A Lei orgánica 3/2020, do 29 de decembro, pola que se modifica a Lei orgánica 2/2006, do 3 de maio, de educación, modifica os artigos 134 e 135 da Lei orgánica 2/2006, do 3 de maio, de educación, relativos á selección da dirección dos centros docentes públicos que imparten as ensinanzas reguladas nesta lei, os requisitos para ser persoas candidatas á dirección e o procedemento de selección. No artigo 134.1.c) establécese que as administracións educativas poderán considerar como requisito a formación a que se refire o punto 6 do artigo 135, opción que se recolle nesta orde.

No artigo 133 establécese que a selección e o nomeamento das direccións nos centros públicos se efectuarán mediante concurso de méritos entre o persoal docente de carreira que imparta algunha das ensinanzas encomendadas ao centro e que se realizará de conformidade cos principios de igualdade, publicidade, mérito e capacidade.

A selección, o nomeamento e o cesamento dos directores e directoras dos centros docentes públicos que imparten as ensinanzas reguladas na Lei orgánica 2/2006, do 3 de maio, de educación, establécense no Decreto 222/2022, do 7 de decembro (DOG núm. 7, do 11 de xaneiro de 2023), que derroga o Decreto 29/2007.

Procede convocar concurso de méritos para seleccionar as direccións dos centros que rematan o seu mandato no actual curso académico 2025/26 e non solicitaron a correspondente prórroga e aquelas direccións que rematan o seu mandato de carácter extraordinario ou accidental.

Na súa virtude, a Consellería de Educación, Ciencia, Universidades e Formación Profesional

ACORDA:

Artigo 1. Convocatoria

Convócase concurso de méritos para seleccionar e nomear as direccións dos centros docentes públicos onde se imparten ensinanzas reguladas na Lei orgánica 2/2006, do 3 de maio, de educación, que se relacionan no anexo I desta orde.

A selección realizarase de conformidade cos principios de igualdade, publicidade, mérito e capacidade.

Artigo 2. Requisitos para ser persoa candidata á dirección

2.1. Para participar neste concurso de méritos para ser nomeada/o directora ou director dun centro docente público dependente da Consellería de Educación, Ciencia, Universidades e Formación Profesional deberán reunirse os seguintes requisitos:

a) Ser persoal funcionario de carreira dun corpo docente a que se refire a Lei orgánica 2/2006, do 3 de maio, de educación, incluído o corpo a extinguir de profesores técnicos de formación profesional.

b) Ter unha antigüidade de polo menos cinco anos como persoal funcionario na función pública docente, con nomeamento nun dos corpos a que se fai referencia no parágrafo anterior.

c) Ter exercido funcións docentes como persoal funcionario durante un período de polo menos cinco anos nalgunha das ensinanzas das que ofrece o centro a que se opta. Para estes efectos, considéranse as mesmas ensinanzas a educación infantil e a educación primaria.

d) Estar prestando servizos nun centro educativo dependente da Consellería de Educación, Ciencia, Universidades e Formación Profesional e depender organicamente desta. Tamén poderán presentarse aquelas persoas en situación de servizos especiais, excedencia por coidado de familiares ou en excedencia voluntaria, sempre que se estivese nunha destas situacións por resolución da Consellería de Educación, Ciencia, Universidades e Formación Profesional e que o 1 de xullo de 2026 se reúnan os requisitos para reingresar no servizo activo.

e) Posuír unha certificación acreditativa de ter superado un curso de formación sobre competencias para o desenvolvemento da función directiva, impartido pola Consellería de Educación, Ciencia, Universidades e Formación Profesional, polo Ministerio de Educación, Formación Profesional e Deportes ou polas administracións educativas das restantes comunidades autónomas con validez en todo o territorio nacional.

Será, así mesmo, válida a superación dos cursos organizados por persoas físicas ou xurídicas determinadas por unha Administración educativa, sempre que conste expresamente que foron autorizados para os efectos establecidos no artigo 135.6 da Lei orgánica 2/2006, do 3 de maio, de educación.

Estarán exentas de acreditar a superación deste programa de formación sobre o desenvolvemento da función directiva as persoas que acrediten unha experiencia de polo menos catro anos no exercicio da dirección de centros docentes públicos con avaliación positiva do seu traballo.

f) Presentar un proxecto de dirección nos termos previstos no artigo seguinte.

2.2. Para participar no concurso de méritos para ser nomeada ou nomeado directora ou director dun centro público específico de educación infantil, dun centro incompleto de educación primaria, nos centros de educación secundaria con menos de oito unidades, nos centros en que se imparten ensinanzas artísticas profesionais, deportivas, de idiomas ou nos centros específicos de adultos con menos de oito profesores, non se exixirán os requisitos establecidos nas letras b), c) e e) do punto 2.1 deste artigo.

