En virtude da Resolución do 22 de xaneiro de 2024 (DOG núm. 20, do 29 de xaneiro) convocouse o proceso selectivo para o ingreso pola quenda de acceso libre e de promoción interna, polo sistema de concurso-oposición, no corpo facultativo superior de Administración especial da Administración xeral da Comunidade Autónoma de Galicia, subgrupo A1, escala de veterinarios. Na dita resolución establécese como sistema selectivo o de concurso-oposición.

A base II.3 da Resolución do 22 de xaneiro de 2024 dispón que os méritos enumerados na súa base II.2 se deberán referir á data de finalización da presentación das solicitudes de participación neste proceso e figurarán incorporados ao expediente electrónico persoal na data que se estableza por resolución da Dirección Xeral da Función Pública que será publicada no Diario Oficial de Galicia.

Por outra banda, mediante a Resolución do 5 de decembro de 2023, da Dirección Xeral da Función Pública, dítanse as instrucións para regular o contido, uso e acceso ao expediente persoal electrónico do persoal empregado público da Administración xeral da Comunidade Autónoma de Galicia e das súas entidades públicas instrumentais (DOG núm. 237, do 15 de decembro). Esta resolución ten por obxecto, ademais, a regulación dos efectos dos datos almacenados de xeito electrónico no dito expediente persoal, ao que se accede a través da plataforma da canle do emprego público de Galicia (FIDES).

Na instrución cuarta da Resolución do 5 de decembro de 2023 establécese que os datos do expediente electrónico se empregarán na tramitación dos procesos de selección de persoal, polo que cómpre que as persoas que participan no proceso selectivo mencionado na presente resolución acheguen a documentación acreditativa dos seus méritos do xeito previsto na Resolución do 5 de decembro de 2023 a través da dita canle do emprego público de Galicia (FIDES).

En cumprimento da previsión anterior, e co obxecto de que as persoas aspirantes que superaron a fase de oposición deste proceso selectivo poidan acreditar os méritos cos que conten na fase de concurso, esta dirección xeral

RESOLVE:

Primeiro. Obxecto

Publicar o procedemento que se deberá seguir para acreditar os méritos correspondentes á fase de concurso do proceso selectivo para o ingreso pola quenda de acceso libre e de promoción interna, polo sistema de concurso-oposición, no corpo facultativo superior de Administración especial da Administración xeral da Comunidade Autónoma de Galicia, subgrupo A1, escala de veterinarios, convocado pola Resolución do 22 de xaneiro de 2024.

De acordo co establecido na base II.3 da convocatoria, os méritos que se bareman na fase de concurso deberán referirse á data de finalización da presentación das solicitudes de participación neste proceso, que foi o 26 de febreiro de 2024.

Segundo. Procedemento

As persoas aspirantes que teñan que presentar documentación acreditativa dos méritos baremables na fase de concurso do proceso selectivo a que se refire esta resolución anexarana ao seu expediente persoal electrónico, ao que accederán a través da canle do emprego público de Galicia (FIDES) no enderezo https://fides.xunta.gal seguindo o procedemento establecido na Resolución do 5 de decembro de 2023 pola que se ditan instrucións para regular o contido, uso e acceso ao expediente persoal electrónico do persoal empregado público da Administración xeral da Comunidade Autónoma de Galicia e das súas entidades públicas instrumentais.

Unha vez que accedan a FIDES, comprobarán os datos que figuran no seu expediente persoal electrónico:

a) No suposto de que as persoas aspirantes estean conformes cos datos consultados porque os méritos baremables neste proceso nos apartados de experiencia profesional externa, formación continuada, galego e cursos de idiomas figuren no estado de validados, ou estean incluídos correctamente no apartado de experiencia profesional interna nos seus distintos subapartados, non precisarán realizar ningunha actuación.

b) No suposto de que a persoa aspirante non estea conforme cos datos consultados por non constaren no expediente electrónico ou por estaren incompletos, deberá ou ben incorporar o mérito non rexistrado no apartado correspondente de FIDES, ou ben presentar unha alegación manifestando a súa desconformidade de acordo co procedemento descrito no punto seguinte, xunto coa documentación acreditativa en calquera dos casos, ao abeiro do establecido na Resolución do 5 de decembro de 2023, para que os ditos méritos se poidan valorar neste proceso.

c) As persoas aspirantes que atopen no seu expediente electrónico persoal erros nos seus méritos nos estados de «en trámite», «validado», «duplicado» ou «descartado», ou erros no apartado da experiencia profesional interna, deberán presentar alegacións a través de FIDES, no apartado de «Inscrición en procesos selectivos», accedendo ao proceso desta resolución no que figuren inscritos/as, no bloque «Que podo facer?», opción «Presentación de alegacións», seguindo as instrucións descritas no documento de axuda que atoparán no enderezo https://www.xunta.gal/funcion-publica/procesos-selectivos/xeracion-de-solicitudes/alegacions, a partir da data de apertura do prazo de acreditación de méritos.

