O Consello de Dirección do Igape, na súa reunión do día 22 de xuño de 2026, acordou por unanimidade dos membros asistentes aprobar as bases reguladoras do Programa de adquisición de competencias profesionais en materia de internacionalización empresarial, e facultou a directora xeral para a súa convocatoria, a aprobación dos créditos e a súa publicación no Diario Oficial de Galicia.
Na súa virtude, e de conformidade coas facultades que teño conferidas,
RESOLVO:
Primeiro. Publicar as bases reguladoras do Programa de adquisición de competencias profesionais en materia de internacionalización empresarial, e convocar para os anos 2026-2027-2028 as axudas en réxime de concorrencia competitiva (código de procedemento IG414A).
Segundo. O prazo de presentación das solicitudes desta convocatoria será dun mes, contado desde as 9.00 horas do día seguinte ao da publicación desta resolución no DOG e ata as 14.00 horas do día en que se cumpra o dito prazo dun mes.
Se o último día do prazo for inhábil, entenderase prorrogado ao primeiro día hábil seguinte e, se no mes de vencemento non houber día equivalente ao inicio do cómputo, entenderase que o prazo expira o último día do mes.
Terceiro. Os créditos dispoñibles para concesións nesta convocatoria aboaranse con cargo ás seguintes partidas orzamentarias e coa seguinte distribución plurianual:
|
Orzamento inicial once (11) meses |
||||
|
Ano |
Dotación partida |
Dotación partida |
(Seg. Social por conta da empresa) Partida 09.A1 741A 4840 |
Total |
|
09.A1 741A 4803 |
09.A1 741A 7800 |
|||
|
2026 |
386.108,90 |
40.000,00 |
- |
426.108,90 |
|
2027 |
1.012.754,10 |
- |
31.521,60 |
1.044.275,70 |
|
1.398.863,00 |
40.000,00 |
31.521,60 |
1.470.384,60 |
|
|
Orzamento prórroga once (11) meses |
||||
|
Ano |
Dotación partida |
Dotación partida |
(Seg. Social por conta da empresa) Partida 09.A1 741A 4840 |
Total |
|
09.A1 741A 4803 |
09.A1 741A 7800 |
|||
|
2027 |
330.108,90 |
- |
- |
330.108,90 |
|
2028 |
1.048.754,10 |
- |
31.521,60 |
1.080.275,70 |
|
1.378.863,00 |
31.521,60 |
1.410.384,60 |
||
A directora xeral do Igape poderá ampliar os créditos, logo de declaración da súa dispoñibilidade, como consecuencia das circunstancias establecidas no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia (en diante, Decreto 11/2009), mediante resolución publicada para o efecto.
Cuarto. Prazos de duración do procedemento, de execución da bolsa e para solicitar o cobramento:
O prazo máximo para resolver e publicar a resolución será de cinco (5) meses, contados desde a publicación desta resolución no Diario Oficial de Galicia, transcorrido o cal se poderá entender desestimada por silencio administrativo a solicitude de concesión de axuda.
O prazo de execución das bolsas rematará na data establecida na resolución de concesión, sen que nunca poida exceder o 30 de decembro de 2028.
A persoa bolseira deberá solicitar o pagamento da bolsa nos quince días hábiles seguintes ao cumprimento de cada período de pagamento indicado nos artigos 19.1 e 19.2, excepto o pagamento do anticipo do primeiro ano, que se fará de xeito automático coa resolución de concesión da bolsa.
Quinto. De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, transmitiranse á Base de datos nacional de subvencións a información requirida por esta, o texto da convocatoria para a súa publicación na citada base e o seu extracto no Diario Oficial de Galicia. A cesión de datos de carácter persoal que se lle debe efectuar á Intervención Xeral da Administración do Estado para os efectos de publicar as subvencións concedidas na Base de datos nacional de subvencións non requirirá o consentimento da persoa beneficiaria.
Sexto. Os requisitos das letras c), e), f), h), i), k), l), m) e n) do artigo 20.2 da Lei 9/2007, do 13 de xuño, de subvencións de Galicia (en diante, Lei 9/2007), indícanse nas bases anexas a esta resolución.
Santiago de Compostela, 6 de xullo de 2026
Covadonga Toca Carús
Directora xeral do Instituto Galego de Promoción Económica
ANEXO
Bases reguladoras do Programa de adquisición de competencias profesionais en materia de internacionalización empresarial.
O Instituto Galego de Promoción Económica (Igape), no exercicio das funcións que ten encomendadas como instrumento básico de actuación da Xunta de Galicia para o impulso do desenvolvemento competitivo do sistema produtivo galego, vén desenvolvendo unha estratexia continuada de apoio á internacionalización empresarial. Esta actuación materialízase a través de iniciativas orientadas ao reforzo do capital humano especializado, ao acompañamento das empresas galegas nos seus procesos de expansión exterior e á captación de investimentos estranxeiros cara a Galicia.
A crecente complexidade do contexto económico internacional, marcada pola globalización dos mercados, a dixitalización dos procesos comerciais e a aparición de novos condicionantes xeopolíticos, pon de manifesto a necesidade de que as pequenas e medianas empresas galegas conten con profesionais cualificados en internacionalización. Neste escenario, detéctase unha insuficiencia de perfís especializados que dean resposta ás demandas do tecido empresarial, o que xustifica a posta en marcha de programas públicos de capacitación específica neste ámbito.
Os programas de formación e adquisición de competencias profesionais en internacionalización contribúen de maneira directa á mellora da empregabilidade das persoas participantes, ao tempo que facilitan a incorporación de coñecemento especializado nas organizacións. Así mesmo, estes programas presentan unha complementariedade funcional coa liña IG166 de xestores de internacionalización, configurando un itinerario que permite a evolución progresiva das persoas beneficiarias cara a perfís profesionais altamente demandados polas empresas galegas.
No marco das actuacións de fomento da competitividade, identifícase igualmente a existencia de barreiras de acceso ao mercado laboral para persoas sen experiencia previa en ámbitos internacionais. A través de programas de formación teórico-práctica posibilítase a participación destas persoas en contorno profesionais especializados, facilitando a adquisición de experiencia en actividades de alto valor engadido e contribuíndo á súa inserción laboral.
Polo tanto, considérase necesario o desenvolvemento dun programa estruturado de formación, titorización e prácticas profesionais orientado á adquisición de competencias en materia de internacionalización empresarial. Este programa permitirá dotar as persoas participantes de coñecementos técnicos específicos, así como de habilidades transversais relacionadas coa operativa internacional, a adaptación a contornos multiculturais e o uso de ferramentas dixitais aplicadas ao comercio exterior.
O obxecto destas bases é a regulación dun programa de bolsas de formación práctica en internacionalización empresarial, que se poderán desenvolver tanto en Galicia como no estranxeiro, en entidades e organismos de referencia no ámbito da internacionalización. Entre estes inclúense, entre outros, oficinas do Igape e da Xunta de Galicia, oficinas económicas e comerciais de España no exterior, cámaras de comercio, organismos multilaterais, axencias de promoción económica, centros de investigación, empresas e demais entidades vinculadas á actividade internacional tanto en Galicia como no estranxeiro. As edicións anteriores deste programa permitiron a formación de máis de 400 especialistas en comercio exterior, cun elevado grao de inserción laboral, o que evidencia a súa eficacia como instrumento de política pública orientado á mellora da competitividade empresarial e á xeración de emprego cualificado.
