Santiago de Compostela, 24 de xuño de 2025

O Diario Oficial de Galicia (DOG) publica hoxe, a resolución da Dirección Xeral de Recursos Humanos do Servizo Galego de Saúde pola que se aproba a oferta de destinos nas categorías de médico de familia de atención primaria e de facultativo especialista de atención primaria.

Así, o persoal médico disporá dun prazo de 15 días naturais (entre o 25 de xuño e o 9 de xullo, ambos os dous inclusive) para realizar as modificacións que estimen oportunas na selección inicial de destinos (engadir novos destinos, eliminar destinos seleccionados inicialmente, modificar a orde de preferencia dos destinos solicitados...).

O número total de prazas ofertadas para médico de atención primaria é de 452 e para a de facultativo especialista de atención primaria ofértanse 77 prazas.

Por outra banda, o departamento sanitario da Xunta tamén publica hoxe a relación provisional de admitidos e excluídos do concurso de traslados aberto e permanente para a provisión de prazas básicas de persoal estatutario sanitario e de xestión e servizos, correspondente ao ciclo de adxudicación 2025.

Neste concurso, correspondente ao ciclo 2025, participaron un total de 4.862 profesionais, resultando admitidos 4.714, o que constitúe unha porcentaxe de admitidos dun 97 % sobre a totalidade das persoas participantes.

A categoría con maior número de admitidos é a de enfermería, seguida de técnico en coidados auxiliares de enfermería e médico de familia de atención primaria.

As listas coa relación provisional de admitidos e excluídos, a relación de prazas ofertadas por categoría e os centros están publicados, á disposición dos interesados, na páxina web do Servizo Galego de Saúde (www.sergas.es), no apartado Emprego Público-Concurso de traslados. Ademais, o estado de cada solicitude, ao igual que os destinos ofertados, pode ser consultado polo aspirante no seu expediente electrónico persoal en Fides/Expedient-e/Sección de procesos.

Coa publicación desta resolución, ábrese un prazo de dez días hábiles contados a partir do día 25 de xuño  (do 25 de xuño ao 8 de xullo) para que os interesados poidan corrixir, se é o caso, o defecto que motivou a súa exclusión, mediante solicitude que deberán dirixir á unidade de validación á que tivesen dirixido a solicitude de participación no concurso.

Este é o oitavo ciclo do proceso de concurso de traslados aberto e permanente, posto en marcha a finais do ano 2017 e que fai máis accesible o dereito á mobilidade do persoal estatutario fixo e en consecuencia, a conciliación da vida laboral e familiar dos profesionais, posibilitando o cambio de destino cunha periodicidade anual.