2.3. Todos os requisitos enumerados anteriormente deberán posuírse e ser acreditados na data en que remate o prazo de presentación de solicitudes.

2.4. O persoal funcionario de carreira do corpo de mestres que preste servizo nos centros que imparten ensino secundario obrigatorio poderá optar á dirección dos centros docentes en que se imparte o dito nivel educativo, sempre que cumpra os requisitos sinalados nos puntos anteriores.

Así mesmo, de conformidade co establecido no punto 2 da disposición adicional cuarta do Real decreto 1594/2011, do 4 de novembro, poderá presentarse o persoal docente do corpo de mestres das especialidades de Pedagoxía Terapéutica e Audición e Linguaxe que desempeñase funcións de atención á diversidade na educación secundaria durante, polo menos, cinco anos, e reúna os restantes requisitos sinalados nos puntos anteriores.

Artigo 3. Solicitudes e documentación

3.1. A solicitude de participación no concurso de méritos dirixirase ao departamento territorial da Consellería de Educación, Ciencia, Universidades e Formación Profesional da provincia correspondente, e poderase descargar unha vez cubertos os datos de participación no concurso a través do enderezo web https://www.edu.xunta.gal/cxt (anexo III).

Xunto coa solicitude achegarase, ademais:

a) Documentación acreditativa dos méritos académicos e profesionais alegados en relación co baremo que se publica como anexo II desta orde, agás aqueles que xa consten na base de datos de persoal.

b) Documentación acreditativa de ter superado o curso de formación, ou o curso de actualización, sobre o desenvolvemento da función directiva, agás que xa conste na base de datos de persoal.

c) O proxecto de dirección que inclúa, polo menos, unha presentación e fundamentación do proxecto, os obxectivos, os plans e as liñas de actuación e a avaliación deste. O proxecto de dirección deberá estar orientado a lograr o éxito escolar de todo o alumnado e deberá incluír, entre outros, contidos en materia de igualdade entre mulleres e homes, non discriminación e prevención da violencia de xénero. De solicitarse máis dun centro, deberá presentarse un proxecto específico de dirección para cada centro.

O proxecto de dirección non excederá as 30 páxinas DIN A4, sen contar portada e contraportada, nun tipo de letra: Arial ou Xunta Sans, tamaño de letra: 12, espazo entre liñas: 1,5.

3.2. Efectuarase unha solicitude por cada centro que se demande ata un máximo de dúas.

3.3. Así mesmo, o persoal participante no concurso de méritos remitirá ao centro ou centros docentes que solicite unha copia do seu proxecto de dirección. Este proxecto estará á disposición das persoas membros do Claustro de profesores e do Consello Escolar na secretaría do centro, durante un período mínimo de 10 días lectivos, no horario que estableza a dirección do centro.

No taboleiro de anuncios do centro exporase unha relación das candidaturas presentadas, así como o prazo e o horario en que poderán verse os proxectos de dirección na secretaría.

3.4. A solicitude de participación xerada previamente na páxina web https://www.edu.xunta.gal/cxt, xunto coa documentación a que se alude no punto 3.1, presentarase obrigatoriamente por medios electrónicos na sede electrónica da Xunta de Galicia https://sede.xunta.gal, mediante a solicitude xenérica dispoñible na sede electrónica (código de procedemento PR004A) e dirixirase ao departamento territorial da Consellería de Educación, Ciencia, Universidades e Formación Profesional da provincia correspondente. Cómpre sinalar que para acceder a este servizo é preciso dispor dun certificado electrónico ou Chave365.

No suposto de participar no concurso a dous centros, presentarase unha solicitude por cada un deles.

De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude de xeito presencial, será requirida para que a emende a través da súa presentación electrónica. Para estes efectos, considerarase como data de presentación da solicitude aquela en que sexa realizada a emenda.

Para a presentación electrónica poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave 365 (https://sede.xunta.gal/chave365).

3.5. As persoas aspirantes serán responsables da veracidade da documentación achegada e, conforme se indica no formulario da solicitude, declararán que esa documentación é copia fiel dos orixinais que figuran no seu poder, sen prexuízo da posibilidade por parte da Administración de lles requirir en calquera momento a documentación orixinal. No caso de inexactitude, falsidade ou omisión en calquera dato ou documento achegado, isto comportará a perda do dereito á participación neste proceso, con independencia das responsabilidades que procedan, conforme dispón o artigo 69.4 da Lei 39/2015, do 1 de outubro, do procedemento administrativo común das administracións públicas.

3.6. Unicamente se terán en conta aqueles méritos debidamente xustificados dentro do prazo de presentación de solicitudes, sen prexuízo do establecido no artigo 4.2 desta orde.

