Santiago de Compostela, 17 de abril de 2025

O conselleiro de Sanidade, Antonio Gómez Caamaño, e o presidente da Federación galega de asociacións en favor das persoas con discapacidade intelectual ou do desenvolvemento (Fademga Plena inclusión social), Eladio Fernández Pérez, asinaron un convenio de colaboración para a realización de actividades de sensibilización e mellora da comunicación e promoción da saúde mental das persoas con discapacidade intelectual no sistema sanitario público de Galicia.

Entre as actuacións que se desenvolverán no marco desta colaboración está o programa Aténdeme-Enténdeme, consistente en visitas programadas aos centros de saúde dunha selección de persoas con discapacidade intelectual ou do desenvolvemento, acompañadas dun familiar e un profesional de Fademga. 

Durante as visitas, transmitirán aos membros dos equipos de atención primaria as súas necesidades, así como algunhas ferramentas para mellorar as habilidades dos profesionais na comunicación e a promoción da saúde mental coas persoas con discapacidade intelectual ou do desenvolvemento.

Tamén se realizarán accións de análise e avaliación da accesibilidade cognitiva en centros sanitarios.

Pola súa parte, o Servizo Galego de Saúde porá á disposición as instalacións e os medios axeitados para o desenvolvemento das actividades do programa Aténdeme-Enténdeme ou outras coa mesma finalidade.

Así mesmo, o departamento sanitario galego favorecerá a creación de espazos de diálogo e sesións conxuntas entre profesionais dos equipos de saúde mental e profesionais dos recursos sociosanitarios, coa fin de compartir información e coñecemento.