Santiago de Compostela, 13 de maio de 2025

A Xunta publica no Portal de Contratos Públicos a licitación, por importe de 11.746.512 euros, do servizo de transporte sanitario non urxente da área sanitaria de Vigo cunha duración inicial dun ano.

O contrato prevé unha posible ampliación por outros 12 meses máis, cun valor estimado, neste caso, de 23,4 millóns de euros.

O contrato engloba os traslados programados, non programados, os de tipo interhospitalario e o transporte aos centros de saúde e hospitais galegos de usuarios dos centros sociosanitarios.

A Consellería de Sanidade incrementou nun 39 % o orzamento destinado a este contrato que inclúe os traslados programados da área sanitaria viguesa co obxectivo de que os pacientes poidan recibir asistencia para consultas, tratamentos, curas ou probas.

O incremento orzamentario desta nova licitación responde á necesidade de atender aos novos acordos definidos no convenio colectivo galego de transporte sanitario de enfermos e accidentados en ambulancia, ao incremento dos custos do persoal, ás partidas destinadas aos vehículos, ás melloras de adecuación das infraestruturas e á suba nos custos do combustible.

Desta forma, a Xunta garante esta prestación asistencial ás máis de 568.000 persoas que residen na área sanitaria de Vigo.

As empresas interesadas en participar neste procedemento teñen de prazo ata o vindeiro 9 de xuño para presentar as súas ofertas.