Os méritos achegados para a súa valoración deberán posuírse na data en que remate o prazo de presentación de solicitudes.

Artigo 4. Prazo de presentación de solicitudes e emenda

4.1. O prazo de presentación de solicitudes e documentación será de quince (15) días hábiles contados a partir do día seguinte ao da publicación desta orde no Diario Oficial de Galicia.

4.2. Agás a presentación do proxecto de dirección, se a restante documentación achegada non reúne os requisitos exixidos na presente orde, a Comisión de Selección requirirá a persoa interesada para que emende a falta ou achegue os documentos preceptivos no prazo de dez (10) días hábiles desde a súa notificación, coa indicación de que, se así non o fixer, non lle serán tidos en conta ou, de ser o caso, se declarará a desistencia.

Artigo 5. Comisión de Selección

5.1. En cada centro educativo constituirase unha Comisión de Selección, nomeada pola persoa titular do departamento territorial da Consellería de Educación, Ciencia, Universidades e Formación Profesional, que terá como sede a localidade e local que decida a súa presidencia e que terá a seguinte composición:

a) Dúas persoas pertencentes ao corpo de Inspección Educativa, designadas pola persoa titular do departamento territorial da Consellería de Educación, Ciencia, Universidades e Formación Profesional, unha das cales exercerá a presidencia da Comisión.

b) Un director ou directora en activo en centros que impartan as mesmas ensinanzas que aquel no cal se desenvolve o procedemento de selección, con un ou máis períodos de exercicio con avaliación positiva do traballo desenvolvido, designado/a pola persoa titular do departamento territorial da Consellería de Educación, Ciencia, Universidades e Formación Profesional.

c) Tres profesores do centro elixidos polo Claustro de profesores, de entre os cales se designará o secretario da Comisión. No caso de producirse empate no número de votos, repetirase unha vez a votación e, de persistir o empate, dirimirase por sorteo.

d) Tres membros non docentes do Consello Escolar elixidos polo propio Consello Escolar. No caso de producirse empate no número de votos, repetirase unha vez a votación e, de persistir o empate, dirimirase por sorteo.

5.2. Os alumnos e alumnas que, se é o caso, sexan nomeados como representantes do Consello Escolar terán que estar matriculados nun curso non inferior a terceiro de educación secundaria obrigatoria.

5.3. En ningún caso poderán formar parte da Comisión de Selección as persoas candidatas á dirección.

5.4. Designarase unha persoa suplente de cada persoa integrante da Comisión de Selección en cada un dos ámbitos de representación, que actuará en substitución da persoa titular cando exista unha causa xustificada que impida a actuación desta.

5.5. Ás persoas integrantes da Comisión de Selección seranlles de aplicación as normas sobre abstención e recusación previstas nos artigos 23 e 24 da Lei 40/2015, do 1 de outubro, de réxime xurídico do sector público.

5.6. A Dirección do centro comunicará para o seu nomeamento as persoas representantes do Claustro de profesores e do Consello Escolar na Comisión de Selección ao departamento territorial da Consellería de Educación, Ciencia, Universidades e Formación Profesional, no prazo dos cinco (5) días hábiles seguintes ao de remate do prazo de presentación de solicitudes establecido no artigo 4 desta orde, sen que se teñan en consideración posibles ampliacións deste.

5.7. A non elección das persoas representantes do Claustro de profesores e do Consello Escolar non impedirá a constitución e o normal funcionamento da Comisión de Selección.

5.8. A composición da Comisión de Selección publicarase no taboleiro de anuncios do centro.

Artigo 6. Composición da Comisión de Selección en determinados supostos

1. Cando o número de profesorado do centro sexa inferior a catro ou o número de candidaturas á dirección non lle permita ao Claustro de profesores elixir tres persoas de entre o profesorado, a composición da Comisión de Selección será a seguinte:

a) Unha persoa pertencente ao corpo de inspección educativa designada pola persoa titular do departamento territorial da Consellería de Educación, Ciencia, Universidades e Formación Profesional, que exercerá a presidencia.

b) Un director ou directora en activo en centros que impartan as mesmas ensinanzas que aquel en que se desenvolve o procedemento de selección, con un ou máis períodos de exercicio con avaliación positiva do traballo desenvolvido, designado pola persoa titular do departamento territorial da consellería competente en materia de educación.

c) Dous profesores do centro elixidos polo Claustro de profesores, de entre os cales se designará o secretario da Comisión.

d) Dous membros non docentes do Consello Escolar elixidos polo propio Consello Escolar.

