A Xunta licita por preto de 250.000 € o mobiliario xeral e de oficina para as próximas aperturas do Centro Integral de Saúde Olimpia Valencia de Vigo e do novo centro de saúde de Moaña
O Servizo Galego de Saúde prevé rematar as obras dos novos centros asistencias da área sanitaria de Vigo despois do verán
As empresas interesadas en formar parte deste proceso teñen ata o próximo 15 de xullo para presentar as súas ofertas
Santiago de Compostela, 30 de xuño de 2025
A Xunta, a través do Servizo Galego de Saúde, publica hoxe no Portal de Contratos de Galicia a licitación, por importe de 248.240,47 euros, do subministro de diverso mobiliario xeral e de oficina para equipar o centro integral de saúde (CIS) Olimpia Valencia e o novo centro de saúde de Moaña.
Dado que ambos os centros sanitarios da área de Vigo se encontran en fase de finalización de construción, o Servizo Galego de Saúde prepara de forma paralela a dotación de mobiliario.
No caso do CIS Olimpia Valencia, entre outro material, adquiriranse 90 mesas, 77 estantes e 350 cadeiras. Para o novo centro de saúde de Moaña, a compra inclúe 49 mesas de distintos tamaños, 36 estantes e 177 cadeiras. O prazo máximo de entrega será de dous meses.
A previsión do Servizo Galego de Saúde é que as obras dos novos centros asistenciais estean rematadas despois do verán.
As empresas interesadas en participar neste procedemento teñen ata o vindeiro 15 de xullo para presentar as súas ofertas.
