Santiago de Compostela, 29 de xaneiro de 2025

O Diario Oficial de Galicia publica, na súa edición de hoxe, a relación provisional coa orde de prelación e a puntuación obtidas polos aspirantes admitidos no proceso de elaboración das listas de selección temporal das categorías de persoal estatutario de enfermeiro, enfermeiro da Fundación Pública Urxencias Sanitarias de Galicia-061 e técnico en coidados auxiliares de enfermería (TCAE).

En total rexistráronse 29.619 inscricións a este proceso, resultando admitidas 29.360 persoas. En concreto, 13.259 foron admitidas na categoría de enfermeiro; 1.079 en enfermeiro da Fundación Pública Urxencias Sanitarias de Galicia-061; e 15.022 en técnico en coidados auxiliares de enfermería.

O número de novas inscricións en relación ao pasado ciclo é de 2.029. Por categorías, rexistráronse 831 novas inscricións en enfermeiro; 67 en enfermeiro da Fundación Pública Urxencias Sanitarias de Galicia-061; e 1.131 en técnico en coidados auxiliares de enfermería.

As listas atópanse publicadas, á disposición das persoas interesadas, na páxina web do Servizo Galego de Saúde, no apartado Emprego Público-Listaxes de persoal estatutario. Ademais, o estado de cada solicitude pode ser consultado polo aspirante no seu expediente electrónico persoal en Fides/expedient-e/sección de procesos.

Os interesados poderán presentar reclamación ante as xerencias das áreas sanitarias e as direccións con competencias na xestión de persoal das entidades adscritas á Consellería de Sanidade no prazo de dez días hábiles, é dicir, ata o 12 de febreiro.