Santiago de Compostela, 12 de xuño de 2025

O xerente do Servizo Galego de Saúde, José Ramón Parada, salientou esta mañá no marco da Comisión 3ª de Economía, Facenda e Orzamentos que a Xunta construirá un novo hospital materno infantil no Complexo Hospitalario Universitario de Ourense que permitirá dotar dunhas instalacións modernas, funcionais e unificar todos os seus servizos. 

Durante a súa intervención no Parlamento galego, Parada detallou que malia que a previsión inicial era realizar un reforma integral do actual inmoble, o Executivo galego acordou reconfigurar esta planificación co obxectivo de poder contar cunha infraestrutura “con maior proxección de futuro”, e que tamén posibilitase “mellorar os espazos e unha simplificar as conexións” entre os diferentes edificios que conforman o Complexo.

“O novo edificio permitirá unificar todos os servizos do materno-infantil do Complexo Hospitalario Universitario de Ourense”, puxo en valor o xerente.

O responsable sanitario puntualizou que a finais do ano 2026 comezará o traslado do servizos do materno infantil cara ao novo edificio de hospitalización e, a continuación procederase á demolición do inmoble actual. 

“Trátase dunha actuación complexa” incidiu Parada, ao executarse nunha contorna na que se desenvolverá a actividade hospitalaria.

O xerente do Servizo Galego Saúde subliñou que xunto coa construción do hospital Materno Infantil, o novo edificio de hospitalización e as melloras nos accesos previstas no Plan director do recinto hospitalario Ourensá posibilitará prestar unha atención “mellor e máis cómoda” aos pacientes e acompañantes deste recinto hospitalario.

Nesta liña, Parada pechou a súa intervención lembrando que a Xunta segue á avanzar na mellora das infraestruturas sanitarias de toda a comunidade galega co obxectivo de optimizar a calidade asistencial do seu sistema sanitario público.