Lugo, 5 de xuño de 2025

O delegado territorial da Xunta en Lugo, Javier Arias, pronunciou hoxe o pregón das festas patronais do barrio do Castiñeiro, en Lugo, que se prolongarán ata o domingo e que contan co apoio do Goberno galego.

Arias lembrou que a zona medrou rapidamente coa expansión da cidade desde mediados do pasado século, pero soubo respectar “o nome e o espírito” do antigo souto de castiñeiros, “que non foron varridos da contemplación nin da memoria”.

Nesa liña, o delegado apuntou que “á beira dos vellos castiñeiros” construíronse edificios, implantáronse actividades económicas e creáronse dotacións públicas, dando lugar a “un puxante barrio que cada ano polo San Antonio convértese no centro da cidade”.

Javier Arias tivo palabras de agradecemento para a asociación Nova Abella, como organizadora dos festexos, e en xeral para as asociacións veciñais que “crean comunidade promovendo espazos de encontro como este” e están ao servizo “dos seus propios veciños, do seu barrio e da cidade”.