Pontevedra, 24 de outubro de 2024

O director xeral de Xustiza, José Tronchoni, participou na inauguración do seminario Xustiza sostible para as familias, organizado pola Universidade de Vigo co apoio da Xunta, onde sinalou a importancia de situar a cidadanía no centro das actuacións xudiciais. Así, apuntou á necesidade de que a xustiza  resolva os problemas das persoas “de xeito real e efectivo, cunha reposta pronta e de calidade”.

O director xeral avogou por reducir a litixiosidade e facilitarlle o acceso á xustiza a toda a poboación, ademais de crear institucións eficaces e responsables en todos os niveis. Nesa liña, referiuse ao labor da Xunta para avanzar na prestación dun servizo “eficaz, eficiente, accesible e tecnolóxico, que  promova a igualdade e a dignidade”. Para Tronchoni, as novas tecnoloxías xogan un papel fundamental neste obxectivo e especialmente a Intelixencia Artificial “clave no proceso de dixitalización e na colaboración entre todos os operadores xurídicos”.

Esta colaboración facilita “un enfoque máis proactivo e transparente na prestación dos servizos legais”, segundo afirmou o director xeral, quen incidiu na necesidade de fomentar unha “cultura de apertura e de transparencia entre administracións, entidades privadas e familias”.  José Tronchoni salientou a transversalidade da xustiza, que require dunha “aplicación global e inspiradora en todos os ámbitos da Administración que permita tomar medidas para protexer os sectores máis vulnerables e darlles reparación se é o caso”, engadiu.