Terceiro. Presentación e admisión da documentación acreditativa dos méritos e alegacións

A presentación da documentación acreditativa que se axunte canda a incorporación dun novo mérito, ou canda a formulación dunha alegación a un mérito xa existente no expediente electrónico, realizarase de conformidade co establecido nos apartados 3 e 4 da instrución oitava da Resolución do 5 de decembro de 2023, do seguinte xeito:

– Documentación electrónica: os certificados asinados electronicamente e os documentos electrónicos en formato .pdf anexaranse directamente xunto coa alta do mérito ou coa alegación electrónica a través de FIDES e presentaranse directamente desde esta plataforma sen máis trámite, tendo en conta que para que a documentación electrónica se considere válida deberá de estar provista dunha sinatura electrónica do órgano ou autoridade que emite ese documento e dun código de verificación electrónica (CVE, CSV, QR ou similar), lexibles e visibles na súa totalidade para a súa correcta comprobación polo equipo de validación de méritos. Non terán a consideración de documentos electrónicos as copias impresas, escaneamentos, fotos, capturas e outros formatos análogos que non cumpran cos requisitos deste apartado, polo que quedarán no estado de «documentación incompleta (DI)» para os efectos do seu saneamento por parte da persoa aspirante, de ser o caso.

– Documentación orixinal en papel: se a documentación que se axunta é un documento orixinal en papel, deberá achegarse de maneira presencial por rexistro mediante calquera das formas previstas no artigo 16.4 da Lei 39/2015, do 1 de outubro, do procedemento administrativo común das administracións públicas, e terá que ir acompañada:

1. Para o caso de alta de novos méritos: da solicitude de actualización de méritos que se xerará desde o apartado «Solicitude de actualización» de FIDES, unha vez realizada a alta electrónica dos méritos.

2. Para o caso de alegacións: do anexo da alegación que se xerará a partir da alegación electrónica que se presentará en FIDES con carácter previo, de acordo co descrito no punto segundo, letra c).

A acreditación presencial dos méritos non exime da súa alta electrónica no apartado correspondente de FIDES, polo que aqueles méritos non incorporados a FIDES pola persoa aspirante se terán por non presentados, consonte o establecido no punto 6 da instrución oitava da Resolución do 5 de decembro de 2023.

Aquelas persoas que desde a entrada en vigor da Resolución do 5 de decembro de 2023, e con anterioridade á data de publicación da presente resolución no Diario Oficial de Galicia, solicitaran do xeito establecido na mesma, e coa achega da documentación correspondente, a validación dalgún mérito previamente rexistrado no expediente persoal electrónico que se atope nos estados de «pendente de presentar ou validar» ou «en trámite» non terán que presentar novamente a documentación acreditativa de tal/es mérito/s, bardante da complementaria que resulte necesaria para a súa actualización.

Non se terán en conta neste proceso outros méritos presentados polas persoas aspirantes distintos dos que figuren no seu expediente persoal electrónico, ou que se soliciten no expediente, ou se acrediten documentalmente, con posterioridade ao prazo establecido no punto quinto desta resolución.

Por se tratar dun procedemento de concorrencia competitiva non se admitirá, unha vez rematado o prazo de acreditación de méritos establecido nesta resolución e para os efectos da súa valoración neste proceso, ningunha nova documentación acreditativa de méritos, aínda que consten rexistrados na solicitude de actualización ou modificación do expediente persoal. Exceptúase aquela documentación que, xustificándoa documentalmente nese mesmo prazo, fora solicitada pola persoa interesada ao organismo ou entidade competente e non fose recibida no indicado prazo. Neste suposto admitirase a súa presentación ata o momento da finalización do prazo para a presentación de reclamacións á baremación provisional.

Cuarto. Documentación incompleta

Os méritos que na data de publicación desta resolución se atopen incorporados no expediente electrónico no estado de «acreditación documental incompleta (DI)» deberán ser acreditados. Para os acreditar, as persoas aspirantes presentarán toda a documentación que figure incompleta e xustifique a totalidade do mérito rexistrado, do xeito establecido nos apartados 3 e 4 da instrución oitava da Resolución do 5 de decembro de 2023, isto é, achegando as copias electrónicas auténticas a través de FIDES ou, cando non se dispoña de copias electrónicas auténticas, presentando a documentación orixinal en papel de maneira presencial por rexistro, acompañada da solicitude de actualización de méritos ou do anexo da alegación, segundo o caso, en calquera das formas previstas no artigo 16.4 da Lei 39/2015, do 1 de outubro.