A convocatoria das bolsas será obxecto de publicación no Diario Oficial de Galicia mediante resolución da directora xeral do Igape, na cal se establecerán os aspectos procedementais, os prazos de presentación de solicitudes e a dotación orzamentaria correspondente.
O procedemento de concesión destas prazas tramitarase en réxime de concorrencia competitiva, ao abeiro do disposto no artigo 19.1 da Lei 9/2007.
Artigo 1. Obxecto
O obxecto destas bases é a convocatoria de corenta (40) prazas para a capacitación de profesionais en materia de internacionalización empresarial mediante formación práctica, coa finalidade de mellorar a empregabilidade e pór á disposición das empresas galegas profesionais que as axuden a mellorar a súa competitividade.
Artigo 2. Procedemento e réxime de aplicación
1. O procedemento de concesión destas prazas tramitarase en réxime de concorrencia competitiva.
2. Non se poderán outorgar bolsas por contía superior á que se determine nesta convocatoria, salvo que se realice unha nova convocatoria, ou se produza un incremento de créditos derivados dunha xeración, ampliación ou incorporación de crédito, ou da existencia de remanentes doutras convocatorias financiadas con cargo ao mesmo crédito ou créditos incluídos no mesmo programa ou en programas do mesmo servizo, ou dunha transferencia de crédito, ao abeiro do disposto no artigo 31.2 da Lei 9/2007.
Artigo 3. Natureza e incompatibilidade da bolsa
1. O programa reúne os requisitos previstos no artigo 1 do Real decreto 1493/2011, do 24 de outubro, polo que se regulan os termos e condicións de inclusión no réxime xeral da Seguridade Social das persoas que participen en programas de formación, polo que a dita norma resulta de aplicación.
2. A concesión ou desfrute destas bolsas non implica ningunha vinculación laboral entre a persoa beneficiaria e o Igape, nin supoñen ningún compromiso ou dereito de incorporación ao seu cadro de persoal, e o bolseiro non exerce, en ningún caso, a representación do Igape.
3. As bolsas outorgadas son incompatibles con calquera outra bolsa ou axuda de similares características, así como con calquera relación laboral ou de prestación de servizos remunerada do bolseiro. Así mesmo, son incompatibles coa percepción de prestación ou subsidio por desemprego.
4. A obtención doutras axudas recibidas para a realización do proxecto obxecto da bolsa deberá comunicarse ao Igape tan pronto como se coñeza. En todo caso, antes de conceder a bolsa solicitarase da persoa solicitante unha declaración escrita ou en soporte electrónico sobre outras axudas recibidas para a realización do proxecto obxecto da bolsa. O incumprimento do disposto neste artigo considerarase unha alteración das condicións tidas en conta para a concesión da bolsa e poderá dar lugar a un procedemento de reintegro.
Artigo 4. Requisitos das persoas solicitantes
1. Ter menos de 35 anos na data de presentación da solicitude.
2. Ter nacido en Galicia e estar nacionalizado/a nun Estado membro da Unión Europea, ou estar empadroado/a nun municipio da Comunidade Autónoma de Galicia cun ano de antigüidade á data de publicación destas bases.
3. Estar en posesión dalgunha titulación universitaria superior de grao e que permita o acceso aos estudos oficiais de máster universitario de acordo co establecido no Real decreto 822/2021, do 28 de setembro, polo que se establece a organización do ensino universitario e o procedemento de aseguramento da súa calidade:
i. Título universitario oficial de graduada ou graduado español.
ii. Títulos procedentes de sistemas educativos que non formen parte do EEES, que equivalen ao título de grao.
Así mesmo, é imprescindible acreditar un mínimo de 240 ECTS en todos os casos. A titulación pódese obter e acreditar ata cinco (5) días despois da publicación da resolución de concesión; a non presentación suporá a imposibilidade de ser persoa beneficiaria da bolsa.
Os títulos obtidos no estranxeiro ou en centros privados españois deberán estar homologados polo Ministerio de Educación español antes de que finalice o prazo de presentación de solicitudes. Polo que se refire aos títulos de máster, non se require que estean homologados.
4. Coñecementos de inglés (falado e escrito).
Deberá acreditarse o nivel mínimo de idioma inglés B2. Esta capacidade acreditarase mediante unha das dúas opcións seguintes:
a) A realización dun exame en que os aspirantes deberán demostrar, como mínimo, nivel B2 do Marco común europeo de referencia para as linguas.
b) Achegar algún dos certificados de idioma inglés relacionados no anexo II destas bases, sempre que este teña menos de tres anos de antigüidade na data de remate do prazo de presentación de solicitudes.
5. Cumprir os requisitos do artigo 10 da Lei 9/2007 para ser considerada persoa beneficiaria de subvencións.
6. Non ter desfrutado con anterioridade dunha bolsa do Igape relacionada coa internacionalización empresarial. Quedarán tamén excluídos da convocatoria aqueles solicitantes que fosen adxudicatarios deste tipo de bolsas en edicións anteriores e que renunciasen a elas con posterioridade ou lles fose determinado un incumprimento total. Non ter desfrutado con anterioridade dunha bolsa doutro organismo o institución nacional ou estranxeira relacionada coa internacionalización empresarial.
7. Estar ao día nas súas obrigas tributarias estatais, autonómicas e da Seguridade Social, así como non ter pendente de pagamento ningunha outra débeda, por ningún concepto, coa Administración pública da Comunidade Autónoma. O cumprimento deste requisito acreditarase cubrindo no formulario electrónico a declaración responsable da persoa solicitante de estar ao día no cumprimento das obrigas tributarias, fronte á Seguridade Social e de non ter pendente de pagamento ningunha outra débeda coa Administración da Comunidade Autónoma, de acordo co establecido no artigo 11.h) do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia.
Achegar declaración responsable de data posterior da publicación da resolución da convocatoria no Diario Oficial de Galicia, onde conste que a persoa solicitante non padece enfermidade nin limitación física ou psíquica incompatible coa realización das actividades que constitúen o obxecto da bolsa.
Non ter antecedentes penais, nin estar incurso/a en causa penal con medidas cautelares que poidan impedir o normal desenvolvemento da bolsa, mentres non se emite sentenza firme, do cal se deberá informar o Igape. De non ser absolutoria, producirá a perda da bolsa e a devolución dos importes percibidos, de ser o caso. A declaración debese cubrir no formulario electrónico de solicitude.
Artigo 5. Condicións da bolsa
1. Duración.
A duración da bolsa establécese nun máximo de once (11) meses, contados desde xaneiro a decembro de 2027, prorrogables, se é o caso, por petición da persoa bolseira, por un máximo de once (11) meses adicionais e sen exceder nunca o 30 de decembro de 2028, en función da necesidade de finalizar ou completar unha parte da formación que xa comezase ou estivese a piques de comezar.
Condicións da prórroga:
– Informe favorable do titor da persoa bolseira.
– Dispoñibilidade de destino.
– Dispoñibilidade orzamentaria.
En caso de prórroga, a dotación adaptarase proporcionalmente segundo a súa duración e o destino asignado.
2. Destino.
O Igape convenia con entidades e/ou organismos oficiais relacionados coa internacionalización empresarial destinos no ámbito de Galicia e no ámbito internacional. Os destinos poderán ser, polo tanto, en Galicia ou no estranxeiro, sempre en entidades que teñan un compoñente esencial de traballo na internacionalización empresarial.
A asignación de destinos será realizada polo Igape atendendo ás características dos aspirantes e ás particularidades das entidades de acollida.