2. Composición excepcional da Comisión de Selección.

De xeito excepcional, cando non sexa posible nomear a Comisión de Selección de acordo co establecido no punto primeiro deste artigo, por non poder nomear dúas persoas integrantes do profesorado do centro por mor das candidaturas presentadas, a composición será a seguinte:

a) Unha persoa pertencente ao corpo de inspección educativa designada pola persoa titular do departamento territorial da consellería competente en materia de educación, que exercerá a presidencia.

b) Un profesor do centro elixido polo Claustro de profesores, que será o secretario da Comisión.

c) Un membro non docente do Consello Escolar elixido polo propio Consello Escolar.

Artigo 7. Funcións da Comisión de Selección e procedemento de funcionamento

7.1. Recibidas as solicitudes dirixidas ao departamento territorial, a Comisión de Selección comprobará que o persoal aspirante reúne os requisitos establecidos nesta orde e notificaralle ao persoal aspirante a admisión ou exclusión da súa petición.

7.2. Contra a exclusión da solicitude, o persoal aspirante poderá presentar unha reclamación ante a propia comisión seleccionadora, no prazo de cinco (5) días hábiles contados desde o día seguinte ao da notificación do rexeitamento da solicitude.

7.3. A Comisión de Selección valorará os méritos académicos e profesionais de cada persoa aspirante con destino no centro e, se for o caso, das persoas candidatas que non o teñen, de acordo co baremo que se publica como anexo II desta orde.

7.4. A Comisión de Selección valorará, así mesmo, os proxectos de dirección, de acordo co establecido no baremo que se publica no anexo II desta orde, e poderá ter unha entrevista co profesorado que presentou a candidatura, se considera necesario clarificar algúns aspectos do proxecto de dirección. Cando a Comisión de Selección decida a realización desta entrevista, deberá efectuala a todas e cada unha das persoas candidatas.

7.5. A cualificación do proxecto de dirección será a media aritmética das cualificacións de todas as persoas membros presentes da Comisión, que deberán deixar constancia por escrito da cualificación outorgada. Cando entre as puntuacións outorgadas polas persoas membros da Comisión exista unha diferenza de tres ou máis enteiros, serán automaticamente excluídas as cualificacións máxima e mínima, e calcularase a puntuación media entre as cualificacións restantes. No caso de empate entre cualificacións máximas ou mínimas, unicamente será excluída unha delas.

7.6. A Comisión de Selección publicará no taboleiro de anuncios do centro educativo a puntuación provisional das persoas candidatas á dirección. Contra esta puntuación poderá presentarse unha reclamación ante a propia Comisión no prazo de cinco (5) días hábiles computados a partir do día seguinte ao da súa publicación.

7.7. Cada persoa membro da Comisión elaborará un sucinto informe xustificativo da súa cualificación do proxecto de dirección.

Artigo 8. Selección do director ou directora

8.1. Transcorrido o prazo de reclamacións e, se é o caso, resoltas estas, a Comisión de Selección establecerá a puntuación final obtida polo persoal aspirante e seleccionará a persoa candidata que proporá como director ou directora do centro, para o seu nomeamento polo departamento territorial da Consellería de Educación, Ciencia, Universidades e Formación Profesional.

8.2. Para poder ser seleccionada e nomeada para a dirección é necesario obter, polo menos, seis puntos no proxecto de dirección.

8.3. A selección realizarase considerando primeiro as candidaturas do profesorado do centro, que terán preferencia. Na falta de candidaturas do centro ou cando estas non superasen a puntuación mínima no proxecto de dirección, a Comisión valorará as candidaturas do profesorado doutros centros.

8.4. No caso de se produciren empates na puntuación total das persoas aspirantes, estes dirimiranse atendendo sucesivamente aos seguintes criterios:

a) Maior puntuación no proxecto de dirección.

b) Maior puntuación na epígrafe 2 do baremo.

c) Maior puntuación na epígrafe 1 do baremo.

8.5. Se unha persoa candidata resulta seleccionada para dous centros, nomearase no centro en que teña destino definitivo. De non ter destino definitivo en ningún dos centros, será nomeada no centro polo que opte, e seleccionarase e nomearase no centro non elixido outra persoa aspirante que reúna os requisitos con maior puntuación.

Artigo 9. Recursos

Contra a decisión da Comisión de Selección, que resolve definitivamente o concurso de méritos de selección da dirección do centro, poderase interpoñer recurso de alzada, no prazo dun (1) mes, ante o departamento territorial da Consellería de Educación, Ciencia, Universidades e Formación Profesional.

Artigo 10. Nomeamento

10.1. A persoa titular do departamento territorial da Consellería de Educación, Ciencia, Universidades e Formación Profesional nomeará director ou directora do centro a persoa proposta pola Comisión de Selección.

