Lalín (Pontevedra), 16 de decembro de 2024

A conselleira de Economía e Industria, María Jesús Lorenzana, reuniuse hoxe co alcalde de Lalín, José Crespo, para avaliar posibles emprazamentos para a creación dunha Zona de Aceleración de Proxectos Empresariais e Solo (Zapes) neste municipio.

O obxectivo desta reunión é dar un paso máis para identificar cales son as empresas que poden estar interesadas en crear unha Zapes para, a continuación, xa poder definir a ubicación.

Neste marco, Lorenzana explicou que as Zapes “son pequenos polígonos con proxectos empresariais firmes” onde se tramita en paralelo o desenvolvemento do solo do propio proxecto “co que pasariamos dos dez anos de media que agora supón facer unha gran área empresarial a apenas un ano e medio”, dixo.

Ademais, sinalou que a finalidade desta figura de aceleración é que “os empresarios que teñen proxectos e que queren crecer non teñan trabas por parte das Administracións, senón todo o contrario”, subliñou.

Así, a conselleira destacou que “queremos traballar coas empresas para intentar facer aquí, neste concello, unha Zapes pensada, como dicía antes, para aqueles concellos que teñen máis tecido industrial e máis demanda empresarial".

Finalmente, puxo en valor que o obxectivo desta medida é promover a aceleración industrial e o desenvolvemento rápido do solo para atraer o asentamento de novas empresas e investimentos a Galicia.

Esta reunión da continuidade á mantida entre o presidente da Xunta e o alcalde de Lalín o pasado 2 de novembro e que serviu para impulsar a cuarta fase do polígono industrial e materializar a ampliación do parque empresarial de Lalín. A superficie bruta é de 316.960 m² cunha superficie de uso industrial de 139.426 m²; e a previsión é que a licitación para as obras arranque a mediados do vindeiro ano 2025. “Para toda a comarca, Lalín é un centro industrial importante con moito desenvolvemento económico”, explicou.