O 2.6.2022, o Consello da Xunta de Galicia aprobou o Plan especial de seca da demarcación hidrográfica de Galicia Costa que foi publicado no Diario Oficial de Galicia o 1.7.2022.

O dito plan dispón que a escaseza se produce ante unha situación de redución temporal da auga dispoñible que pode poñer en risco a atención das demandas asociadas aos diferentes usos socioeconómicos.

O Plan especial de seca citado divide o territorio da demarcación hidrográfica de Galicia Costa en unidades territoriais de escaseza (UTE) (apartado 2 do Plan), establece os indicadores hidrolóxicos de escaseza en cada unha destas UTE (apartado 6.2 do Plan) e fixa os limiares para a activación e desactivación dos diferentes escenarios de escaseza (apartado 7.2.2 do Plan).

O apartado 10.4.2 do Plan especial de seca determina que se debe elaborar un informe mensual no que se analice a situación e a evolución dos indicadores hidrolóxicos de escaseza previstos.

O 8.7.2026, o director de Augas de Galicia ditou unha resolución pola que se activou a situación de prealerta ou escaseza moderada na UTE 3: río Lérez e ría de Pontevedra, na UTE 10: río Anllóns e costa da Coruña ata o límite con Arteixo e a aplicación de medidas equivalentes a un escenario de prealerta ou escaseza moderada no subsistema de Baiona, situado na UTE 1: río Verdugo, ría de Vigo e ría de Baiona.

O informe de seguimento da seca do 6.8.2026 analiza o estado da situación dos indicadores da seca o día 1.8.2026 e constata un valor dos indicadores de escaseza correspondente a unha situación de alerta ou escaseza severa na UTE 3: río Lérez e ría de Pontevedra, na UTE 10: río Anllóns e costa da Coruña ata o límite con Arteixo e no subsistema de Baiona, situado na UTE 1: río Verdugo, ría de Vigo e ría de Baiona.

O 11.8.2026, reuniuse a Oficina Técnica da Seca e propuxo activar a situación de alerta ou escaseza severa na UTE 3: río Lérez e ría de Pontevedra, na UTE 10: río Anllóns e costa da Coruña ata o límite con Arteixo e activar a aplicación de medidas equivalentes a un escenario de prealerta ou escaseza moderada no subsistema de Baiona, situado na UTE 1: río Verdugo, ría de Vigo e ría de Baiona.

O apartado 10.4.2 do Plan especial de seca citado dispón que a Presidencia de Augas de Galicia é o órgano competente para a activación do escenario de alerta ou escaseza severa.

De acordo co anterior, esta presidencia

RESOLVE:

1. Activar o escenario de alerta ou escaseza severa na unidade territorial de escaseza 3: río Lérez e ría de Pontevedra e na unidade territorial de escaseza 10: río Anllóns e costa da Coruña ata o límite con Arteixo ata o río Anllóns.

2. Activar a aplicación de medidas equivalentes a un escenario de alerta ou escaseza severa no subsistema de Baiona, situado na unidade territorial de escaseza 1: río Verdugo, ría de Vigo e ría de Baiona.

Santiago de Compostela, 11 de agosto de 2026

Ángeles Vázquez Mejuto
Presidenta de Augas de Galicia