10.2. Os nomeamentos dos directores ou das directoras terán efectos do 1 de xullo de 2026 e por unha duración de catro anos, prorrogables por períodos de igual duración, ata un máximo de tres mandatos, logo de avaliación positiva do traballo desenvolvido ao final destes, oído o Consello Escolar.

10.3. Cando o nomeamento recaia nun funcionario ou funcionaria que non teña destino definitivo no centro, o nomeamento implicará a concesión dunha comisión de servizos.

Artigo 11. Nomeamento con carácter extraordinario

Nos supostos de falta de persoas candidatas, ou cando a comisión correspondente non seleccione ningunha persoa candidata, ou nos centros de nova creación, a dirección será nomeada pola persoa titular do departamento territorial da Consellería de Educación, Ciencia, Universidades e Formación Profesional, oído o Consello Escolar, por un período de dous anos, entre o profesorado que reúna os requisitos establecidos no artigo 2 desta orde, agás as letras e) e f).

A persoa nomeada deberá realizar a formación para o desenvolvemento da función directiva prevista no artigo 2.1.e) desta orde, agás que xa a posúa ou estea exenta da súa realización.

Disposición adicional primeira. Impugnación da orde

Esta orde poderá ser impugnada mediante recurso potestativo de reposición ante a persoa titular da Consellería de Educación, Ciencia, Universidades e Formación Profesional no prazo dun (1) mes contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben directamente mediante un recurso contencioso-administrativo ante o xulgado do contencioso-administrativo que resulte competente, no prazo de dous (2) meses, de acordo co establecido no artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 12 de marzo de 2026

Román Rodríguez González
Conselleiro de Educación, Ciencia,
Universidades e Formación Profesional

