Santiago de Compostela, 21 de outubro de 2024

A directora da Escola Galega de Administración Pública, Sonia Rodríguez-Campos, inaugurou esta tarde a primeira edición do Curso monográfico sobre responsabilidade patrimonial sanitaria que formará a 25 empregados públicos nas vindeiras semanas. A nova actividade formativa está dirixida pola letrada da Xunta de Galicia Natalia Solar Jimeno.

No acto de inauguración Sonia Rodríguez-Campos destacou a importancia deste novo curso pola relevancia da temática que se vai tratar e a responsabilidade dos empregados públicos no cumprimento das súas funcións neste campo. “Son moitos os riscos derivados da responsabilidade patrimonial sanitaria e que os funcionarios das Administracións Públicas saiban xestionalos redunda en beneficio de todos. Trátase dunha materia complexa, cuxa operatividade depende do cumprimento de requisitos estritos que cómpre entender e respectar”, afirmou.

A directora da Escola lembrou a necesidade de ofrecer unha formación específica ao persoal empregado público. Neste sentido, destacou o Plan de formación da Escola do 2024 que representa unha clara aposta polo desenvolvemento profesional das persoas ao servizo das Administracións Públicas de Galicia. “O Plan contribúe, a través de incorporación de contidos estratéxicos, á actualización permanente e a mellora da súa cualificación e, polo tanto, á modernización das nosas Administracións coa perspectiva de poder incidir na calidade dos servizos prestados á cidadanía”.

De seguido, o letrado da Xunta de Galicia Santiago Valencia Vila ofreceu un relatorio sobre os aspectos xerais da tramitación dos procedementos de responsabilidade patrimonial sanitaria.

Obxectivos

A primeira edición do Curso monográfico sobre a responsabilidade patrimonial sanitaria, cunha duración de dez horas lectivas, pretende afondar nas principais cuestións relativas á responsabilidade patrimonial sanitaria, atendendo ao cumprimiento da Lex artis, o consentimento informado e a incorporación da historia clínica ao expediente.

O curso impartirase en cinco xornadas presenciais, de dúas horas de duración cada sesión, e trataranse os aspectos xerais da tramitación dos procedementos de responsabilidade patrimonial sanitaria, a formación do expediente administrativo, a participación dos terceiros afectados, con especial referencia ao contratista da Administración e a prescripción da acción.

Ademais, esta actividade formativa proporciona unha visión global sobre a perda de oportunidade e o dano desproporcionado, a importancia da proba no procedemento de responsabilidade patrimonial e nos recursos contencioso-administrativos, entre outros temas.

No curso participarán destacados expertos en Dereito como os letrados da Xunta de Galicia Natalia Solar Jimeno, Guillermo Rodicio Cimadevila e María Fernández Paz.