A representación da titularidade do centro privado (CPR) Povisa Formación Profesional, de Vigo, solicita autorización para impartir, na modalidade semipresencial e a distancia, para persoas adultas, o ciclo formativo de grao medio (CM) Coidados Auxiliares de Enfermaría, o ciclo formativo de grao superior (CS) Anatomía Patolóxica e Citodiagnóstico, o CS Imaxe para o Diagnóstico e Medicina Nuclear e o CS Radioterapia e Dosimetría.

De conformidade coa Orde da Consellería de Educación, Ciencia, Universidades e Formación Profesional do 15 de maio de 2025, publicada no Diario Oficial de Galicia do 30 de maio de 2025, o devandito centro privado conta con autorización para impartir as ensinanzas solicitadas na modalidade presencial.

Logo da tramitación do expediente de acordo co establecido no Decreto 133/1995, do 10 de maio, de autorización de centros docentes privados para impartir ensinanzas de réxime xeral non universitarias, e coa Orde do 20 de setembro de 1995 que o desenvolve, por proposta da Dirección Xeral de Centros e Recursos Humanos,

DISPOÑO:

Artigo 1. Modificación da autorización

1. Modificar a autorización do CPR Povisa, para impartir, na modalidade semipresencial e a distancia para persoas adultas, o CM Coidados Auxiliares de Enfermaría, o CS Anatomía Patolóxica e Citodiagnóstico, o CS Imaxe para o Diagnóstico e Medicina Nuclear e o CS Radioterapia e Dosimetría. O centro queda configurado como se detalla a seguir:

Denominación xenérica: centro privado (CPR).

Denominación específica: Povisa Formación Profesional.

Código do centro: 36019931.

Domicilio: rúa Romil, 75-77.

Localidade: Vigo.

Concello: Vigo.

Código postal: 36211.

Provincia: Pontevedra.

Titular: Policlínico Vigo, S.A. (Povisa).

2. Composición resultante:

a) Modalidade presencial, réxime ordinario:

• 3 CM Coidados Auxiliares de Enfermaría (3 unidades para 30 postos escolares cada unha).

• 1 CS Anatomía Patolóxica e Citodiagnóstico (2 unidades para 30 postos escolares cada unha).

• 1 CS Imaxe para o Diagnóstico e Medicina Nuclear (2 unidades para 30 postos escolares cada unha).

• 1 CS Radioterapia e Dosimetría (2 unidades para 30 postos escolares cada unha).

b) Modalidade semipresencial e a distancia, réxime para persoas adultas:

• CM Coidados Auxiliares de Enfermaría.

• CS Anatomía Patolóxica e Citodiagnóstico.

• CS Imaxe para o Diagnóstico e Medicina Nuclear.

• CS Radioterapia e Dosimetría.

Artigo 2. Ordenación académica

1. Ás ensinanzas autorizadas no artigo 1 desta orde na modalidade semipresencial e/ou a distancia, aplicaráselles, en canto sexa axeitado á súa natureza, o previsto na Orde de 5 de novembro de 2010 pola que se establece, con carácter experimental, a ordenación da formación profesional inicial polo réxime para as persoas adultas nas modalidades a distancia e semipresencial.

2. O desenvolvemento dos módulos profesionais organizarase sobre a base da titoría individual e colectiva, que serán atendidas directamente polo profesorado de cada módulo. A titoría individual realizarase preferentemente de xeito telemático; a titoría colectiva terá carácter presencial coa intervención directa do profesorado, nas instalacións do centro docente, e conforme ao artigo 12 da mencionada Orde do 5 de novembro de 2010; as horas semanais de dedicación á titoría colectiva para a realización por parte do alumnado das actividades programadas non poderá ser inferior ao enteiro igual ou inmediatamente superior ao 25 % das horas semanais que se establezan para cada módulo profesional.

A asistencia ás titorías presenciais nas instalacións do centro educativo terá carácter voluntario para o alumnado.

3. Ao longo do período lectivo correspondente, o profesorado de cada módulo profesional realizará un seguimento do desenvolvemento do proceso de ensino e aprendizaxe, utilizando para iso os instrumentos e os procedementos de recollida de información previamente establecidos na programación dos módulos, que deberán ser coñecidos polo alumnado.

A avaliación da aprendizaxe do alumnado será continua a través das actividades que se programen e harmonizarase con probas presenciais teórico-prácticas para cada avaliación parcial, de carácter obrigatorio para o alumnado, e axustadas aos resultados de aprendizaxe e aos criterios de avaliación dos currículos dos módulos profesionais. Ao finalizar o desenvolvemento de cada módulo, realizarase unha proba presencial final de carácter global. Esta proba terá que realizala o alumnado que non superase o módulo mediante as probas presenciais parciais que se realicen ao longo do curso.

4. O profesorado que imparta nas modalidades de distancia e semipresencial disporá das competencias necesarias para o manexo da plataforma de formación a distancia e para realizar o seguimento do proceso de ensino-aprendizaxe do alumnado.

Artigo 3. Inicio da actividade

Para a posta en funcionamento das ensinanzas que se autorizan, o Departamento Territorial da Consellería de Educación, Ciencia, Universidades e Formación Profesional de Pontevedra, logo do informe do Servizo Territorial de Inspección Educativa, aprobará expresamente a relación do profesorado que impartirá docencia nos devanditos ciclos, así como o equipamento.

Artigo 4. Inscrición no Rexistro de Centros

Esta orde dará lugar á correspondente inscrición no Rexistro de Centros da Comunidade Autónoma de Galicia.

Artigo 5. Modificación da autorización

O centro queda obrigado ao cumprimento da normativa vixente e a solicitar a oportuna revisión cando deban modificarse calquera dos datos que sinala esta orde.

Disposición derradeira primeira. Recursos

Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben, directamente, recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.

Disposición derradeira segunda. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 16 de marzo de 2026

Román Rodríguez González
Conselleiro de Educación, Ciencia, Universidades e Formación Profesional