ANEXO I

Centros con praza vacante de Dirección para o curso 2026/27

Código	Centro	Concello	Provincia
15025621	EPAPU Eduardo Pondal	A Coruña	A Coruña
15027770	IES A Sardiñeira	A Coruña	A Coruña
15025611	IES Monte das Moas	A Coruña	A Coruña
15025256	CEIP Alfredo Brañas	A Laracha	A Coruña
15007655	CEIP de Caión	A Laracha	A Coruña
15023417	CEP Plurilingüe Pilar Maestu Sierra	A Pobra do Caramiñal	A Coruña
15025530	IES da Pobra do Caramiñal	A Pobra do Caramiñal	A Coruña
15027125	IES de Viós	Abegondo	A Coruña
15021779	CEIP da Castellana	Aranga	A Coruña
15023041	CEIP de Galán	Arteixo	A Coruña
15000569	CEIP San Xosé Obreiro	Arteixo	A Coruña
15000612	CEIP de Arzúa	Arzúa	A Coruña
15027733	IES de Arzúa	Arzúa	A Coruña
15027851	IES A Cachada	Boiro	A Coruña
15032571	CRA de Boqueixón-Vedra Neira Vilas	Boqueixón	A Coruña
15027861	IES Pedra da Aguia	Camariñas	A Coruña
15026704	IES David Buján	Cambre	A Coruña
15002852	CEIP do Pindo	Carnota	A Coruña
15020970	CEIP Plurilingüe Celso Emilio Ferreiro	Cerceda	A Coruña
15003534	CEIP da Barqueira	Cerdido	A Coruña
15005828	CEIP Plurilingüe de Tarrío	Culleredo	A Coruña
15023405	CPI A Xunqueira	Fene	A Coruña
15021858	CEIP Plurilingüe Almirante Juan de Lángara y Huarte	Ferrol	A Coruña
15025566	IES Ferrol Vello	Ferrol	A Coruña
15007266	CEIP Areouta	Fisterra	A Coruña
15027915	IES Fin do Camiño	Fisterra	A Coruña
15007621	CPI Plurilingüe Cabo da Area	Laxe	A Coruña
15008714	CPI Plurilingüe da Picota	Mazaricos	A Coruña
15020854	CPI Plurilingüe de Xanceda	Mesía	A Coruña
15009241	CPI Plurilingüe Virxe da Cela	Monfero	A Coruña
15023508	CEIP Plurilingüe Virxe do Mar	Narón	A Coruña
15025670	CEIP Plurilingüe Isidro Parga Pondal	Oleiros	A Coruña
15025050	CEIP R. Maria Valle-Inclán	Oleiros	A Coruña
15027228	IES María Casares	Oleiros	A Coruña
15025487	CEIP Campomaior	Ordes	A Coruña
15011336	CEIP Plurilingüe Alfonso D. Rodríguez Castelao	Ordes	A Coruña
15032868	CEIP Plurilingüe do Camiño Inglés	Oroso	A Coruña
15032509	CRA de Oroso	Oroso	A Coruña
15011981	CEIP José María Lage	Ortigueira	A Coruña
15013503	CEIP Couceiro Freijomil	Pontedeume	A Coruña
15013761	CEIP Plurilingüe de Campanario	Porto do Son	A Coruña
15013977	CEIP Santa Irene	Porto do Son	A Coruña
15027691	IES de Porto do Son	Porto do Son	A Coruña
15014261	CEIP Heroínas de Sálvora	Ribeira	A Coruña
15014271	CEIP Plurilingüe de Artes	Ribeira	A Coruña
15014465	CEIP Plurilingüe de Palmeira	Ribeira	A Coruña
15024771	CEP Plurilingüe de Carreira	Ribeira	A Coruña
15014957	CPI de San Sadurniño	San Sadurniño	A Coruña
15015238	CEIP Plurilingüe Barrié de la Maza	Santa Comba	A Coruña
15027502	CEE Manuel López Navalón	Santiago de Compostela	A Coruña
15025724	CEIP Plurilingüe Os Tilos	Teo	A Coruña
15020911	CPI Plurilingüe de Vedra	Vedra	A Coruña
27003850	CEIP Plurilingüe Santa María	A Fonsagrada	Lugo
27009463	CEIP de Bretoña	A Pastoriza	Lugo
27016716	IES Fonmiñá	A Pastoriza	Lugo
27010155	CEIP Plurilingüe A Pobra de Brollón	A Pobra do Brollón	Lugo
27016649	IES Alfoz-Valadouro	Alfoz	Lugo
27007958	CPI Luis Díaz Moreno	Baralla	Lugo
27013958	IES Monte Castelo	Burela	Lugo
27016509	IES Marqués de Sargadelos	Cervo	Lugo
27003655	CPI Poeta Uxío Novoneyra	Folgoso do Courel	Lugo
27005913	CPI Ramón Piñeiro	Láncara	Lugo
27006401	CEIP Sagrado Corazón	Lugo	Lugo
27006735	CEIP Plurilingüe Poeta Avelino Díaz	Meira	Lugo
27016492	CEIP Plurilingüe do Páramo	O Páramo	Lugo
27010520	CEIP Plurilingüe Virxe da Luz	Portomarín	Lugo
27012012	CEIP Frei Luis de Granada	Sarria	Lugo
27012474	CEIP Plurilingüe Virxe do Carme	Sober	Lugo
27013296	CEIP Manuel Mato Vizoso	Vilalba	Lugo
27013314	IES Santiago Basanta Silva	Vilalba	Lugo
27013387	CEIP de Celeiro	Viveiro	Lugo
27014859	CEIP Plurilingüe de Xermade	Xermade	Lugo
32001002	CEIP Xoaquín Lourenzo Xocas	Bande	Ourense