Quinto. Prazo

O prazo para presentar a solicitude de actualización de méritos e a documentación acreditativa deles, para formular alegacións ou para sanear o estado de «acreditación documental incompleta» rematará aos dez (10) días hábiles a partir do día seguinte ao da publicación desta resolución no Diario Oficial de Galicia.

Sexto. Acreditación dos méritos

– Acceso libre:

a) Experiencia profesional: a acreditación deste mérito dependerá do ámbito de prestación dos servizos obxecto de baremación nesta epígrafe, de conformidade co disposto nas bases II.2.2.1 e II.2.2.2 da convocatoria, e articularase do seguinte xeito:

– Experiencia profesional no ámbito da Administración xeral da Comunidade Autónoma de Galicia: será apreciada de oficio pola Dirección Xeral de Emprego Público e Administración de Persoal de acordo coa información contida no apartado «Experiencia interna» de FIDES.

– Experiencia profesional noutras administracións públicas: deberase de acreditar no apartado de «Experiencia noutra Administración» de FIDES, axuntando a certificación de servizos prestados correspondente de acordo co procedemento indicado no punto terceiro desta resolución.

b) Formación: a formación acreditarase mediante a incorporación dos méritos nos apartados de «Formación continuada» ou «Cursos de idiomas», segundo o caso, de FIDES, axuntando copia auténtica ou orixinal do certificado de asistencia ao curso de acordo co procedemento expresado no punto terceiro desta resolución, certificado no que deberá constar o organismo ou entidade que organizou e impartiu a dita actividade formativa, as datas de realización e mais o número de horas lectivas, de conformidade co que establece a base II.2.2.3 da convocatoria.

Canda as certificacións que estean redactadas nun idioma distinto a calquera dos oficiais da Comunidade Autónoma de Galicia deberase fornecer a súa tradución ao castelán ou galego, que deberá efectuar:

– Un/unha tradutor/a xurado/a debidamente autorizado/a ou inscrito/a en España.

– Calquera representación diplomática ou consular do Estado español no estranxeiro.

–A representación diplomática ou consular en España do país do que é cidadá a persoa interesada.

Con carácter xeral para todos os apartados, só será preciso acreditar aqueles méritos que non consten no expediente electrónico ou respecto dos cales se faga algún tipo de alegación.

Aquelas persoas aspirantes que non estean conformes ou observen irregularidades nos méritos apreciados de oficio pola Dirección Xeral de Emprego Público e Administración de Persoal deberán de presentar a correspondente alegación nos termos previstos no punto segundo, letra c), desta resolución.

Sétimo. Estado dos méritos para ser baremados

Os méritos reflectidos no expediente electrónico persoal no apartado de experiencia profesional interna, así como os restantes méritos reflectidos neste expediente no estado de validados, serán os que teña en conta o tribunal na baremación da fase de concurso, e sempre referidos á data que se establece no punto primeiro desta resolución.

A data que se terá como referencia, para considerar un mérito como acreditado en prazo, será a «Data de acreditación documental» do expediente electrónico. Esta data xerarase internamente en FIDES no momento da presentación electrónica (no caso de documentos electrónicos) ou no momento da xeración da solicitude de acreditación de méritos (no caso de documentación orixinal en papel); neste último caso, a acreditación en prazo quedará supeditada á presentación por rexistro presencial da documentación consonte o indicado no punto terceiro desta resolución. Os méritos correctamente presentados quedarán no estado «ET» (en trámite) en tanto non se procede á súa valoración.

Os méritos incluídos no expediente electrónico persoal na data de publicación desta resolución que xa se encontren no estado de validados non se poderán presentar de novo.

Oitavo. Recursos

Esta resolución pon fin á vía administrativa e contra ela as persoas interesadas poderán presentar recurso potestativo de reposición ante a persoa titular da consellería competente en materia de función pública no prazo dun mes contado desde o día seguinte ao da súa publicación no Diario Oficial de Galicia, de conformidade co establecido na Lei 39/2015, do 1 de outubro, ou ben presentar directamente recurso contencioso-administrativo no prazo de dous meses contados desde a mesma data, de conformidade co disposto na Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 3 de xullo de 2026

O conselleiro de Facenda e Administración Pública
P.D. (Orde do 8.1.2020; DOG núm. 16, do 24 de xaneiro)
Nuria Aguilar Vázquez
Directora xeral de Emprego Público e Administración de Persoal