Ferrol, 25 de abril de 2025

A Xunta axustará desde o próximo luns, 28 de abril, o percorrido das liñas de autobús Caranza–Praza Vella e Praza Vella–Caranza, na cidade de Ferrol, que fora modificado para adecuar o servizo ás obras na estrada FE-14, de competencia estatal.

O percorrido de ambas as liñas (coñecidas como liña C para o público) volverá circular pola avenida das Pías coa creación dunha nova parada no Bertón, que se incorpora na liña Caranza–Praza Vella, e coa recuperación da parada Vv. Bazán no sentido Praza Vella – Caranza.

O itinerario dos servizos en ambos os dous sentidos desviárase pola rúa Telleiras para acomodar as obras das Pías, utilizando as paradas de Antonio Escaño e Telleiras, que a partir deste luns xa non estarán dispoñibles en ningunha das dúas liñas.

Cómpre lembrar que a Xunta consensuara as solucións para os desvíos temporais nos servizos de transporte público co Ministerio de Transportes, co Concello de Ferrol e coa asociación de veciños de Caranza, avaliando as alternativas máis adecuadas para o conxunto das liñas.

A información actualizada sobre os servizos estará dispoñible para a súa consulta na páxina web www.bus.gal.