo centro de transformación de 630 kVA de tipo manobra interior, 5L1P, que substitúe o centro de transformación Polígono 1 (36CDD0). Estará situado no parque empresarial Castiñeiras e conectarase cos centros de transformación particulares Complexo Ambiental (36PGZ4) e Conservas Alonso (36PDU4).

– Desmontaxe de 497 metros de lonxitude do tramo de liña de media tensión aérea CII818 (Bueu 18) en condutor LA-56 entre os apoios existentes 9T5BXQB5//12 e 9ST39G7J//12-4, así como 8 metros da derivación ao apoio 9SVSRRL8//12-2-1 que alimenta a liña particular do CT 36PGZ4. Ademais retíranse tres apoios CH-1000/13, un seccionador de expulsión (XS) e un reconectador telecontrolado.

– Desmontaxe de 84 metros de liña de media tensión subterránea entre o apoio 9ST39G7J//12-4 e o centro de transformación Polígono 1 (36CDD0).

– Instalación dunha liña de media tensión subterránea en tres actuacións.

2. Este departamento territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Bueu, o Concello de Cangas, a Deputación Provincial de Pontevedra, a Axencia Galega de Infraestruturas, o Servizo do Patrimonio Cultural e Enagás Transporte, S.A.U. A empresa promotora manifestou a súa conformidade cos condicionados emitidos polo Concello de Bueu, polo Servizo do Patrimonio Cultural e por Enagás Transporte, S.A.U.

Os demais organismos non emitiron os condicionados técnicos, así como a Axencia Galega de Infraestruturas que non emitiu novo condicionado tras as aclaracións presentadas polo promotor, entendéndose en consecuencia a súa conformidade coa autorización de construción da dita infraestrutura eléctrica, conforme o disposto no artigo 131 do Real decreto 1955/2000, do 1 de decembro; sen prexuízo da autorización que lles corresponda outorgar.

Consideracións legais e técnicas:

1. O Departamento Territorial de Pontevedra é competente para resolver este expediente con fundamento no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27 de maio), e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

2. A lexislación de aplicación ao presente expediente é:

– Lei 24/2013, do 26 de decembro, do sector eléctrico.

– Lei 39/2015, do 1 de outubro, do procedemento administrativo común das administracións públicas.

– Lei 40/2015, do 1 de outubro, de réxime xurídico do sector público.

– Lei 9/2021, do 25 de febreiro, de simplificación administrativa e de apoio á reactivación económica de Galicia.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

3. As características técnicas da instalación son as que a seguir se describen:

– Liña de media tensión subterránea (LMTS) a 20 kV, con condutor RHZ1-2OL 12/20 kV 1×240 mm2 Al, en tres actuacións:

• CII819: 1.160 metros de lonxitude, coa orixe no paso aéreo subterráneo proxectado no apoio existente 9T9L5LQD//4 e final no empalme coa liña CII818 na arqueta proxectada fronte ao apoio 9ST39G7J//12-4.

• CII819: 1.114 metros de lonxitude, coa orixe no empalme coa liña CII819 na arqueta proxectada no P.q. 0+000 da EP-1303 (Bueu-Castiñeiras) e final no centro de transformación proxectado.

• CII819: 1.114 metros de lonxitude, coa orixe no centro de transformación proxectado e final no empalme coa liña CII819 na arqueta proxectada no P.q. 0+000 da EP-1303 (Bueu-Castiñeiras).

– Centro de transformación telecontrolado, 5L1P, a 630 kVA, con relación de transformación 20 kV/400 V, situado na parcela con referencia catastral 7439043NG1874S0001YK, no parque empresarial Castiñeiras.

A instalación está situada na Portela e no parque empresarial de Castiñeiras, nos concellos de Bueu e Cangas (Pontevedra).

Conforme o indicado,

Resolvo:

Outorgar á empresa UFD Distribución Electricidad, S.A., as autorizacións administrativas previa e de construción da instalación de distribución de enerxía eléctrica denominada LMT CII818-CII819 e CT para peche polígono de Castiñeiras-Bueu, expediente IN407A 2024/347-4.

Estas autorizacións outórganse sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada e de acordo coas seguintes condicións:

1. As características da instalación axustaranse en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e aos condicionados técnicos impostos polas administracións públicas, organismos ou empresas que presten servizos públicos ou de interese económico xeral, no relativo aos bens e dereitos da súa propiedade que se atopen afectados pola instalación, en especial os relativos ás distancias de seguridade, cruzamentos e paralelismos prescritos pola normativa vixente.

2. A empresa promotora asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade.

3. En todo momento se deberán cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

4. O prazo para a posta en marcha das instalacións que se autorizan será de doce meses, contados a partir da data da última autorización administrativa necesaria para a execución. En todo caso, deberán respectarse os prazos establecidos no artigo 13.9 do Regulamento (UE) 2024/573 do Parlamento Europeo e do Consello, do 7 de febreiro, sobre os gases fluorados de efecto invernadoiro, polo que se modifica a Directiva (UE) 2019/1937 e se derroga o Regulamento (UE) 517/2014 (DOUE núm. 573, do 20 de febreiro), sobre prohibicións para a posta en funcionamento de aparellaxe eléctrica que empregue gases fluorados de efecto invernadoiro ou cuxo funcionamento dependa deles, nun medio illante ou de rotura.

Unha vez constituídas estas instalacións, a empresa promotora deberá presentar a solicitude de autorización de explotación ante este departamento territorial acompañada da seguinte documentación:

– As declaracións de conformidade relativas ao material ou equipamento, e as certificacións ou homologacións, se procede.

– Un certificado dirección final de obra en que se garantirá o cumprimento das especificacións do proxecto e prescricións complementarias, se as houber, así como das regulamentacións e normas axeitadas para a montaxe da instalación e posta a punto.

– Planimetría as built da instalación eléctrica en formato shape.

O incumprimento das condicións e requisitos establecidos nesta resolución poderá dar lugar á súa revogación, logo da audiencia á promotora, de conformidade co disposto no artigo 53.10 da Lei 24/2013, do 26 de decembro.

Contra esta resolución, que non é definitiva en vía administrativa, poderase interpoñer recurso de alzada ante a conselleira de Economía e Industria da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que as persoas interesadas poidan interpoñer calquera outro recurso que consideren pertinente.

Pontevedra, 5 de xaneiro de 2026

Beatriz López del Olmo
Directora territorial de Pontevedra