Máis de 500 profesionais dos hospitais do Servizo Galego de Saúde fórmanse para saber como actuar en caso de conato de incendio
A formación busca capacitar o persoal para que sexa quen de identificar os incendios de distinta natureza e cada axente extintor segundo a clase de lume
Dada a boa acollida desta actividade, o Servizo Galego de Saúde realizará este ano novos cursos de formación para profesionais dos centros de saúde de maior tamaño
Santiago de Compostela, 9 de febreiro de 2025
O Servizo Galego de Saúde desenvolveu nos últimos meses actividades de formación na que participaron máis de 500 profesionais dos hospitais públicos co obxectivo de adquirir a capacidade necesaria para intervir ante calquera conato de incendio que se presente nas instalacións sanitarias.
Os plans de autoprotección de cada área sanitaria prevén a formación do persoal e, en particular, dos delegados de prevención.
As actividades sobre manexo de bocas de incendio equipadas e extintores desenvolvéronse en hospitais tanto cabeceira de área como comarcais.
Consistiron nun apartado teórico sobre formas de prevención de lume, mecanismos de extinción e precaucións no seu uso, ademais dunha parte práctica que incluíu a extinción de lume real.
Dada a boa acollida que tiveron estas actividades formativas realizadas nos hospitais, o Servizo Galego de Saúde realizará este ano novos cursos de formación dirixidos a profesionais dos centros de saúde de maior tamaño.
Imaxes relacionadas
