Santiago de Compostela, 13 de xuño de 2025

O Servizo Galego de Saúde adiantou, durante as II Xornadas de abordaxe de disfuncións do solo pelviano no ámbito da atención primaria, o vídeo divulgativo do Programa estruturado de abordaxe das disfuncións do solo pelviano feminino en atención primaria, que ofrece unha prestación única no Estado e que xa atendeu a máis de 20.000 mulleres desde 2017.

No evento formativo que se celebrou este xoves na Axencia Galega de Coñecemento en Saúde (ACIS), indicouse que, desde o inicio do programa, 20.417 mulleres foron atendidas polas matronas dos centros de saúde en relación a disfuncións do seu solo pelviano, e 1.552 foron tratadas por fisioterapeutas de atención primaria.

Ás xornadas asistiron 60 matronas e fisioterapeutas que están a desenvolver o programa para previr e tratar estes problemas que afectan á saúde da muller ao longo de toda a súa vida.

Para achegar á cidadanía esta prestación pioneira a nivel nacional, o Servizo Galego de Saúde adiantoulle aos profesionais implicados o vídeo que proximamente se difundirá nas pantallas dos hospitais e da rede de centros de saúde da sanidade pública.

Baixo o título Coida o teu solo pelviano, o vídeo recolle as etapas do circuíto asistencial establecido no Servizo Galego de Saúde. Tras unha primeira valoración realizada pola matrona do seu centro de saúde, a muller ten a posibilidade de participar nun programa individualizado de recuperación do solo pelviano e, se o precisa, será derivada a outras especialidades, co fin de abordar o seu problema de maneira multidisciplinar.

Entre os problemas máis habituais están as infeccións do tracto urinario de repetición e as cistites poscoitais, as disfuncións do solo pelviano que dificultan as relación sexuais coitais e a abordaxe psicolóxica da dor durante as mesmas. Tamén son de destacar a síndrome miofascial e a súa implicación na dor crónica, a influencia da práctica deportiva sobre o perineo feminino.