32015116	CEIP Condesa de Fenosa	O Barco de Valdeorras	Ourense
32001725	IES Lauro Olmo	O Barco de Valdeorras	Ourense
32002781	CPI Tomás Terrón Mendaña	Carballeda de Valdeorras	Ourense
32003059	CEIP Plurilingüe Cartelle	Cartelle	Ourense
32004118	CPI Plurilingüe Antonio Faílde	Coles	Ourense
32016261	CEIP de Quins	Melón	Ourense
32009360	CPI Plurilingüe José García García	Ourense	Ourense
32009116	IES 12 outubro	Ourense	Ourense
32009190	IES As Lagoas	Ourense	Ourense
32010121	CEIP Roberto Blanco Torres	Peroxa, A	Ourense
32011305	CEIP Plurilingüe Ribadavia	Ribadavia	Ourense
32011901	CEIP Plurilingüe Virxe do Camiño	Rubiá	Ourense
32012711	CEIP Saco e Arce	Toén	Ourense
32013661	CEIP Bibei	Viana do Bolo	Ourense
32014801	IES Cidade de Antioquía	Xinzo de Limia	Ourense
36002335	IES Manuel García Barros	A Estrada	Pontevedra
36019244	IES A Sangriña	A Guarda	Pontevedra
36014611	CEIP A Lama	A Lama	Pontevedra
36024938	CRA de Caldas de Reis	Caldas de Reis	Pontevedra
36016103	CEIP de Corvillón	Cambados	Pontevedra
36000478	CEP Antonio Magariños Pastoriza	Cambados	Pontevedra
36015950	CEIP Plurilingüe da Espiñeira-Aldán	Cangas	Pontevedra
36000934	CEIP Plurilingüe do Castrillón-Coiro	Cangas	Pontevedra
36015111	CPI Aurelio Marcelino Rey García	Cuntis	Pontevedra
36018987	CRA Antía Cal	Gondomar	Pontevedra
36004496	CEIP Plurilingüe de Sequelo	Marín	Pontevedra
36015159	IES Chan do Monte	Marín	Pontevedra
36024604	CRA de Meis	Meis	Pontevedra
36004733	CEIP Plurilingüe de Reibón	Moaña	Pontevedra
36004927	CPI de Mondariz	Mondariz	Pontevedra
36020131	IES de Mos	Mos	Pontevedra
36016620	CEIP da Cruz	Nigrán	Pontevedra
36018434	CEIP Mallón	Nigrán	Pontevedra
36007011	IES Pino Manso	O Porriño	Pontevedra
36006377	CEIP Álvarez Limeses	Pontevedra	Pontevedra
36006407	CEIP Froebel	Pontevedra	Pontevedra
36019608	CEIP de Marcón	Pontevedra	Pontevedra
36019517	CEIP Santo André de Xeve	Pontevedra	Pontevedra
36006420	CEP Campolongo	Pontevedra	Pontevedra
36018379	IES A Xunqueira II	Pontevedra	Pontevedra
36006730	IES Frei Martín Sarmiento	Pontevedra	Pontevedra
36018677	IES Luís Seoane	Pontevedra	Pontevedra
36006729	IES Valle-Inclán	Pontevedra	Pontevedra
36007643	CEIP Plurilingüe Outeiro das Penas	Redondela	Pontevedra
36019566	IES de Chapela	Redondela	Pontevedra
36007734	IES Mendiño	Redondela	Pontevedra
36007813	CPI Julia Becerra Malvar	Ribadumia	Pontevedra
36020337	IES de Salvaterra de Miño	Salvaterra de Miño	Pontevedra
36009135	CEIP Plurilingüe de Silleda	Silleda	Pontevedra
36020350	IES Plurilingüe Pintor Colmeiro	Silleda	Pontevedra
36015020	CEIP de Randufe	Tui	Pontevedra
36014775	CEIP Plurilingüe de Guillarei	Tui	Pontevedra
36009913	CEIP Plurilingüe de Baño-Xanza	Valga	Pontevedra
36010459	CEIP Josefa Alonso de Alonso	Vigo	Pontevedra
36015251	CEIP Plurilingüe Frián Teis	Vigo	Pontevedra
36010101	CEIP Plurilingüe O Sello	Vigo	Pontevedra
36010484	CEIP Eduardo Pondal	Vigo	Pontevedra
36015810	CEIP Plurilingüe Sobreira-Valadares	Vigo	Pontevedra
36010691	CEP Plurilingüe Igrexa-Valadares	Vigo	Pontevedra
36019153	EEI Rúa Hernán Cortés	Vigo	Pontevedra
36015044	EEI Monte do Alba	Vigo	Pontevedra
36011579	IES A Guía	Vigo	Pontevedra
36018173	IES de Teis	Vigo	Pontevedra
36019670	IES do Castro	Vigo	Pontevedra
36011634	IES Politécnico de Vigo	Vigo	Pontevedra
36017430	IES Ricardo Mella	Vigo	Pontevedra
36011580	IES San Tomé de Freixeiro	Vigo	Pontevedra
36020374	IES Valadares	Vigo	Pontevedra
36020386	IES Marco do Camballón	Vila de Cruces	Pontevedra
36013588	CPI do Toural	Vilaboa	Pontevedra
36019451	CEIP A Escardia	Vilagarcía de Arousa	Pontevedra
36019669	IES Armando Cotarelo Valledor	Vilagarcía de Arousa	Pontevedra
36018380	IES O Carril	Vilagarcía de Arousa	Pontevedra
36013023	CEIP Plurilingüe de San Roque	Vilanova de Arousa	Pontevedra

