O Pleno da Corporación, na sesión extraordinaria que tivo lugar o día 8 de xuño de 2026, adoptou o seguinte acordo:

Primeiro. Aprobar inicialmente a modificación das normas subsidiarias de planeamento para a clasificación e ordenación pormenorizada do polígono industrial do Reboredo e a súa ampliación.

Segundo. Someter a información pública, durante dous meses, a modificación das normas subsidiarias municipais para clasificación e ordenación pormenorizada da ampliación e, se for o caso, modificación do polígono industrial do Reboredo.

Terceiro. Consonte o establecido no artigo 47.2 da Lei do solo de Galicia, o acordo de aprobación inicial da modificación das normas subsidiarias de planeamento de Monforte de Lemos para a clasificación e a ordenación pormenorizada do polígono industrial do Reboredo e a súa ampliación determina, por si só, a suspensión do procedemento de outorgamento de licenzas naqueles ámbitos do territorio en que as novas determinacións supoñan a modificación da ordenación urbanística vixente.

A área afectada pola suspensión refírese ao ámbito da modificación das normas subsidiarias de planeamento de Monforte de Lemos, que comprende a totalidade dos terreos do polígono industrial do Reboredo conforme o vixente Plan parcial do polígono industrial de Monforte de Lemos, así como os terreos previstos neste expediente para a súa ampliación, que lindan: ao norte, coa levada número 18 de regadío do Val de Lemos e coa estrada de Venta, a estrada provincial LU-P-3205 e o regato Carballal; ao leste, con camiño público; ao sur, co municipio de Sober por eixe de camiño público segundo se recolle no Decreto 168/2024, do 8 de xullo, polo que se resolve o expediente de deslindamento entre os termos municipais dos concellos de Sober e Monforte de Lemos, ao leste da estrada provincial LU-P-3205; ao oeste, co propio polígono industrial do Reboredo; e novamente ao leste e ao sur –ao oeste da estrada provincial LU-P-3205–, co polígono industrial do Reboredo ata o encontro coa levada número 18 de regadío do Val de Lemos.

En consecuencia, acórdase a suspensión de licenzas, incluídas as de parcelación de terreos, edificación e demolición, no ámbito da modificación das normas subsidiarias de planeamento de Monforte de Lemos para a clasificación e a ordenación pormenorizada do polígono industrial do Reboredo e a súa ampliación. Non obstante, poderanse outorgar licenzas no ámbito do Plan parcial do polígono industrial de Monforte de Lemos sempre que simultaneamente se cumpran as condicións do planeamento vixente e as da modificación das normas subsidiarias de planeamento aprobada inicialmente.

En todo caso, poderanse outorgar as licenzas que teñan por obxecto a realización de obras de mantemento, conservación e reforma, salvo no caso de obras de rehabilitación integral que sexan equiparables á reconstrución total do edificio non xustificadas por razón de urxencia ou que supoñan un aumento do volume edificado; as licenzas de primeira ocupación; e os actos suxeitos ao trámite de comunicación previa cando se trate de obras ou actos para a implantación de usos ou actividades autorizados polo novo planeamento.

A suspensión de licenzas terá unha duración máxima de dous anos contados desde a devandita aprobación inicial, e en calquera caso extinguirase coa aprobación definitiva da modificación das normas subsidiarias.

Cuarto. Publicar o anuncio de información pública no Diario Oficial de Galicia e nos xornais El Progreso e La Voz de Galicia, como os xornais de maior difusión na provincia de Lugo, da modificación das normas subsidiarias de planeamento para a clasificación e ordenación pormenorizada do polígono industrial do Reboredo e a súa ampliación.

Quinto. Notificar individualmente a todas as persoas titulares catastrais dos terreos afectados.

Sexto. Solicitar das administracións públicas competentes os informes sectoriais e consultas que resulten preceptivos.

Monforte de Lemos, 11 de xuño de 2026

José Tomé Roca
Alcalde