Visto o expediente administrativo electrónico número 3331/2026, relativo ao Proxecto de expropiación dos bens e dereitos necesarios para a execución do encontro do Plan especial de infraestruturas e dotacións da rolda interior de Verín (tramo 6º) coa avenida de Laza.

Visto que mediante a Resolución da Alcaldía número 2023/1106, do 19 de xuño de 2023, publicada no Boletín Oficial da provincia de Ourense número 154, do 6 de xullo, se delegou na Xunta de Goberno Local, entre outras materias, a aprobación dos instrumentos de plan de desenvolvemento do plan xeral non expresamente atribuídos ao Pleno, así como os instrumentos de xestión urbanística e dos proxectos de urbanización e a resolución dos expedientes de expropiación.

Visto que a dita delegación comprende as facultades de dirección e de xestión, xunto coa resolución dos procedementos administrativos oportunos mediante a adopción de actos administrativos que afecten a terceiros, resulta conveniente avocar nesta Alcaldía o exercicio da competencia para resolver este expediente, en atención ás especiais circunstancias concorrentes derivadas da relevancia estratéxica da actuación urbanística proxectada e da necesidade de impulsar de forma coordinada, eficaz e áxil a tramitación do procedemento expropiatorio.

Por todo iso, en virtude do disposto no artigo 10 da Lei 40/2015, do 1 de outubro, de réxime xurídico do sector público; no artigo 21.3 da Lei 7/1985, do 2 de abril, reguladora das bases do réxime local, e de acordo cos artigos 43, 44, 45, 114.a), 118, 120 e 121 do Regulamento de organización, funcionamento e réxime xurídico das entidades locais, aprobado polo Real decreto 2568/1986 do 28 de novembro, emito a seguinte

RESOLUCIÓN:

Primeiro. Avogar, neste suposto concreto, a competencia delegada na Xunta de Goberno Local, para coñecer e resolver o procedemento de expropiación correspondente ao expediente administrativo electrónico 3331/2026, relativo ao Proxecto de expropiación dos bens e dereitos necesarios para a execución do encontro do Plan especial de infraestruturas e dotacións da rolda interior de Verín (tramo 6º) coa avenida de Laza, de conformidade co que dispón o artigo 10 da Lei 40/2015, do 1 de outubro, de réxime xurídico do sector público, e o artigo 116 do Regulamento de organización, funcionamento e réxime xurídico das entidades locais, aprobado polo Real decreto 2568/1986, do 28 de novembro, polo que esta Alcaldía-presidencia asume a tramitación e a resolución dos actos administrativos decisorios que correspondan no dito procedemento, incluído o acto de aprobación do proxecto de expropiación.

Segundo. No exercicio da competencia avocada, aprobar inicialmente o Proxecto de expropiación dos bens e dereitos necesarios para a execución do encontro do Plan especial de infraestruturas e dotacións da rolda interior de Verín (tramo 6º) coa avenida de Laza, redactado polo arquitecto Juan Alfonso Botana Castelo e presentado neste Concello o día 4 de xuño de 2026 (rexistro de entrada número 2026-E-RE-1527). Esta aprobación inicial realízase co alcance, documentación e determinacións que resultan do proxecto incorporado ao expediente e cos efectos propios da aprobación do proxecto expropiatorio no procedemento de taxación conxunta. Todo iso, sen prexuízo do seu sometemento a información pública e da notificación individualizada das taxacións nos termos legalmente procedentes, prevista nos artigos 118 da Lei 2/2016, do 10 de febreiro, do solo de Galicia, en relación cos artigos 291 e seguintes do Decreto 143/2016, do 22 de setembro.

Terceiro. Publicar esta resolución no Boletín Oficial da provincia de Ourense, sen prexuízo de que produza efectos desde o mesmo día da súa sinatura, de conformidade co que dispón o artigo 44.2 do Regulamento de organización, funcionamento e réxime xurídico das entidades locais.

Cuarto. Notificarlles esta resolución ás persoas interesadas no procedemento, conforme ao establecido no artigo 10 da Lei 40/2015, do 1 de outubro, de réxime xurídico do sector público.

Quinto. Darlle conta desta resolución á Xunta de Goberno Local, para os efectos de que quede informada do seu contido, consonte o establecido no artigo 38.d) do Regulamento de organización, funcionamento e réxime xurídico das entidades locais.

Sexto. Contra este acto de avocación non caberá ningún recurso, sen prexuízo de que poida impugnarse o acto administrativo que se dite en execución deste, conforme ao artigo 10.2 da Lei 40/2015, do 1 de outubro, de réxime xurídico do sector público.

Este decreto asínao, para os efectos de fe pública e non de legalidade, a secretaria interina, de acordo co previsto no artigo 3.2.h) do Real decreto 128/2018, do 16 de marzo.

Verín, 30 de xullo de 2026

Gerardo Seoane Fidalgo
Alcalde