Examinada a solicitude de deslindamento formulada polos representantes do MVMC Monte de Entrecinsa, pertencente á CMVMC de Entrecinsa, e mais o MVMC Pixarreiras, pertencente á CMVMC de Fornelos de Filloás e Fradelo, nos concellos de Vilariño de Conso e Viana do Bolo, resultan os seguintes

Feitos:

Primeiro. O 27.8.2025, a CMVMC de Entrecinsa presentou un escrito (Rexel núm. 2025/2337374), en que solicitan a aprobación dun deslindamento coa CMVMC de Fornelos de Filloás e Fradelo.

Coa solicitude achegou a seguinte documentación:

– Acta de deslindamento.

– Arquivos xeográficos en formato vectorial.

– Certificacións dos acordos da Asemblea Xeral da CMVMC de Entrecinsa, do 9.7.2025.

– Informe de deslindamento.

Segundo. Posteriormente, con data do 10.12.2025, a comunidade presentou unha solicitude complementaria (Rexel núm. 2025/3435080), coa que achegaba a seguinte documentación adicional:

• Acta de conciliación levantada o 10.12.2025 no Xulgado de Paz de Vilariño de Conso.

• Certificación do Acordo da Asemblea Xeral da CMVMC de Fornelos de Filloás e Fradelo, do 20.9.2025.

Terceiro. O informe do Servizo de Montes do Departamento Territorial de Ourense do 16.12.2025 fai constar que a documentación achegada corresponde ao deslindamento do perímetro estremeiro entre o MVMC Monte de Entrecinsa pertencente á CMVMC de Entrecinsa, e mais o MVMC Pixarreiras pertencente á CMVMC de Fornelos de Filloás e Fradelo, desde o vértice 1 (o situado máis ao S) ata o vértice 8 (o situado máis ao L).

Logo de analizar os vértices e a súa localización obsérvase que:

• Entre os vértices 1 e 2, e tal como se sinala na propia acta do deslindamento, a liña segue a traza catastral do Regato dos Carballais; en concreto, axústase á aresta oriental da parcela coa R.C. 32093A01709015.

• Entre os vértices 4 e 5, e tal como se sinala na propia acta do deslindamento, a liña segue a traza dun cortalumes; en concreto, axústase á marxe occidental do cortalumes, de xeito que este queda situado, entre os ditos puntos, dentro do MVMC Pixarreiras.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.

Consideracións legais e técnicas:

Primeiro. Esta resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, de 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditara resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 9 de decembro de 2025, o Xurado Provincial de Montes Veciñais en Man Común acordou por unanimidade o día 22 de xuño de 2026:

Aprobar o acto de conciliación acadado polas xuntas reitoras do MVMC Monte de Entrecinsa, pertencente á CMVMC de Entrecinsa, e mais o MVMC Pixarreiras, pertencente á CMVMC de Fornelos de Filloás e Fradelo, nos concellos de Vilariño de Conso e Viana do Bolo.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 13 de xullo de 2026

José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense