Mediante a Resolución do 27 de xaneiro de 2026 publicouse o acordo do Consello de Dirección do Instituto Galego de Promoción Económica que aprobou as bases reguladoras das axudas a proxectos de descarbonización e renovación industrial de industrias tractoras nas comarcas afectadas polo peche de centrais térmicas no marco do Programa do Fondo de Transición Xusta de España 2021-2027. Territorio P2 A Coruña, e procedeuse á súa convocatoria para os anos 2026, 2027, 2028 e 2029, en réxime de concorrencia competitiva (DOG núm. 20, do 30 de xaneiro de 2026).

No parágrafo segundo do Resolvo establecíase que o prazo de presentación de solicitudes sería de tres (3) meses a partir do día seguinte ao da publicación da resolución no Diario Oficial de Galicia. O dito prazo así computado remata o 30 de abril de 2026.

Tendo en conta a complexidade da preparación destas solicitudes, tanto polo volume de investimento mínimo como polas características técnicas da documentación exixida, que requiren da elaboración de informes específicos e a necesidade de análise e estudos previos á presentación, considérase que o prazo de tres (3) meses establecido inicialmente non abonda para a correcta preparación das solicitudes. Con tal motivo, e en prol da eficiencia do propio programa, considérase necesario ampliar o prazo de solicitudes fixado inicialmente na convocatoria.

Por todo o anterior, e de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas, e dado que non se causan prexuízos a terceiros, e de conformidade coas facultades que teño conferidas,

RESOLVO:

Ampliar o prazo de presentación de solicitudes de axuda establecido no parágrafo segundo da resolución de convocatoria das axudas a proxectos de descarbonización e renovación industrial de industrias tractoras nas comarcas afectadas polo peche das centrais térmicas, cofinanciadas pola Unión Europea no marco do Programa do Fondo de Transición Xusta de España 2021-2027. Territorio P2 A Coruña, ata o 1 de xuño de 2026.

Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 8 de abril de 2026

Covadonga Toca Carús
Directora xeral do Instituto Galego de Promoción Económica