O 12 de setembro de 2025 publicouse no Diario Oficial de Galicia número 176 a Resolución do 10 de setembro de 2025 pola que se establecen as bases reguladoras para a concesión das axudas VInnovate Galicia ao abeiro da segunda convocatoria do mecanismo de financiamento interrexional VInnovate, cofinanciadas pola Unión Europea no marco do programa Galicia Feder 2021-2027, e se procede á súa convocatoria para o ano 2025 (código de procedemento IN848G); corrección de erros, DOG núm. 181, do 19 de setembro de 2025; modificada pola Resolución do 8 de xaneiro de 2026 (DOG núm. 10 de xaneiro).

Conforme o artigo 7 da citada resolución, relativo ao financiamento, as subvencións imputaranse ao capítulo VII do orzamento da Axencia Galega de Innovación nas aplicacións orzamentarias que se indican neste artigo.

Aplicación	2026	2027	2028	Total
07.A2.561A.770.0 (CP: 2023-00007)	400.000 €	400.000 €	200.000 €	1.000.000 €
Total	400.000 €	400.000 €	200.000 €	1.000.000 €

O apartado 2 do citado artigo establece que poderán ampliarse os créditos dedicados a esta convocatoria despois da declaración de dispoñibilidade de crédito como consecuencia das circunstancias establecidas no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia e, se for o caso, logo da aprobación orzamentaria que proceda.

Segundo engade o artigo 30.2 do mesmo regulamento, o órgano competente para a concesión deberá publicar a ampliación de crédito nos mesmos medios nos que publicou a convocatoria, sen que esta publicación implique unha apertura do prazo para presentar novas solicitudes nin o inicio dun novo cómputo de prazos para resolver.

Unha vez avaliadas as solicitudes presentadas ao abeiro da convocatoria, e constatado que o crédito inicialmente consignado resulta insuficiente para atender a totalidade das solicitudes que cumpren os requisitos establecidos, e conforme o establecido nos mencionados artigos 7.2 da Resolución do 10 de setembro de 2025 e 30.2 do regulamento de subvencións, considérase procedente ampliar o crédito inicialmente previsto nun importe de trescentos cincuenta e catro mil oitocentos dezanove euros con cinco céntimos (354.819,05 €), co obxecto de dar cobertura á totalidade das solicitudes avaliadas favorablemente.

De acordo co anterior, unha vez declarada a dispoñibilidade de crédito, logo da proposta do director de Área de Xestión, vista a Lei 9/2007, do 13 de xuño, de subvencións de Galicia e o seu regulamento, Decreto 11/2009 do 8 de xaneiro, no uso das competencias atribuídas,

RESOLVO:

Primeiro. Ampliar o importe total do crédito destinado ás axudas establecidas na Resolución do 10 de setembro de 2025 pola que se establecen as bases reguladoras para a concesión das axudas VInnovate Galicia ao abeiro da segunda convocatoria do mecanismo de financiamento interrexional VInnovate, cofinanciadas pola Unión Europea no marco do programa Galicia Feder 2021-2027, e se procede á súa convocatoria para o ano 2025 (código de procedemento IN848G), por un importe de 354.819,05 €, e con cargo á aplicación orzamentaria 07.A2.561A.770.0 (CP: 2023-00007).

Esta ampliación dos créditos da convocatoria tramítase de conformidade co disposto no artigo 7.2 da Resolución do 10 de setembro de 2025 pola que se establecen as bases reguladoras para a concesión das axudas VInnovate Galicia e no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvenciones de Galicia.

Unha vez efectuada esta ampliación, o crédito total destinado a estas axudas ascende a un millón trescentos cincuenta e catro mil oitocentos dezanove euros con cinco céntimos (1.354.819,05 €) distribuído como segue:

Aplicación	2026	2027	2028	Total
07.A2.561A.770.0 (CP: 2023-00007)	705.899,35 €	538.979,22 €	109.940,48 €	1.354.819,05 €
Total	705.899,35 €	538.979,22 €	109.940,48 €	1.354.819,05 €

Segundo A publicación desta resolución non supón a apertura dun novo prazo de presentación de solicitudes.

Disposición derradeira única

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 9 de abril de 2026

Carmen Cotelo Queijo
Directora da Axencia Galega de Innovación