Algúns destinos poden presentar requisitos específicos e restritivos sobre as características das persoas bolseiras que aceptan, requisitos xeralmente imprescindibles e marcados pola entidade de acollida. Estes requisitos e características teranse en conta á hora da asignación dos bolseiros a destino.
Son requisitos específicos, entre outros posibles, que poden condicionar a asignación de destinos, os seguintes:
• Oficinas comerciais de España no exterior:
– Ter menos de 30 anos na data de incorporación a destino.
– Posuír un nivel de idioma inglés non inferior a B2.
– Un determinado nivel doutros idiomas nalgúns países.
– Titulación universitaria.
Outros idiomas.
Opcionalmente, os candidatos, ademais de examinarse de inglés, poderán indicar na solicitude ata dous idiomas adicionais dos cales se queiran examinar. Os idiomas adicionais dispoñibles son: chinés, alemán e francés. O exame non será necesario se se pode acreditar o nivel de idioma achegando certificado do idioma correspondente segundo o cadro de equivalencias incluído no anexo II, sempre e cando o dito certificado teña menos de tres anos de antigüidade na data de fin do prazo de presentación de solicitudes.
O Igape reserva para si a posibilidade para si de cambiar as datas de incorporación, os destinos dos bolseiros e a dotación correspondente, no caso de concorrer causa xustificada.
3. Desenvolvemento da bolsa.
A persoa bolseira deberá aterse aos horarios e á normativa interna de funcionamento das entidades de acollida. No caso de peche das entidades en períodos de vacacións (non festivos) a persoa bolseira debe informar o Igape para que lle asigne tarefas alternativas que contribúan á súa formación.
A persoa bolseira poderá dispor dos seguintes tipos de permiso:
a) No caso de maternidade ou paternidade o/a bolseiro/a desfrutará do correspondente permiso retribuído pola Seguridade Social. Acreditarase mediante copia da partida de nacemento ou da páxina correspondente do libro de familia.
b) Licenza por matrimonio ou parella en análoga relación de afectividade: a persoa bolseira deberá comunicarllo ao Igape o antes posible e presentar o correspondente xustificante.
c) No caso de enfermidade ou accidente, a persoa bolseira deberá comunicarllo ao Igape o antes posible e presentar o correspondente xustificante médico.
No caso de que a suma de interrupcións da formación por enfermidade e/ou outros motivos supere os vinte (20) días hábiles, o Igape reserva para si o dereito de rescindir a bolsa, temporal ou definitivamente, ou cambiar o destino se con iso se facilita a reinserción da persoa bolseira á súa formación.
d) Como norma xeral, e sempre e cando a entidade de acollida non establecese un período distinto, a persoa bolseira poderá desfrutar dun período de quince (15) días de libre disposición por cada período de once (11) meses de bolsa concedida ou a súa parte proporcional, sen necesidade de xustificación e logo de notificación ao Igape.
A saída, por calquera motivo, do país de destino da bolsa deberá ser informada previamente ao Igape con, polo menos, dez (10) días de antelación.
e) Por cambio de destino, a persoa bolseira poderá desfrutar de ata cinco (5) días hábiles, no caso de cambio para un país diferente, ou ata tres (3) días se se trata do mesmo país pero cambia de entidade de acollida.
O desfrute de calquera dos permisos incluídos neste artigo non suporá unha ampliación do período de duración da bolsa indicado na resolución de concesión.
4. Programa de formación.
A formación que recibirán as persoas bolseiras abrangue:
a) Análise e investigación de mercados, estudo de sectores económicos de mercados estranxeiros.
b) Análise dos puntos fortes, debilidades, ameazas e oportunidades dos diferentes sectores estratéxicos de Galicia en relación coa súa internacionalización.
c) Estudo das distintas formas de introdución nos mercados estranxeiros e estratexias de internacionalización empresarial.
d) Para completar a dita formación, a persoa bolseira contará co apoio do seu titor no organismo de destino e dunha persoa no Igape, a quen lles poderá dirixir as súas dúbidas e preguntas.
e) A formación poderá implicar visitas a empresas ou organismos, que serán realizadas polas persoas bolseiras a través dos seus propios medios (con reintegro dos gastos de desprazamento segundo o indicado no artigo 6.2).
f) O Igape poderá organizar cursos de formación, presencial ou en liña. A asistencia aos cursos é obrigatoria para o desfrute e aceptación da bolsa, mesmo por parte daquelas persoas bolseiras que estean nun posto de reserva.
Artigo 6. Contía da bolsa
1. Para a dotación (tanto para a dotación inicial como para a prórroga) teranse en consideración os índices do custo de vida das distintas cidades de destino das bolsas, segundo criterios establecidos pola entidade pública empresarial ICEX España Exportación e Inversiones (ICEX), dependente do Ministerio de Industria e Turismo. Na fase inicial ou no período de prórroga poderá modificarse a dotación da bolsa por flutuacións do tipo de cambio ou por mor do proceso inflacionario que xustifiquen esta modificación e sempre que exista dispoñibilidade orzamentaria. A actualización farase a partir do mes seguinte ao da súa solicitude por parte da persoa beneficiaria e tomaranse como tipos de cambio de referencia o do día da publicación das bases e o día de solicitude de modificación da dotación, ou de oficio cando as circunstancias antes sinaladas así o aconsellen e sempre e cando exista dispoñibilidade orzamentaria. Esta actualización no tipo de cambio farase, como máximo, cuadrimestralmente.
2. O importe máximo de dotación por persoa bolseira é de 55.500 € por un período de once (11) meses ou a súa parte proporcional en función do período da bolsa. As dotacións variarán segundo o destino e o número de meses de estadía en Galicia e no estranxeiro. Desta subvención detraeranse a correspondente retención fiscal e a cota por cotización á Seguridade Social aplicables segundo a lexislación vixente.
Considéranse incluídos dentro do importe da dotación da bolsa –e dentro do límite máximo dos 55.500 €– todos os gastos en que teña que incorrer a persoa bolseira para o seu desenvolvemento.
O Igape poderá aplicar a compensación entre as partidas de gastos das letras a), b) e c) seguintes cando as necesidades de gasto de cada persoa bolseira en relación coas accións que se van desenvolver no programa así o aconsellen para o seu correcto desenvolvemento:
a) Gastos de viaxe por mor da incorporación a destino.
1º. Desprazamento: só gastos en transporte público. Gastos de ida e volta. Non se compensarán gastos de volta cando se produza unha renuncia antes de cumprirse os seis (6) meses de incorporación a destino. Os gastos que se van compensar en caso de renuncia entre os seis (6) meses e a fin real da bolsa serán rateados proporcionalmente aos meses desfrutados. Non serán subvencionables os envíos de maletas ou paquetes a maiores dos incluídos no transporte contratado.
2º. Aloxamento: gastos de hotel en tránsito ao destino ou á chegada ao destino asignado ata un máximo de dúas (2) noites, en réxime de aloxamento e almorzo.
3. Gastos de taxas de visado.
4. Gastos de renovación de pasaporte por exixencias particulares do destino asignado.
Estes gastos a) terán unha limitación máxima de 1.500 € na incorporación a destino dentro do mesmo continente e de 3.000 € no caso de incorporarse a un destino en continente distinto do de orixe.
b) Outros gastos comúns no desenvolvemento da bolsa, sempre que sexan previamente autorizados polo Igape:
1º. Gastos de desprazamento por asistencia a eventos ou visitas a empresas: só serán admisibles gastos de desprazamento en transporte público, excepto en Galicia, onde se admitirá a compensación por quilometraxe de vehículo propio, autoestrada e aparcadoiro. Neste caso, o quilómetro compensarase a 0,26 €.
