O 9 de decembro de 2025 publicouse no DOG núm. 237 a Orde do 27 de novembro de 2025 pola que se procede á convocatoria para a renovación da mención de excelencia concedida a titulacións universitarias oficiais de máster impartidas por universidades públicas do Sistema universitario de Galicia.

Rematado o prazo para a entrega da documentación necesaria para a tramitación do procedemento establecido no artigo 4 da orde de convocatoria, as solicitudes foron analizadas pola comisión avaliadora prevista no artigo 7 da citada orde.

Tendo en conta o anteriormente exposto e atendendo á proposta de resolución da Secretaría Xeral de Universidades, esta consellería

RESOLVE:

Primeiro. Concederlle a renovación da mención de máster universitario excelente da Xunta de Galicia ás titulacións universitarias oficiais de máster impartidas polas universidades do Sistema universitario de Galicia que se relacionan no anexo I da presente resolución.

Segundo. A renovación do máster universitario excelente da Xunta de Galicia terá unha vixencia de cinco cursos académicos á fin dos cales poderá ser renovado por períodos sucesivos de igual duración.

Terceiro. As universidades responsables dos títulos comprométense a manter os requisitos que deron lugar á obtención da renovación da mención de máster universitario excelente da Xunta de Galicia.

Cuarto. Contra esta resolución, que esgota a vía administrativa, as universidades poderán interpoñer recurso potestativo de reposición ante o conselleiro de Educación, Ciencia, Universidades e Formación Profesional no prazo dun mes contado a partir do día seguinte ao da publicación da resolución no DOG, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou directamente o recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 20 de maio de 2025

Román Rodríguez González
Conselleiro de Educación, Ciencia, Universidades e Formación Profesional

ANEXO

Titulación	Facultade/escola	Universidade
MU en Bioinformática para Ciencias da Saúde	Facultade de Informática	Universidade da Coruña
MU en Biotecnoloxía Avanzada	Facultade de Bioloxía Facultade de Ciencias	Universidade de Vigo Universidade da Coruña
MU en Tradución para a Comunicación Internacional	Facultade de Filoloxía e Tradución	Universidade de Vigo