Santiago de Compostela, 4 de febreiro de 2025

O director xeral de Maiores e Atención Sociosanitaria, Antón Acevedo, destacou hoxe os avances na mellora da atención nos centros residenciais que supón o novo modelo de coidados implantado na rede autonómica. Antón Acevedo estivo hoxe o centro residencial Volta do Castro da Xunta de Galicia, que recibiu a visita  dun grupo de profesionais do sector sociosanitario interesado no modelo galego.

O director xeral lembrou que Galicia foi pioneira no desenvolvemento dun sistema de coidados que ten como piares fundamentais a atención personalizada, a mellora dos equipamentos, o uso das novas tecnoloxías e a formación continua dos profesionais. A finalidade é que os maiores que se aloxan en residencias se sintan como nos seus fogares e dispoñan dos mellores medios e sistemas para ter unha atención da máxima calidade.

Neste sentido, apuntou que a residencia de Volta do Castro foi unha das primeiras de titularidade autonómica en dispoñer das chamadas habitacións intelixentes, que permiten mellorar o confort, os coidados, o control do estado de saúde e a seguridade dos residentes. Entre outras innovacións, os dormitorios deste centro están dotados de sensores que advirten de calquera incidencia que poida acontecer como, por exemplo, unha caída.