A Lei 4/2023, do 6 de xullo, de ordenación e xestión integrada do litoral de Galicia, establece no seu artigo 48 que, respectando o réxime xeral establecido na normativa de costas, as autorizacións e as concesións no dominio público marítimo-terrestre serán outorgadas polas consellerías competentes unha vez producido o efectivo traspaso das funcións e dos servizos da Administración xeral do Estado á Comunidade Autónoma de Galicia en materia de ordenación do litoral.

Neste sentido, mediante o Real decreto 394/2025, do 13 de maio, efectuouse o traspaso á Comunidade Autónoma de Galicia das funcións e servizos da Administración xeral do Estado en materia de ordenación e xestión do litoral, entre as que se inclúe a xestión e o outorgamento das autorizacións dos usos de tempada nas praias e no mar territorial.

De acordo co anterior, e en aplicación do disposto nos artigos 113 e 152 do Regulamento xeral de costas, aprobado polo Real decreto 876/2014, do 10 de outubro, e na disposición adicional primeira da Lei 5/2025, do 23 de decembro, de medidas fiscais e administrativas, fíxanse os prazos para a presentación das solicitudes relativas aos servizos de tempada no dominio público marítimo-terrestre do litoral de Galicia correspondentes ao ano 2027, nos termos previstos no anexo deste anuncio.

A información relativa a este anuncio, así como as bases técnicas e modelos guía para a presentación das solicitudes, estará á disposición das persoas interesadas na seguinte páxina web: https://www.xunta.gal/medio-ambiente/galicia-litoral

Santiago de Compostela, 22 de setembro de 2026

Paula Uría Traba
Directora xeral de Enerxías Renovables
e Cambio Climático

ANEXO

Prazos relativos aos servizos de tempada no litoral de Galicia
correspondentes ao ano 2027

A tempada queda fixada entre o inicio do período de Semana Santa, entendo por tal o venres anterior á festividade de Venres Santo, e o 31 de outubro de cada ano natural. En consecuencia, a tempada correspondente ao ano 2027 comprenderá desde o 19 de marzo ata o 31 de outubro de 2027, ambos incluídos.

Os servizos de tempada poderán contar cunha autorización por un prazo máximo de 4 anos. De acordo co carácter temporal e desmontable dos servizos de tempada, as instalacións deberán ser desmontadas e efectivamente retiradas no prazo máximo de quince días contados desde a finalización de cada tempada.

Os prazos para solicitar a autorización para a explotación de servizos de tempada na zona de dominio público marítimo-terrestre, a través do procedemento MT701A dispoñible na sede electrónica da Xunta de Galicia, serán os seguintes:

1. Solicitude de prórroga ou de nova autorización de plans de explotación por parte dos concellos.

Os concellos costeiros interesados na explotación dos servizos de tempada no seu termo municipal en zona de dominio público marítimo-terrestre poderán presentar, con carácter preferente, as súas solicitudes de prórroga ou de nova autorización no prazo dun mes, que se contará desde o día seguinte ao da publicación deste anuncio no Diario Oficial de Galicia.

Para o caso de que se trate de novas autorizacións, os concellos solicitantes recibirán información das instalacións explotadas por persoas físicas ou xurídicas na tempada 2026 e susceptibles de prórroga, para os efectos de que as teñan en conta na elaboración do seu plan de explotación.

Entenderase como último día do prazo o correspondente ao mesmo ordinal do día da publicación. Se o último día do prazo for inhábil, entenderase prorrogado ao primeiro día hábil seguinte e, se no mes de vencemento non houber día equivalente ao inicial do cómputo, entenderase que o prazo remata o último día do mes.

Por outra banda, dentro dese mesmo prazo, os concellos que opten por asumir a xestión dos servizos de tempada poderán incluír no seu plan de explotación aquelas outras actividades, actuacións ou eventos que pretendan promover ou desenvolver no dominio público marítimo-terrestre durante o ano 2027 e que requiran o correspondente título de ocupación ou uso.

2. Solicitude de prórroga ou de nova autorización por parte de persoas físicas e xurídicas.

As persoas físicas e xurídicas interesadas na explotación de servizos de tempada que pretendan prestarse en terreos de dominio público marítimo-terrestre da Comunidade Autónoma de Galicia poderán solicitar a prórroga da súa autorización (naqueles casos en que non se teña esgotado o prazo de 4 anos) ou unha nova autorización desde o 16 de novembro ata o 31 de decembro de 2026, ambos incluídos.

Exceptúanse os servizos de tempada nos termos municipais cuxos concellos asumisen a súa xestión. Nestes casos, cando non opten pola explotación directa, os concellos tramitarán o procedemento para a adxudicación a terceiros dos servizos, incluída a publicación dos correspondentes anuncios, en que se indicarán os prazos para a presentación de ofertas ou solicitudes de participación.

Antes do inicio do prazo de presentación das solicitudes das persoas físicas, a Dirección Xeral de Enerxías Renovables e Cambio Climático da Consellería de Medio Ambiente e Cambio Climático publicará a relación de concellos que optaron por asumir a xestión dos servizos de tempada para o ano 2027 no enderezo web: https://www.xunta.gal/medio-ambiente/galicia-litoral