ANEXO II

Méritos	Puntos	Documentación xustificativa
1. Antigüidade: máximo 5,000 puntos. Baremación de oficio desta epígrafe, agás no caso de non ter actualizado o seu expediente persoal, caso en que deberá achegar a documentación xustificativa que se indica.
1.1. Por cada ano de servizos como persoal funcionario que supere os cinco exixidos como requisito: A fracción de mes computarase por 0,041 puntos.	0,500	Certificación ou folla de servizos expedida polo departamento territorial correspondente ou copia simple do título administrativo coas dilixencias das distintas tomas de posesión e cesamentos que tivese desde o seu nomeamento como persoal funcionario ou, se é o caso, dos correspondentes documentos de inscrición nos rexistros de persoal.
1.2. Por cada ano de servizos como persoal funcionario noutros corpos ou escalas docentes que impartan algunha das ensinanzas reguladas na Lei orgánica 2/2006, do 3 de maio, de educación: A fracción de mes computarase por 0,020 puntos.	0,250
2. Desempeño da dirección de centros públicos e outros cargos directivos e de postos na Administración educativa: máximo 5,000 puntos. Baremación de oficio desta epígrafe, agás no caso de non ter actualizado o seu expediente persoal, caso en que deberá achegar a documentación xustificativa que se indica.
2.1. Por cada ano como persoa titular da dirección dun centro que impartise algunha das ensinanzas do centro a que se opta: A fracción de mes computarase por 0,083 puntos.	1,000	Copia simple do nomeamento, coas dilixencias da toma de posesión e cesamento.
2.2. Por cada ano como persoa titular da dirección dun centro que non impartise algunha das ensinanzas do centro a que se opta: A fracción de mes computarase por 0,041 puntos.	0,500
2.3. Por cada ano como persoa titular dunha subdirección ou xefatura de servizo en postos da Administración educativa: A fracción de mes computarase por 0,041 puntos.	0,500
2.4. Por cada ano como persoa titular dunha vicedirección, subdirección, secretaría ou xefatura de estudos dun centro que impartise algunha das ensinanzas do centro a que se opta: A fracción de mes computarase por 0,041 puntos.	0,500
2.5. Por cada ano como persoa titular dunha vicedirección, subdirección, secretaría ou xefatura de estudos dun centro que non impartise algunha das ensinanzas do centro a que se opta: A fracción de mes computarase por 0,020 puntos.	0,250
2.6. Por cada ano como persoa titular da xefatura de departamento, coordinación dos equipos de normalización lingüística, coordinación de ciclo, coordinación do proxecto Abalar, asesor/a Amtega, asesor/a CIEDIX, asesor/a CGIFP, coordinación de centro plurilingüe, coordinación de sección bilingüe, coordinación de auxiliares de conversa, responsable/coordinación do equipo de actividades complementarias e extraescolares, responsable/coordinación da dinamización das TIC, responsable/coordinación de biblioteca, responsable/coordinación da convivencia escolar, responsable da mellora da calidade educativa e de programas internacionais, coordinación do equipo de dinamización da lingua galega, coordinación de formación en centros de traballo, coordinación do bacharelato internacional, coordinación de emprendemento, coordinación de programas internacionais, coordinación de innovación e formación do profesorado, coordinación de biblioteca de centro integrado, coordinación de residencia, xefatura de seminario, departamento ou división de centros públicos docentes, asesoría de formación permanente, asesoría Abalar, asesoría Siega, dun centro que impartise algunha das ensinanzas do centro a que se opta: A fracción de mes computarase por 0,012 puntos.	0,150
3. Méritos académicos: máximo 1,000 punto. Baremación de oficio desta epígrafe, agás no caso de non ter actualizado o seu expediente persoal, caso en que deberá achegar a documentación xustificativa que se indica.
3.1. Por cada título de doutoramento:	0,500	Copia simple do título ou certificación do pagamento dos dereitos de expedición, de acordo co previsto no Real decreto 1002/2010, do 5 de agosto (BOE do 6 de agosto).
3.2. Por cada título de licenciatura, enxeñaría ou arquitectura distinto do alegado para o ingreso no corpo, ou polo certificado-diploma de estudos avanzados:	0,300
3.3. Por cada título de grao distinto do alegado para o ingreso no corpo.	0,250
3.4. Por cada título de diplomatura universitaria ou equivalente distinto do alegado para o ingreso no corpo:	0,150
4. Cursos de formación: máximo 3,000 puntos. Baremación de oficio desta epígrafe, agás no caso de non ter actualizado o seu expediente persoal, caso en que deberá achegar a documentación xustificativa que se indica. Por cursos de formación relacionados coa función directiva organizados polas administracións educativas que se atopen en pleno exercicio das súas competencias en materia educativa ou por institucións sen ánimo de lucro, que fosen homologados ou recoñecidos polas administracións citadas con anterioridade, así como os organizados polas universidades: 0,050 puntos por cada 10 horas.
4.1. Por actividades e cursos recibidos:	Ata 2,000	Certificado dos cursos en que conste de modo expreso o número de horas de duración deles. No caso dos organizados polas institucións sen ánimo de lucro, deberá acreditarse de forma que faga fe o recoñecemento ou homologación.
4.2. Por cursos impartidos:	Ata 1,000
5. Corpo de catedráticos. Baremación de oficio desta epígrafe.
Por pertencer a un dos corpos de catedráticos regulados na Lei orgánica 2/2006, do 3 de maio, de educación:	0,500	Baremación de oficio deste mérito.
6. Proxecto de dirección.
Polo proxecto de dirección:	Ata 12,000	O orixinal deste.

Disposición complementaria única

Na valoración do proxecto de dirección aplicaranse os criterios establecidos no anexo IV.