2º. Gastos de aloxamento por asistencia a eventos ou visitas a empresas.
3º. Gastos de daxudas de custo vinculados á asistencia a un evento ou acción, autorizados co límite establecido no anexo III por cada país e día.
4º. Gastos de cursos de idiomas de uso oficial no país de destino e excluído o idioma inglés.
5º. Gastos de tarxetas de negocio.
6º. Outros, que se consideren esenciais para o desenvolvemento da bolsa.
Estes gastos b) terán un límite de 2.000 € para o primeiro semestre da bolsa, límite que poderá ser revisado para efectos de novas dotacións semestrais segundo a execución do semestre anterior e logo de solicitude motivada ata 2.000 €.
5. Gastos de seguro de accidentes e enfermidades no caso de bolsas con destinos no estranxeiro e cun límite de ata 1.200 €.
6. Gastos de compra dun ordenador portátil, así como rato e auriculares, segundo as condicións establecidas no artigo 17.i), cun límite de 1.000 €. En caso de renuncia antes de seis (6) meses desde o inicio da bolsa, o Igape reclamará na liquidación por renuncia o 100 % da súa achega ao custo do portátil e a parte proporcional no caso de renuncia desde os seis (6) meses ata facer un ano da bolsa.
Todos estes gastos deberán estar expresamente autorizados e serán compensados contra presentación dos correspondentes xustificantes de gasto (facturas, billetes e/ou tarxetas de embarque, etc.), agás os relativos os puntos 5 e 6 anteriores, que se cobrarán co anticipo establecido no artigo 19.1.a) polo máximo subvencionable. Este importe axustarase en función do gasto real xustificado.
Unha vez incorporados aos destinos indicados na resolución, no caso de cambio de destino –mediante nova resolución que implique máis dunha viaxe de ida e retorno previstos na dotación da bolsa, no período inicial ou no período de prórroga– o Igape aboaralle á persoa bolseira os gastos de desprazamento mediante avión, tren ou autobús e gastos de hotel. Estes importes –ao seren circunstancias excepcionais– non están incluídos dentro do límite máximo da bolsa.
Só se admitirán pagamentos en efectivo para gastos de importe inferior a 300 €, xustificando o pagamento mediante recibo do provedor.
A xustificación e o pagamento por parte do Igape realizarase sempre en euros. Para aqueles gastos efectuados en moeda estranxeira, deberá aplicarse o tipo de cambio correspondente publicado no Boletín Oficial del Estado da data en que se presente a xustificación, ou data inmediata anterior. En caso de que a moeda estranxeira non sexa admitida a cambio oficial publicado no Boletín Oficial del Estado, poderá utilizarse un conversor de moeda estranxeira xeral da internet. Na xustificación correspondente deberá indicarse o conversor utilizado, así como achegar proba da data de consulta.
Artigo 7. Forma e lugar de presentación das solicitudes
1. Para presentar a solicitude, as persoas interesadas deberán cubrir previamente un formulario electrónico descritivo das circunstancias da persoa solicitante, a través da aplicación establecida no enderezo da internet https://spiga-sede.igape.es. Deberá cubrir necesariamente todos os campos establecidos como obrigatorios, tras o cal a aplicación emitirá un identificador de documento electrónico (IDE) que identificará univocamente a solicitude de axuda.
2. A solicitude presentarase obrigatoriamente por medios electrónicos a través do formulario normalizado (anexo I) que se obterá de xeito obrigatorio na aplicación informática https://spiga-sede.igape.es, tamén accesible desde a sede electrónica da Xunta de Galicia, https://sede.xunta.gal
Será obrigatoria a inclusión dos 40 caracteres alfanuméricos do IDE obtido no paso anterior. As solicitudes que carezan do IDE ou nas cales este sexa erróneo (sexa porque ten un formato erróneo ou porque non foi xerado pola aplicación informática) non serán tramitadas, e concederáselles ás persoas solicitantes un prazo de dez (10) días hábiles para a súa emenda, transcorrido o cal se considerarán por desistidas da súa petición, logo de resolución de arquivamento.
Considérase que todas as persoas solicitantes dispoñen de ferramentas informáticas cun coñecemento básico do seu funcionamento, polo que queda acreditado que teñen acceso e dispoñibilidade aos medios electrónicos necesarios.
De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, será requirida para que a emende a través da presentación electrónica. Para estes efectos, considerarase data de presentación da solicitude aquela en que se realizase a emenda.
3. Para poderen presentar a solicitude por medios electrónicos, as persoas solicitantes deberán reunir os seguintes requisitos:
A oficina virtual do Igape acepta todos os certificados validados pola plataforma @firma da Administración xeral do Estado, que son os que figuran nesta relación: http://administracionelectronica.gob.es/PAe/aFirma-Anexo-PSC.
Unha vez asinado o formulario de solicitude co IDE, mediante certificación dixital do presentador, e transferido este ao Igape, procederase á anotación dunha entrada no Rexistro electrónico da Xunta de Galicia.
No momento da presentación, o Rexistro expedirá, empregando as características da aplicación electrónica, un recibo en que quedará constancia do feito da presentación.
As persoas solicitantes poderán obter en todo momento un xustificante da recepción por parte do Igape dos termos da súa solicitude contidos no formulario. Deberano solicitar no enderezo de correo electrónico informa@igape.es, indicando os 40 caracteres do IDE e o enderezo de correo electrónico en que desexan recibir o xustificante.
Artigo 8. Documentación complementaria
As persoas interesadas deberán achegar, xunto coa solicitude, a seguinte documentación:
1. Acreditación dos requisitos mínimos segundo o expresado no artigo 4 destas bases.
a) Currículum vitae.
b) Copia do pasaporte no caso de que a persoa solicitante sexa estranxeira e non teña o número de identificación de estranxeiría (NIE).
c) Xustificante de ter pagadas as taxas para a obtención do título de estudos universitarios acadado segundo o expresado no artigo 4.3, na falta do título. A titulación pódese obter e acreditar ata cinco (5) días despois da publicación da resolución de concesión; a non presentación suporá a imposibilidade de ser persoa beneficiaria da bolsa. No caso de títulos expedidos por centros estranxeiros ou privados, será preciso que os acrediten cunha copia da homologación concedida polo Ministerio de Educación español (isto non se require para os títulos de máster).
d) Se for o caso, certificado sobre o nivel do idioma inglés.
2. Acreditación doutros requisitos baremables segundo o expresado no artigo 12.2 destas bases:
a) Acreditación, se é o caso, da formación específica de posgrao en comercio exterior segundo o expresado no artigo 12.2.d): copia do certificado de realización dun curso completo, no cal conste o número de horas ou créditos do curso. O curso deberá estar finalizado antes da data de presentación da solicitude, agás os másteres citados no artigo 12.2.d), que poderán estar finalizados ata o 31 de xullo de 2026 e deberán estar incluídos na solicitude no prazo de sete (7) días contados desde esa data.
b) Acreditación, se é o caso, doutra formación de posgrao segundo o expresado no artigo 12.2.e): copia do certificado de realización dun curso completo, no cal conste o número de horas ou créditos do curso. O curso deberá estar finalizado antes da data de presentación da solicitude.
c) Se for o caso, certificados relativos ao nivel de idiomas segundo o estipulado no artigo 5.2 das bases.
