Santiago de Compostela, 31 de outubro de 2024

A conselleira de Vivenda e Planificación de Infraestruturas, María Martínez Allegue, asinou hoxe cos alcaldes de Ares, Julio Iglesias; de San Sadurniño; Secundino García; de Celanova, Antonio Puga; e de Riós, Eva Barrio; os convenios para financiar actuacións nestes municipios, ao abeiro do Fondo de Cooperación, cun investimento total de preto de 700.000€.

O Goberno galego colabora así cos municipios para executar intervencións tan diversas como o acondicionamento do mercado de Ares, a adquisición dunha nave para servizos municipais en San Sadurniño, a urbanización da rúa  Castor Elices en Celanova e a compra dunha vivenda en Riós para usos sociais.

De xeito máis concreto, o Concello de Celanova recibe 464.000€ para urbanizar a rúa Castor Elices, incluíndo actuacións de accesibilidade, mellora e ampliación de beirarrúas, renovación de servizos ou organización do tráfico.

O Concello de San Sadurniño, mediante a concesión de 150.000€, adquirirá unha nave no Outeiro que vén alugando desde hai 25 anos e utiliza para servizos municipais.

O Concello de Ares recibe 40.930€ para o repintado do edificio e a substitución da carpintería exterior do Mercado, para adaptalo ás normas de cores publicadas polo COAG e a Xunta e harmonizar a edificación coa contorna.

O Concello de Riós disporá de 37.800€ para adquirir unha vivenda en San Cristovo, que se reformará para habilitar dúas vivendas destinadas a uso social. No baixo crearase unha vivenda dun dormitorio e na planta superior outra de 3. 

Fondo de Cooperación

Trátase de préstamos sen xuros, a través deste Fondo de Cooperación, cos que a Xunta colabora cos municipios para que invistan en actuacións fundamentais como a vivenda ou a mellora das infraestruturas e servizos para a veciñanza.

Este Fondo presta apoio aos municipios de menos de 50.000 habitantes para financiar actuacións de rehabilitación e de conservación de patrimonio, así como de rexeneración urbana ou de adquisición de inmobles para rehabilitar.

Cómpre lembrar que este Fondo está dotado dun orzamento de 20M€ e o prazo de solicitudes para a convocatoria deste ano, dotada con 2,4M€, finaliza hoxe mesmo.

A Xunta, dende a posta en marcha do Fondo, leva concedidos préstamos por importe de máis de 24M€ para impulsar 102 actuacións nun total de 68 concellos para a rehabilitación e adquisición de diversas construcións.