Santiago de Compostela, 13 de maio de 2025

O Diario Oficial de Galicia publica, na súa edición de hoxe, a resolución da Consellería de Sanidade pola que se renova a composición do Consello Interdepartamental de Coordinación para a prevención e atención das condutas suicidas, organismo creado por medio do Decreto 21/2019 do 14 de febreiro, que está composto por unha presidencia, unha vicepresidencia e doce vogalías.

Tal e como se recolle na resolución hoxe publicada, noméase como novas integrantes do Consello a Almudena Díaz Pereira, subdirectora xeral de Atención á Saúde Mental do Servizo Galego de Saúde, que será a vicepresidenta do Consello; e a Isabel Sánchez Fernández, traballadora social da área sanitaria de Lugo, A Mariña e Monforte de Lemos, que exercerá unha vogalía.

Este Consello é un órgano colexiado de carácter consultivo, de estudo, coordinación, seguimento e asesoramento. Entre as súas funcións está a supervisión da elaboración e seguimento da implantación do Plan de prevención do suicidio en Galicia; a formulación dunha proposta anual ante as respectivas institucións das medidas que se levarán a cabo en relación coa prevención e actuación ante as condutas suicidas, así como a supervisión de evolución das medidas, actuacións e compromisos que se establecen no Plan de prevención.

A Xunta ten entre as súas prioridades a mellora da atención á saúde mental para ofrecer a máxima calidade asistencial aos pacientes. O Goberno galego, consciente do incremento dos problemas de saúde mental desde a pandemia,  desenvolveu un Plan de Saúde Mental 2020-2024 dotado con 83 millóns de euros, no que se incluíron as propostas dos profesionais, asociacións e federacións de pacientes e que permitiu a creación dunha unidade de hospitalización de agudos infanto-xuvenil en Vigo, que complementa á de Santiago e aos hospitais de día de saúde mental infanto-xuvenil das sete áreas, ademais da creación de preto de 250 prazas de especialistas en saúde mental e a mellora das ratios de psicólogos clínicos e de psiquiatras.

A Consellería de Sanidade xa traballa nun novo Plan de saúde mental que continúe impulsando e mellorando este modelo de atención e que permitirá, entre outras medidas, que os centros de saúde conten con persoal de psicoloxía clínica.

Proxecto YAM

No marco do desenvolvemento do dito plan, o Executivo acordou traballar no obxectivo de promover a saúde mental na infancia e previr os intentos de suicidio na poboación infantil e adolescente, elaborando unha actualización do protocolo de prevención e actuación nos ámbitos sanitario e educativo ante o risco suicida infanto-xuvenil.

Ao abeiro desta iniciativa, decidiuse levar a cabo o programa YAM de prevención universal dirixido ao alumnado da ESO co obxectivo de diminuír a incidencia da conduta suicida e mellorar as estratexias de busca de axuda, estando identificada esta iniciativa como o modelo de intervención máis eficaz, de acordo as recomendacións da OMS e Save the Children.

Para o desenvolvemento do YAM, a Xunta contou cun financiamento de dous millóns de euros, a través do Fondo Social Europeo. Así, o traballo colaborativo entre as Consellerías de Educación e a de Sanidade está a levar aos centros de secundaria un programa que amplía os recursos que xa incorporan o Plan de prevención do suicidio en Galicia e, nomeadamente, o Plan de saúde mental de Galicia 2020-2024. A través deste proxecto, máis de 20 instrutores formáronse para impartir os seus coñecementos en preto dun centenar de centros educativos galegos.

Ademais, a Consellería de Sanidade e o Colexio de Xornalistas puxeron en marcha un grupo de traballo sobre saúde mental e comunicación, integrado por psicólogos, psiquiatras e xornalistas, que están a avanzar no seu propósito de elaborar unha guía de boas prácticas sobre o tratamento informativo da conduta suicida. Este proxecto forma parte do obxectivo do departamento sanitario galego de contribuír á sensibilización e desestigmatización social das enfermidades de tipo mental.