De conformidade co artigo 28.3 da Lei 39/2015, do 1 de outubro, do procedemento administrativo común das administracións públicas, non será necesario achegar os documentos xa presentados anteriormente pola persoa interesada ante calquera Administración. Neste caso, a persoa interesada deberá indicar en que momento e ante que órgano administrativo presentou os ditos documentos, que serán recadados electronicamente a través das redes corporativas ou mediante consulta ás plataformas de intermediación de datos ou outros sistemas electrónicos habilitados para o efecto, excepto que conste no procedemento a oposición expresa da persoa interesada.
De forma excepcional, se non se poden obter os citados documentos, poderáselle solicitar novamente á persoa interesada que os achegue.
A documentación complementaria deberá presentarse electronicamente.
Se algunha das persoas interesadas presenta a documentación complementaria presencialmente, será requirida para que a emende a través da presentación electrónica. Para estes efectos, considerarase data de presentación aquela en que se realizase a emenda.
As persoas interesadas responsabilizaranse da veracidade dos documentos que presenten. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, a Administración poderá solicitar de maneira motivada o cotexo das copias achegadas pola persoa interesada, para o cal poderá requirir a exhibición do documento ou da información orixinal.
Artigo 9. Comprobación de datos
1. Para a tramitación deste procedemento consultaranse automaticamente os datos incluídos nos seguintes documentos en poder da Administración actuante ou elaborados polas administracións públicas, excepto que a persoa interesada se opoña á súa consulta:
a) DNI/NIE da persoa solicitante.
b) DNI/NIE da persoa representante.
c) Consulta de datos de residencia con data de última variación.
d) Consulta de títulos universitarios oficiais, segundo o expresado no artigo 4.3 das bases.
e) Consulta de inhabilitacións para obter subvencións e axudas.
f) Comprobación de subvencións e axudas públicas concedidas.
2. No caso de que as persoas interesadas se opoñan a esta consulta, deberán indicalo no recadro correspondente habilitado no formulario de solicitude (anexo I) e achegar os documentos.
Cando así o exixa a normativa aplicable, solicitarase o consentimento expreso da persoa interesada para realizar a consulta.
3. Excepcionalmente, no caso de que algunha circunstancia imposibilite a obtención dos citados datos, poderáselles solicitar ás persoas interesadas que presenten os documentos correspondentes.
Artigo 10. Trámites administrativos posteriores á presentación da solicitude
Todos os trámites administrativos que as persoas interesadas deban realizar tras a presentación da solicitude deberán realizarse electronicamente accedendo a través do enderezo da internet https://spiga-sede.igape.es
Artigo 11. Órganos competentes
A competencia para a instrución do procedemento de concesión da subvención correspóndelle á Área de Internacionalización do Igape e a competencia para ditar a resolución, que poña fin ao procedemento na vía administrativa, correspóndelle á persoa titular da Dirección Xeral do Igape, por delegación do Consello de Dirección do Igape.
As solicitudes serán avaliadas por un comité de selección, que estará presidido pola persoa titular da Subdirección de Internacionalización (ou o seu suplente, en caso de necesidade) e integrado por outros dos membros de entre o persoal técnico do Igape (ou os seus suplentes, en caso de necesidade), designados polo presidente do Comité de Selección, e un deles actuará como secretario.
Artigo 12. Instrución dos procedementos
1. Todas as persoas aspirantes que presentaron a súa solicitude dentro do prazo establecido na resolución da convocatoria serán convocadas a probas eliminatorias de inglés e, opcionalmente ata un máximo de dous idiomas adicionais indicados na solicitude (chinés, alemán e/ou francés), agás que acheguen certificado de idiomas segundo o anexo II, con menos de tres anos de antigüidade na data da fin do prazo de presentación de solicitudes.
Todas as persoas candidatas deberán superar ou certificar, polo menos, un nivel B2 de inglés, así como un nivel superior do idioma inglés ou adicionais, de ser o caso, para seren elixibles para a incorporación a aqueles destinos que poidan exixir características máis restritivas, como os citados no artigo 5.2.
Os aspirantes que non comparezan ou non acaden a cualificación de apto B2 na proba de inglés ou non acheguen certificado do idioma inglés cun nivel B2 segundo o anexo II quedarán excluídos do proceso de selección.
As probas de idiomas constarán dunha parte escrita e outra oral, nas datas, horarios e lugares de realización que se comunicarán no taboleiro de anuncios e na páxina web do Igape, cun mínimo de cinco días de antelación e poderán ter lugar en calquera data a partir do día seguinte ao da data de finalización do prazo de presentación de solicitudes. As probas de idiomas terán lugar en Santiago de Compostela, e serán por conta da persoa solicitante, se é o caso, os gastos de desprazamento, estadía e manutención.
2. O Comité de Selección realizará unha lista provisional de candidatos segundo a puntuación obtida conforme o seguinte baremo:
a) Proba de inglés ou certificado válido (nivel C1: 5 puntos, nivel C2: 10 puntos).
b) Resultado da proba ou certificado válido de idioma adicional 1 (nivel B2: 6 puntos; nivel C1: 8 puntos; nivel C2: 10 puntos).
c) Resultado da proba ou certificado válido de idioma adicional 2 (nivel B2: 6 puntos; nivel C1: 8 puntos; nivel C2: 10 puntos).
d) Formación específica de posgrao en comercio exterior (máximo 20 puntos nesta alínea. Obterá 5 puntos por curso completo de 140 a 299 horas (entre 14 e 29,9 créditos); 10 puntos por curso completo de 300 horas ou máis (30 ou máis créditos); 20 puntos por máster en Comercio Internacional, MBA, máster en Márketing, Márketing Dixital, Márketing en liña ou similar.
Polo que se refire a esta formación o Igape pode exixir información adicional para a súa acreditación (información da entidade que impartiu a formación, temario do curso, formadores...).
e) Outra formación de posgrao relacionada coa xestión empresarial (máximo 10 puntos nesta alínea). Obterá 2 puntos por curso completo de 140 a 299 horas (entre 14 e 29,9 créditos); 4 puntos por curso completo de 300 horas ou máis (30 ou máis créditos); 10 puntos por máster. Polo que se refire a esta formación o Igape pode exixir información adicional para a súa acreditación (información da entidade que impartiu a formación, temario do curso, formadores...).
Para os cursos de formación incluídos nas letras d) e e), a puntuación máxima para cursos realizados en liña, independentemente do número de cursos realizados, será de 5 puntos.
f) Entrevista persoal: a puntuación máxima será de 40 puntos. Soamente accederán á entrevista aquelas persoas candidatas que cumpran cos requisitos mínimos exixidos no artigo 4 destas bases. No caso de alegacións á lista provisional que publique o Igape que supoñan que a persoa solicitante modifique a súa condición de non apto a apto, o Igape proporá unha data para realizarlle a entrevista á dita persoa solicitante.
A suma total das puntuacións será, como máximo, de 100 puntos.
Artigo 13. Proposta provisional
1. A lista provisional de candidatos admitidos, coa súa correspondente asignación de destinos e dotacións das bolsas, publicarase na páxina web do Igape, https://spiga-sede.igape.es, e abrirase un prazo de cinco (5) días hábiles para que as persoas interesadas poidan presentar alegacións e para presentar a documentación acreditativa das circunstancias alegadas nas solicitudes que falte.
2. Unha vez analizadas as alegacións, o órgano instrutor publicará na súa páxina web https://spiga-sede.igape.es a listaxe de candidatos admitidos, coa súa correspondente asignación de destinos e dotacións das bolsas, e elevará a proposta de resolución á directora xeral do Igape, quen resolverá por delegación do Consello de Dirección do Igape.
