Cerdedo-Cotobade(Pontevedra), 07 de xaneiro de 2025

O delegado territorial da Xunta en Pontevedra, Agustín Reguera, visitou esta mañá a Comunidade de Montes de Aguasantas, no concello de Cerdedo-Cotobade. Esta foi unha das comunidades que recibiu unha das axudas da consellería de Medio Rural para a rexeneración e/ou mellora en masas consolidadas de frondosas autóctonas e para a súa xestión forestal sustentable no ano 2023.

Grazas a esta achega de preto de 30.000 euros a comunidade puido levar a cabo “accións silvícolas de prevención dos danos causados aos bosques por incendios, desastres naturais e para o incremento da capacidade de adaptación e do valor ambiental dos ecosistemas forestais”.

O delegado territorial aproveitou a visita para lembrar as comunidades de montes beneficiadas pola convocatoria do ano 2024. Neste sentido, cabe destacar que no concello de Cerdedo-Cotobade beneficiáronse da última convocatoria destas axudas ata sete comunidades de montes distintas, ás que se lles concedeu unha achega total de máis de 150.000 euros. Ente elas, a comunidade de Corredoira; Carballedo; Santa María de Sacos; San Xurxo de Sacos, Viascón; Loureiro e Chamadoira.

No total da área territorial de Pontevedra estas axudas deixaron preto de 450.000 euros  distribuídos por 23 entidades.

O delegado territorial destacou a importancia destas axudas que “dotan de recursos a unhas comunidades de montes que levan a cabo un traballo cada vez máis necesario”. Neste sentido, Reguera quixo poñer en valor a necesidade de “seguir mantendo un monte limpo e preparado para diminuír todo o posible o risco de incendios e a súa agresividade”.