Examinado o expediente de extinción da Fundación Dr. Vidal Ríos, adscrita ao protectorado da Consellería de Sanidade, dítase esta orde, baseada nos feitos e consideracións legais que se expoñen a seguir:

Feitos:

Primeiro. O 20 de xaneiro de 2026 presentouse ante este protectorado a solicitude de ratificación e posterior inscrición no Rexistro de Fundacións de Interese Galego do acordo de extinción da Fundación Dr. Vidal Ríos, adoptado polo padroado o 2 de outubro de 2025.

Segundo. A Fundación Dr. Vidal Ríos constituíuse en escritura pública outorgada na Coruña o 26 de xuño de 1998 ante o notario Federico Maciñeira Teijeiro, co número de protocolo 1.606, e foi emendada por outra posterior con data do 26 de abril de 1999, outorgada ante o mesmo notario e co número de protocolo 931. Foi clasificada de interese sanitario pola Orde da Consellería da Presidencia e Administración Pública do 4 de maio de 1999 (DOG núm. 89, do 11 de maio) e declarada de interese galego mediante a Orde do 1 de xuño de 1999 (DOG núm. 124, do 30 de xuño). Está adscrita ao protectorado da Consellería de Sanidade, e figura inscrita na sección correspondente do Rexistro de Fundacións de Interese Galego co número 1998/25.

Terceiro. A Fundación ten como fin principal, segundo consta no artigo 2 dos seus estatutos, o afondamento no coñecemento e tratamento da diabetes e outras patoloxías endócrino-metabólicas no ámbito da Comunidade Autónoma de Galicia.

Cuarto. Xunto coa solicitude e, logo dos requirimentos deste protectorado, a Fundación presentou a seguinte documentación:

1. Certificación do 24 de febreiro de 2026, acreditativa do acordo de extinción adoptado polo padroado o 2 de outubro de 2025 ante a imposibilidade de realización dos fins fundacionais.

2. Memoria xustificativa da concorrencia da causa de extinción e da improcedencia ou imposibilidade de modificar os estatutos ou de levar á práctica un proceso de fusión.

3. Contas da Fundación na data de adopción do acordo de extinción.

4. O proxecto de distribución de bens e dereitos resultantes da liquidación que, neste caso, é inexistente.

5. Informe-proposta do protectorado do 28 de marzo de 2026.

Consideracións legais:

Primeira. A Consellería de Sanidade resulta competente para resolver esta solicitude de conformidade co disposto no Decreto 144/2024, do 20 de maio, polo que se establece a estrutura orgánica da Consellería de Sanidade (DOG núm. 101, do 27 de maio), en relación co disposto no artigo 7.2.b) do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego.

Segunda. O artigo 44 da Lei 12/2006, do 1 de decembro, de fundacións de interese galego, establece entre as causas de extinción das fundacións a imposibilidade de realización do fin fundacional, e é necesario, para tal efecto, o acordo favorable do padroado, ratificado polo protectorado. O dito artigo dispón, así mesmo, que o acordo de extinción se inscribirá no Rexistro de Fundacións de Interese Galego.

Terceira. O artigo 54 da Lei 12/2006 e o artigo 21 do Decreto 15/2009 establecen o acordo de extinción entre os actos suxeitos a inscrición no Rexistro de Fundacións.

Cuarta. O acordo de extinción adoptouse de conformidade cos requisitos establecidos na normativa de aplicación e foi aprobado pola unanimidade do padroado. No expediente tramitado consta a memoria xustificativa da causa de extinción e demais documentación prevista no artigo 44 da Lei 12/2006 e no artigo 48 do Decreto 14/2009, do 21 de xaneiro.

Polo exposto, e de conformidade co establecido na Lei 12/2006, do 1 de decembro, de fundacións de interese galego, e nos decretos 14/2009, do 21 de xaneiro, polo que se aproba o Regulamento de fundacións de interese galego, e 15/2009, da mesma data, polo que se aproba o Regulamento do Rexistro de Fundacións de Interese Galego, e demais normativa de xeral aplicación,

DISPOÑO:

Ratificar o acordo de extinción adoptado polo padroado da Fundación Dr. Vidal Ríos e ordenar a súa inscrición no Rexistro de Fundacións de Interese Galego.

Contra esta orde, que pon fin á vía administrativa, pode interpoñerse recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses, consonte o artigo 46.1 da Lei 29/1998, do 13 de xullo, reguladora da xurisdición contencioso-administrativa, sen prexuízo de que, previamente e con carácter potestativo, se poida interpoñer recurso de reposición, ante o mesmo órgano que ditou o acto, no prazo dun mes, de conformidade co artigo 124 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 15 de abril de 2026

O conselleiro de Sanidade
P.D. (Orde do 22.4.2020; DOG núm. 82, do 29 de abril)
Natalia Lobato Mosquera
Secretaria xeral técnica da Consellería de Sanidade