En caso de empate, terase en conta o número de expediente, que se outorgará segundo a data de presentación da solicitude.
Artigo 14. Resolución e notificacións
1. A resolución definitiva da convocatoria do programa comprenderá o detalle do baremo aplicado para a avaliación das solicitudes, o número de bolsas adxudicadas, con indicación da data de comezo da bolsa, o destino e a súa contía económica.
Tamén incluirá a lista de solicitudes denegadas, indicando a súa causa de exclusión, e de solicitudes arquivadas.
Así mesmo, comprenderá unha lista dun máximo de 50 persoas candidatas en posto de reserva (as 50 seguintes por orde de puntuación). Esta lista de reservas servirá para cubrir posibles renuncias, incidencias, incumprimentos ou bolsas adicionais debido a remanentes orzamentarios. Non se poderán conceder bolsas da lista de reservas por un tempo inferior a seis meses, tendo en conta o período inicial e o período de prórroga.
2. O anuncio da publicación do texto completo da resolución definitiva no enderezo https://spiga-sede.igape.es será obxecto de publicación no Diario Oficial de Galicia, de acordo co artigo 45 da Lei 39/2015, do 1 de outubro, do procedemento administrativo común das administracións públicas.
3. O prazo máximo para resolver e publicar a resolución será o establecido na resolución da convocatoria, transcorrido o cal se poderá entender desestimada por silencio administrativo a solicitude de concesión da axuda.
4. As notificacións das resolucións e actos administrativos do procedemento que non sexan obxecto de publicación efectuaranse só por medios electrónicos, nos termos previstos na normativa reguladora do procedemento administrativo común.
De conformidade co artigo 45.2 da Lei 4/2019, do 17 de xullo, de administración dixital de Galicia, as notificacións electrónicas realizaranse a través do Sistema de notificación electrónica de Galicia-Notifica.gal. Este sistema remitiralles ás persoas interesadas avisos da posta á disposición das notificacións á conta de correo e/ou teléfono móbil que consten na solicitude. Estes avisos non terán, en ningún caso, efectos de notificación efectuada e a súa falta non impedirá que a notificación sexa considerada plenamente válida.
De conformidade co artigo 47 da Lei 4/2019, do 17 de xullo, de administración dixital de Galicia, as persoas interesadas deberán crear e manter o seu enderezo electrónico habilitado único a través do Sistema de notificación electrónica de Galicia-Notifica.gal, para todos os procedementos administrativos tramitados pola Administración xeral e polas entidades instrumentais do sector público autonómico. En todo caso, a Administración xeral e as entidades do sector público autonómico de Galicia poderán, de oficio, crear o indicado enderezo, para os efectos de asegurar o cumprimento por parte das persoas interesadas da súa obriga de relacionarse por medios electrónicos.
As notificacións por medios electrónicos entenderanse efectuadas no momento en que se produza o acceso ao seu contido e entenderanse rexeitadas cando transcorresen dez días naturais desde a posta á disposición da notificación sen que se acceda ao seu contido.
Se o envío da notificación electrónica non for posible por problemas técnicos, efectuarase a notificación polos medios previstos na normativa reguladora do procedemento administrativo común.
Artigo 15. Réxime de recursos
As resolucións ditadas ao abeiro destas bases porán fin á vía administrativa e contra elas poderán interporse os seguintes recursos, sen prexuízo de que as persoas interesadas poidan exercer calquera outro que consideren procedente:
a) Potestativamente, recurso previo de reposición, que resolverá a persoa titular da Dirección Xeral do Igape, por delegación do Consello de Dirección do Igape, no prazo dun mes desde o día seguinte ao da súa publicación, ou en calquera momento a partir do día seguinte a aquel en que, de acordo co establecido nestas bases reguladoras, se produza o acto presunto.
b) Recurso contencioso-administrativo, ante os xulgados do contencioso-administrativo de Santiago de Compostela, no prazo de dous meses contados desde o día seguinte ao da súa publicación, ou no prazo de seis meses contados a partir do día seguinte a aquel en que se produza o acto presunto.
Artigo 16. Modificación da resolución
1. Unha vez ditada a resolución de concesión, observarase o establecido no artigo 35 do Decreto 11/2009. Admitiranse modificacións da resolución inicial dentro dos límites xerais establecidos nestas bases relativas a calquera alteración das condicións que se tiveron en conta para a concesión da bolsa, sempre e cando estes cambios non alteren o baremo ou desvirtúen o proxecto.
2. A persoa beneficiaria deberá comunicarlle ao Igape a modificación das condicións establecidas na resolución. Para solicitar a modificación, deberá cubrir previamente o formulario electrónico sinalado no artigo 7 das bases e presentar a instancia de modificación xerada pola aplicación dirixida á Dirección Xeral do Igape. O acto polo que se acorde ou se denegue a modificación da resolución será ditado, por delegación do Consello de Dirección do Igape, pola persoa titular da Dirección Xeral do Igape, logo da instrución do correspondente expediente, no cal se lles dará audiencia, de ser preciso, ás persoas interesadas.
Artigo 17. Obrigas das persoas bolseiras
Sen prexuízo doutras obrigas conforme estas bases e demais disposicións aplicables, as persoas beneficiarias das bolsas quedarán suxeitas ás seguintes obrigas:
a) Incorporarse ao seu destino dentro do prazo fixado na resolución de concesión. A non incorporación na data establecida na resolución sen que medie comunicación ao Igape suporá renuncia á bolsa. O atraso na incorporación na data prevista suporá o axuste da dotación en proporción aos días de estadía en Galicia e no destino estranxeiro. Neste sentido, o inicio da bolsa producirase entre o 4 e o 20 de xaneiro de cada ano, e esta finalizará once (11) meses despois, entre o 3 e o 19 de decembro do mesmo ano, salvo causas excepcionais que sexan autorizadas polo Igape.
b) Cumprir as normas de conduta da oficina ou entidade de destino da persoa bolseira.
c) Elaborar e presentarlle ao Igape os estudos, informes ou traballos prácticos mentres a dure a bolsa e, antes do remate de cada período (período inicial e –de ser o caso– prórroga), presentar unha memoria final sobre os traballos realizados e, de for o caso, devolver –no prazo de dez (10) días desde o remate final– o material non funxible entregado polo Igape para o desenvolvemento da bolsa.
d) Xestionar, tramitar e obter os visados, permisos ou autorizacións exixidos polas autoridades do país ou cidade de destino e presentar unha copia no Igape antes de ocupar o seu destino.
e) Vacinarse e recibir os tratamentos preventivos necesarios para o país ou cidade de destino.
f) Contratar un seguro de enfermidade e accidentes para os casos de destino no estranxeiro por unha duración equivalente á da bolsa e as súas posibles prórrogas, e presentar unha copia no Igape antes de ocupar o seu destino. A persoa bolseira será dada de alta na Seguridade Social desde o Igape, polo que durante a súa estadía en Galicia terá a cobertura sanitaria da Seguridade Social, así como da mutua correspondente no caso de accidente laboral ou enfermidade profesional.
g) Comunicarlle ao Igape a obtención doutras bolsas ou axudas de carácter similar, así como a modificación das circunstancias que fundamentasen a concesión. Esta comunicación deberá efectuarse no momento en que se coñeza e, en todo caso, con anterioridade ao aboamento da bolsa.
h) Proceder ao reintegro da bolsa percibida, total ou parcialmente, no suposto de incumprimento das condicións establecidas para a súa concesión ou nos supostos previstos no título II da Lei 9/2007, do 13 de xuño, de subvencións de Galicia.
i) Dispor dun ordenador portátil e conexión á internet durante todo o tempo de desfrute da bolsa, dado que é necesario para a realización dos labores da súa formación.
