Santiago de Compostela, 11 de decembro de 2024

A Escola Galega de Administración Pública (EGAP) celebrará o próximo venres, 13 de decembro, de 12:00 a 14:00 horas, en Santiago, a conferencia Responsabilidades de autoridades e empregados públicos, a cargo do catedrático de Dereito Administrativo da Universidade de Salamanca Ricardo Rivero Ortega. Esta actividade formativa encádrase no ciclo de conferencias Presente e futuro do emprego público na Administración posCOVID, organizado pola Escola.

O obxectivo desta sesión é profundar nas distintas clases de responsabilidades personais nas que poden incorrer as autoridades e empregados públicos, ademais de dotalos dos coñecementos e capacidades para previr infraccións.

A complexidade dos tipos penais, as sancións disciplinarias administrativas ou as de tipo contable, analizaranse durante a conferencia para axudar a diferenciar cando e como se actúa correctamente e que condutas comportan riscos.