Santiago de Compostela, 29 de outubro de 2024

A Xunta de Galicia autorizou a repotenciación dun parque eólico de preto de 50 megavatios no concello coruñés das Somozas. O Diario Oficial de Galicia publicou hoxe a resolución da Dirección Xeral de Enerxías Renovables e Cambio Climático pola que se autoriza tanto o desmantelamento das instalacións actuais do parque eólico Somozas como a construción de novas instalacións na contorna pasando dun total de 81 aeroxeradores a unicamente nove.

Deste xeito, a empresa promotora desmantelará os aeroxeradores instalados neste parque -nos montes da Serra, Marbán e Vilalbesa- e os equipamentos asociados a el como 81 centros de transformación, a rede eléctrica de media tensión soterrada, a subestación de evacuación e tres torres meteorolóxicas. En paralelo, restauraranse tanto as canalizacións como os camiños que queden sen uso.

Mentres, as autorizacións administrativas para proceder á repotenciación do proxecto Somozas -a previa ás instalacións e a de construción- suporá a instalación de novos equipamentos como nove aeroxeradores cos correspondentes centros de transformación, unha rede eléctrica soterrada de media tensión, unha subestación transformadora e unha torre meteorolóxica.

O futuro parque contará cunha produción neta de 175.880 megavatios hora ao ano tras un investimento total -entre o desmantelamento das instalacións actuais e a execución dos traballos para a repotenciación- de arredor de 50 millóns de euros.

A esta resolución súmase outra, tamén publicada hoxe no DOG, pola que se outorga a autorización administrativa previa ás instalacións relativas ao proxecto do parque eólico Pena Galluda, cunha potencia de 3,45 megavatios, no concello coruñés da Laracha.

Na actualidade a Dirección Xeral de Enerxías Renovables e Cambio Climático está a tramitar nove proxectos de repotenciación -catro xa autorizados entre os que se inclúen os dous publicados hoxe no DOG e que se prevé que sexan construídos durante 2025- que permitirán pasar de 361 aeroxeradores existentes na actualidade a 75, o que supón unha redución do 80%.

Estas repotenciacións dan continuidade a outras executadas nos últimos anos e xa operativas de cinco proxectos que suman unha potencia de preto de 83 megavatios. Esas cinco actuacións permitiron reducir de 238 a 28 os aeroxeradores instalados no territorio, o que supón unha rebaixa de preto do 90%.