Procesador: 64 bits (x86).
Memoria RAM: recomendable 16 GB, mínimo 8 GB.
Disco duro: 240 Gb Serial ATA a 5400 r.p.m.
Conexión de rede Gigabit Ethernet (10/100/1000 NIC) integrada.
Tecnoloxías sen fíos.
Portos E/S externos:
Portos USB 2.0 ou superior.
1 x RJ-45.
O sistema operativo deberá ser Windows 10 Enterprise ou Profesional, ou Windows 11 Enterprise ou Profesional (en ningún caso versións Starter ni Home, nin as súas correlativas de Windows 8.X) e dispor das correspondentes licenzas de ofimática ou calquera outro software que requira o Igape. As características antes sinaladas poderán ser obxecto de actualización, de ser necesario, entre a data de publicación destas bases e a resolución de concesión e pagamento do anticipo, o que se avisará coa suficiente antelación por parte do Igape.
O gasto de compra do ordenador portátil será asumido polo Igape nas condicións referidas no artigo 6.2.d) e o importe máximo de 1.000 € aboaráselle á persoa bolseira xunto co pagamento do anticipo sinalado no artigo 19.1.a), que queda suxeito a xustificación posterior. No caso de que o importe xustificado sexa inferior aos 1.000 € anticipados, a persoa bolseira deberá proceder á devolución da diferenza.
Se a persoa bolseira xa dispón dun portátil que cumpra os requisitos mínimos antes mencionados, poderá obviar a compra dun novo portátil pero deberá achegar declaración xurada da posesión deste cos requisitos técnicos establecidos na solicitude de axuda de xeito que renuncia á partida de 1.000 €, que xa non se engadirá ao anticipo sinalado no artigo 19.1.a).
O incumprimento desta obriga poderá dar lugar ao inicio de incumprimento total e a perda da bolsa. O Igape poderá solicitarlle á persoa bolseira unha revisión técnica do portátil.
j) Participar nas actividades formativas que organice o Igape durante a bolsa, presenciais ou en liña.
k) Todo isto sen prexuízo das demais obrigas que resulten do artigo 11 da Lei 9/2007, do 13 de xuño, de subvencións de Galicia.
l) Nos casos de destinos no estranxeiro, inscribirse no Rexistro de Matrícula da Oficina Consular ou da Sección Consular da Misión Diplomática que corresponda á circunscrición onde se atopen, segundo o establecido no Real decreto 3425/2000, do 15 de decembro, sobre inscrición dos españois en rexistros de matrícula das oficinas consulares no estranxeiro.
Artigo 18. Xustificación da bolsa
1. Para o cobramento da bolsa concedida, a persoa bolseira, dentro do prazo establecido na resolución da convocatoria, deberá cubrir o formulario electrónico de liquidación a través da aplicación establecida no enderezo da internet https://spiga-sede.igape.es. Deberán cubrirse necesariamente todos os campos establecidos como obrigatorios, tras o cal a aplicación emitirá un identificador de documento electrónico de liquidación (IDEL).
2. No caso de que a solicitude de cobramento non se presente en prazo ou a xustificación sexa incorrecta, requirirase o bolseiro/a para que corrixa os erros ou defectos observados no prazo de dez (10) días hábiles. A falta de presentación da xustificación no prazo improrrogable establecido comportará a perda do dereito ao cobramento total ou parcial da bolsa, a exixencia do reintegro e demais responsabilidades establecidas na Lei 9/2007, segundo o disposto no artigo 45.2 do seu regulamento. A presentación da xustificación neste prazo adicional non eximirá a persoa bolseira das sancións que, conforme a lei, correspondan. A xustificación cumprirá, en todo caso, os requisitos establecidos nos artigos 28 e 30 da dita Lei 9/2007.
3. Xunto coa solicitude de cobramento, a persoa bolseira presentará a seguinte documentación:
a) Para solicitar o cobramento dos pagamentos trimestrais previstos na letra b) dos artigos 19.1 e 19.2:
1. Memoria das actividades realizadas ata a data de solicitude do cobramento, cunha descrición en detalle de cada acción realizada –eventos, visita a feiras sectoriais, reunións destacables polos temas tratados ou polo perfil das persoas participantes nela, e tarefas singulares levadas a cabo no período que corresponda. Para facilitar a realización deste informe, o Igape facilitará un modelo xeral que cada persoa bolseira adaptará ao seu caso particular.
2. Informe de vida laboral da persoa bolseira durante o período de prácticas formativas ata a data de solicitude do cobramento.
b) Para solicitar o cobramento dos pagamentos finais previstos na letra c) dos artigos 19.1 e 19.2:
1. Memoria final das actividades realizadas.
2. Informe de vida laboral da persoa bolseira durante o período de prácticas formativas que leve executado.
c) Para solicitar o cobramento dos pagamentos dos gastos indicados no artigo 19.3:
1º. Xustificantes de gastos e do pagamento de taxas de visado e de gastos de desprazamento a eventos, empresas ou entidades distintas do destino asignado, relacionados co obxecto da bolsa (avión, tren, autobús, hotel, taxi, aparcadoiro, autoestrada, compensación por quilometraxe; mediante facturas, billetes e/ou tarxetas de embarque e documentos de pagamento), xunto co informe da actividade realizada no caso de desprazamento a eventos ou reunións.
2º. Xustificantes de gastos e do pagamento da viaxe de ida para incorporación a destino e retorno a Galicia unha vez rematada a bolsa en destino, no período inicial ou no período de prórroga (mediante facturas, billetes e/ou tarxetas de embarque e documentos de pagamento).
A liquidación do gasto de seguro de accidentes e enfermidades e da compra de portátil farase no primeiro trimestre da bolsa.
O Igape poderá solicitar as aclaracións pertinentes á documentación presentada.
4. A persoa beneficiaria deberá presentar a documentación xustificativa obrigatoriamente por vía electrónica.
A persoa beneficiaria responsabilizarase da veracidade dos documentos que presente. A achega das copias dixitalizadas implica a autorización para que a Administración acceda e trate a información persoal contida en tales documentos. Excepcionalmente, cando a relevancia do documento no procedemento o exixa ou existan dúbidas derivadas da calidade da copia, o Igape poderá solicitar de maneira motivada que presenten unha copia auténtica electrónica.
5. Con carácter previo ao pagamento, as persoas beneficiarias deberán presentar unha declaración responsable de estar ao día no cumprimento das obrigas tributarias, fronte á Seguridade Social e de non ter pendente de pagamento ningunha outra débeda coa Administración da Comunidade Autónoma.
6. Advírtese que calquera discrepancia entre a documentación xustificativa e as declaracións da solicitude de axuda poderá ser motivo de inicio de expediente de incumprimento que, se é o caso, poderá supor a modificación ou revogación da concesión e o reintegro, total ou parcial, das cantidades previamente aboadas.
Artigo 19. Aboamento da bolsa
1. A dotación da bolsa aboaráselle ao/á bolseiro/a segundo o seguinte detalle:
a) Un 30 % da dotación asociada a destino no momento da resolución de concesión da bolsa. Xunto con este importe achegarase o importe íntegro da axuda relativo á contratación de seguro médico e de accidentes e o da compra do portátil segundo o establecido nos puntos 5 e 6 de artigo 6.
b) Un 60 % da dotación asociada a destino cando remate o primeiro trimestre e cumpridas as obrigas da bolsa nese período.
c) Un 10 % cando finalice o prazo de duración da bolsa e cumpridas totalmente as obrigas desta.
