Na sesión que tivo lugar o día 6 de outubro de 2026, o tribunal nomeado pola Resolución do 16 de abril de 2024 (DOG núm. 78, do 19 de abril), para cualificar o proceso selectivo extraordinario de estabilización derivado da Lei 20/2021, do 28 de decembro, para o ingreso, pola quenda de acceso libre e mediante o sistema de concurso, nas categorías 19, 32, 38 e 40 do grupo I de persoal laboral da Xunta de Galicia, convocado pola Resolución do 22 de decembro de 2022, modificada pola Resolución do 20 de xaneiro de 2023 (DOG núm. 15, do 23 de xaneiro) e pola Resolución do 6 de febreiro de 2023 (DOG núm. 26, do 7 de febreiro) (corrección de erros no DOG núm. 64, do 31 de marzo),

ACORDOU:

Primeiro. Mediante a Resolución do 13 de novembro de 2024, do tribunal designado para cualificar o proceso selectivo extraordinario de estabilización derivado da Lei 20/2021, do 28 de decembro, para o ingreso, pola quenda de acceso libre e mediante o sistema de concurso, en categorías do grupo I de persoal laboral da Xunta de Galicia (DOG núm. 221, do 15 de novembro), faise pública, entre outras, a relación das persoas aspirantes que superaron o proceso selectivo para o acceso á categoría 19 (titulado/a superior especialista, titulado/a superior farmacéutico) do grupo I.

Pola Resolución do 24 de xullo de 2026, da Consellería de Facenda e Administración Pública (DOG núm. 139, do 27 de xullo), procédese ao nomeamento como persoal laboral fixo da categoría 19 (titulado/a superior especialista, titulado superior farmacéutico) do grupo I de persoal laboral da Xunta de Galicia, das persoas aspirantes que superaron o proceso selectivo de estabilización, pola quenda de acceso libre e mediante o sistema de concurso, así como á adxudicación do destino definitivo.

Nesta mesma resolución acredítase a renuncia ao seu nomeamento por parte da aspirante co número de orde 6, María Carmen García Carbajales (***1106**).

A base III.4 da convocatoria sinala: «A orde de prelación das persoas aspirantes virá dada pola suma da puntuación na fase de concurso. Non poderá superar o proceso selectivo un número de persoas superior ao de prazas convocadas. Para poder superar o proceso selectivo, será necesario alcanzar unha puntuación mínima de trinta (30) puntos.

Con todo, para asegurar a cobertura das vacantes, de se produciren renuncias das persoas seleccionadas antes do seu nomeamento ou toma de posesión, o órgano convocante poderá requirir unha relación complementaria das persoas que sigan por puntuación ás propostas».

En atención ao anteriormente sinalado, o 30 de setembro de 2026, a Dirección Xeral de Emprego Público e Administración de Persoal requiriulle a este tribunal unha relación complementaria da persoa que segue por puntuación ás xa propostas.

Por todo isto, este tribunal acorda modificar a relación de aspirantes que superan o proceso selectivo para o ingreso, pola quenda de acceso libre e mediante o sistema de concurso, na categoría 19 (titulado/a superior especialista, titulado/a superior farmacéutico) do grupo I de persoal laboral da Xunta de Galicia, e facer pública como anexo a esta resolución a relación complementaria de aspirantes que superaron o proceso selectivo, coas puntuacións obtidas no concurso e con indicación do seu documento nacional de identidade (coas limitacións previstas na normativa en materia de protección de datos de carácter persoal).

Segundo. De conformidade co disposto na base V.2 da convocatoria e de acordo co informe do 9 de outubro de 2024, da Dirección Xeral de Emprego Público e Administración de Persoal, sobre a aplicación da tramitación de urxencia aos procesos selectivos de estabilización da Lei 20/2021, conforme o artigo 33.1 da Lei 39/2015, do 1 de outubro, do procedemento administrativo común das administracións públicas, e a disposición adicional sétima da Lei 5/2022, do 21 de decembro, de medidas urxentes para a redución da temporalidade no emprego público da Comunidade Autónoma de Galicia, a persoa aspirante que se relaciona no anexo dispoñerá dun prazo de dez (10) días hábiles, contados a partir do día seguinte ao da publicación desta resolución no DOG, para presentar os documentos previstos na dita base, no caso de que non fosen presentados ou validados previamente.

Terceiro. Elevar esta modificación da relación de aspirantes que superaron o proceso selectivo á persoa titular da Dirección Xeral de Emprego Público e Administración de Persoal para que a persoa afectada sexa proposta para o seu nomeamento como persoal laboral fixo.

Cuarto. Contra este acordo poderase interpoñer un recurso de alzada ante a persoa titular da consellería competente en materia de función pública, nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 6 de outubro de 2026

Ana Belén Díaz Fernández
Presidenta do tribunal

ANEXO

Convocatoria: grupo I (concurso).

Categoría: 19 (titulado/a superior especialista, titulado/a superior farmacéutico).

Núm. de orde	DNI/NIE	Apelidos, nome	Quenda	Puntuación
6	***5944**	Novoa Fernández, Purificación	Libre	46.375