De conformidade co disposto no artigo 118 da Lei 2/2016, do 10 de febreiro, do solo de Galicia, comunícase que o Concello de Tomiño, mediante a Resolución da Alcaldía do 24 de setembro de 2026, aprobou inicialmente o proxecto de expropiación forzosa para a mellora e ampliación do trazado viario municipal no lugar da Regueiriña, parroquia de San Martiño de Figueiró (Tomiño), datado en maio de 2026 e redactado por José Rodríguez Espiñeira, enxeñeiro técnico agrícola con número de colexiado 1.642 e pertencente á empresa Rodespi.

De igual forma, acordouse someter a información pública, por un período dun mes, o referido proxecto mediante a inserción de anuncios no Diario Oficial de Galicia e nun xornal dos de maior circulación da provincia, co fin de que aquelas persoas que poidan resultar interesadas formulen as observacións e reclamacións que xulguen convenientes, en particular no que atinxe á titularidade ou valoración dos seus respectivos dereitos; así como tamén proceder á notificación individualizada, con traslado literal das follas de valoración e da proposta de fixación dos criterios de valoración, a todos os que aparezan como titulares de bens e dereitos no expediente, co fin de que poidan formular cantas alegacións e reclamacións consideren oportunas tanto con respecto ao expediente expropiatorio coma á fixación do prezo xusto, por idéntico prazo dun mes.

O prazo de información pública comezará a contar desde o día seguinte ao da inserción do anuncio no Diario Oficial de Galicia.

A relación de bens e dereitos afectados é a seguinte, incluíndose en todo caso o correspondente 5 % do premio de afección:

• Proxecto de expropiación forzosa: vía pública de orde municipal no lugar da Regueiriña, parroquia de San Martiño de Figueiró.

• Titular: Jesús Ferreira Vieira, con DNI ***4903**.

• Referencia catastral: 36054C510011410000DU.

• Localización: lugar da Regueiriña núm. 5, Figueiró.

• Clase/clasificación do solo: urbana/solo de núcleo rural.

• Superficie que se vai expropiar (m2): 56,00 m2. Edificación: non afecta.

• Observacións:

– Afección parcial da parcela pola súa parte sur, lindante coa vía pública.

– Non se coñecen cargas.

– Realízase medición da delimitación real da parcela lindante coa vía pública.

A folla do prezo xusto individualizado establece a seguinte valoración:

• Valor do solo: 1.960,98 €.

• Valor da construción: 11.055,55 €.

• Valor da expropiación: 13.016,53 €.

Tomiño, 24 de setembro de 2026

Sandra González Álvarez
Alcaldesa