2. No caso de prórroga, os pagamentos serán segundo o seguinte detalle:
a) Un 30 % da dotación asociada a destino un mes antes da incorporación ao destino da prórroga.
b) Un 60 % da dotación asociada a destino cando remate o primeiro trimestre e cumpridas as obrigas da bolsa nese período.
c) Un 10 % cando finalice a prórroga da bolsa e cumpridas totalmente as obrigas desta.
O atraso na incorporación á bolsa por causas non imputables ao Igape suporá unha menor duración da bolsa e o axuste proporcional na dotación desta ou ben o inicio do incumprimento total se a demora pode ser considerada excesiva.
3. Exclúese dos anteriores pagamentos a contía para gastos indicados no artigo 6.2.a) e b). A persoa bolseira deberá solicitar o seu cobramento no mesmo prazo que a solicitude de cobramento. Logo de autorización, admitirase a liquidación de gastos fóra dos prazos da solicitude de cobramento cando as circunstancias así o aconsellen.
4. A dotación e o calendario de pagamentos das bolsas outorgadas por renuncias doutras persoas bolseiras estableceranse na resolución de concesión da bolsa en función do período do seu desfrute.
5. A concesión do anticipo, establecido na letra a) dos números 1 e 2 deste artigo, será obxecto de resolución motivada e poderá chegar ata o 30 % da dotación da bolsa, logo de autorización polo Consello da Xunta nos termos previstos no artigo 63.un.1 e 63.3 do Decreto 11/2009. O importe conxunto dos pagamentos á conta e do pagamento anticipado non excederá a anualidade prevista en cada exercicio orzamentario e pode acadar ata o 90 % da subvención, logo de autorización polo Consello da Xunta nos termos previstos nos artigos 62.2 e 62.4 do dito Decreto 11/2009.
Artigo 20. Certificado da bolsa
Tras a presentación no Igape da memoria final das actividades realizadas, a persoa bolseira terá dereito a recibir un certificado de persoa beneficiaria da bolsa concedida. Non se recibirá certificado no caso de renuncia á bolsa antes de que transcorran seis (6) meses desde o inicio.
Artigo 21. Incumprimento da bolsa
1. Procederá a revogación da bolsa e, se é o caso, o reintegro das cantidades anticipadas e os seus xuros de demora devindicados desde o seu pagamento, cando a persoa bolseira incumpra calquera das bases da convocatoria ou os compromisos contraídos na resolución de concesión, así como nos casos previstos no artigo 33 e concordantes da Lei 9/2007, de subvencións de Galicia.
2. Cando remate o primeiro semestre, o Igape revisará o cumprimento do programa de formación asignado e reserva para si a facultade de revogar a bolsa se a persoa bolseira incumpre as súas obrigas, sen que sexa por algunha causa xustificada ou motivo de forza maior.
3. No caso de que a persoa bolseira renuncie á bolsa concedida, deberá comunicarllo ao Igape por escrito con, polo menos quince (15) días de antelación ao da data en que abandone o seu posto. Este prazo establécese con carácter xeral sen prexuízo de que por causas xustificadas non se poida cumprir o dito prazo.
Se a persoa bolseira renuncia á bolsa antes de que transcorran seis (6) meses desde o seu inicio por atopar un posto de traballo, unha vez asinado o contrato deberá presentalo no Igape, xunto coa vida laboral actualizada en que se recolla a nova situación –para o caso de terceiros países, a vida laboral poderá ser substituída por documento local análogo. Esta circunstancia dará lugar ao inicio dun procedemento de incumprimento parcial. Nos casos de incumprimento parcial, a cantidade anticipada que se vai devolver obterase pola diferenza entre a dotación percibida ata o momento da renuncia e a que lle corresponde polos días efectivamente desfrutados.
No caso de renuncia antes de que transcorran seis (6) meses desde o inicio da bolsa por outras causas, considerarase incumprimento total. O incumprimento total comportará a devolución de todas as cantidades percibidas, excepto o aboado en concepto de gastos de desprazamento.
4. En todo o non regulado nestas bases rexerá o disposto nos capítulos I e II do título II da Lei 9/2007, do 13 de xuño, de subvencións de Galicia e, no título V, capítulos I e II, do Decreto 11/2009, polo que se aproba o seu regulamento.
5. Devolución voluntaria da subvención.
De acordo co establecido no artigo 64 do Decreto 11/2009, as persoas beneficiarias poderán realizar, sen o requirimento previo da Administración, a devolución total ou parcial da subvención concedida, mediante o seu ingreso na conta ES83 2080 0388 2731 1000 0584 en concepto de devolución voluntaria da subvención.
En todo caso, a persoa beneficiaria deberá presentar ante o órgano concedente copia xustificativa da devolución voluntaria realizada, na cal consten a data do ingreso, o seu importe e o número do expediente, e a denominación da subvención concedida.
Artigo 22. Réxime sancionador
Ás persoas beneficiarias das bolsas reguladas nestas bases seralles de aplicación o réxime de infraccións e sancións previsto no título IV da Lei 9/2007.
Artigo 23. Fiscalización e control
As persoas beneficiarias someteranse ás actuacións de control que efectúe o Igape e ás de control financeiro que lle correspondan á Intervención Xeral da Comunidade Autónoma de Galicia, ás previstas na lexislación do Consello de Contas e do Tribunal de Contas, así como ás que poidan efectuar os órganos competentes da Unión Europea. Neste sentido, as persoas beneficiarias teñen a obriga de facilitar toda a información que lles sexa requirida polos ditos organismos.
Artigo 24. Transparencia e bo goberno
1. Respecto das axudas concedidas, deberá darse cumprimento ás obrigas de transparencia contidas no artigo 17 da Lei 1/2016, do 18 de xaneiro, de transparencia e bo goberno, e no artigo 15 da Lei 9/2007, do 13 de xuño, de subvencións de Galicia.
2. En virtude do disposto no artigo 4 da Lei 1/2016, do 18 de xaneiro, de transparencia e bo goberno, as persoas físicas e xurídicas beneficiarias de subvencións teñen a obriga de subministrar á Administración, ao organismo ou á entidade das previstas no artigo 3.1 da Lei 1/2016, do 18 de xaneiro, a que se encontren vinculadas, logo de requirimento, toda a información necesaria para o cumprimento por parte daquela das obrigas previstas no título I da citada lei.
Artigo 25. Remisión normativa
En todo o non previsto nestas bases será de aplicación o establecido na Lei 9/2007, do 13 de xuño, de subvencións de Galicia; no Decreto 11/2009, do 8 de xaneiro, polo que se aproba o seu regulamento; na Lei 38/2003, do 17 de novembro, xeral de subvencións; no Decreto 887/2006, do 21 de xullo, polo que se aproba o seu regulamento; no Real decreto 1493/2011, do 24 de outubro, e no resto da normativa que resulte de aplicación.
En canto ao cómputo de prazos, aplicarase o disposto no artigo 30 da Lei 39/2015, do 1 de outubro, do procedemento administrativo común das administracións públicas.
Artigo 26. Habilitación para o desenvolvemento
Facúltase a persoa titular da Dirección da Área de Internacionalización para que dite, no ámbito das súas competencias, as resolucións, instrucións, aclaracións ou interpretacións necesarias para o desenvolvemento e cumprimento destas bases reguladoras.
