Santiago de Compostela, 21 de xullo de 2025

O xerente do Servizo Galego de Saúde, José Ramón Parada, participou esta mañá na presentación do Proxecto Europeo Interreg Europe CEMTex, orientado a pechar o ciclo dos téxtiles médicos seguindo os parámetros da economía circular e que comezou a andar este ano en Arnhem (Países Baixos).

O acto de presentación, celebrado no Edificio Administrativo de San Lázaro, contou tamén coa presenza da directora xerente da empresa pública de servizos sanitarios Galaria, Rocío Mosquera; do director da área de Desenvolvemento e Innovación Sanitaria da Axencia Galega de Coñecemento en Saúde (ACIS), José María Romero; e da coordinadora da Estratexia de Economía Circular do Servizo Galego de Saúde, Beatriz Piñeiro.

Ademais, participaron grupos de interese como o Clúster da Saúde de Galicia; o Clúster Téxtil de Galicia (Cointega); a Universidade de Vigo a través do Grupo de Biomasa e Desenvolvemento Sostible (ECU 2) e da Facultade de Deseño; e a Universidade Politécnica de Valencia a través do departamento de enxeñería téxtil.

Na xornada púxose o foco na necesidade de mellorar a cooperación das cadeas de valor, apostando por que a innovación empresarial se axuste aos requisitos da atención sanitaria, sumando o coñecemento e puntos de vista de todas as partes implicadas para a consecución dos obxectivos.

Cómpre ter en conta que a maioría das emisións dos hospitais proceden de produtos téxtiles médicos, como batas, máscaras e sabas e a meirande parte deles acaban en vertedoiros ou incineradoras, contribuíndo de maneira significativa aos 5,8 millóns de toneladas de residuos téxtiles que se xeran en Europa cada ano.

O proxecto CEMTex, no que participa Galicia e que conta cun orzamento de 1,7 millóns de euros, busca unha mellora da sustentabilidade e circularidade do modelo de uso dos materiais téxtiles médicos.

A transformación a téxtiles médicos de uso múltiple ten o potencial de reducir tanto os residuos como o impacto ambiental, ao tempo que diminúe os custos dos provedores da atención sanitaria.

Na reunión de presentación desta mañá amosáronse pezas de materiais elaborados con pixamas verdes sanitarios ou sabas e equipos de protección individual reciclados.

O Servizo Galego de Saúde e Axencia de Coñecemento en Saúde son os únicos socios españois deste proxecto, que durará catro anos e que ten como coordinador á provincia holandesa de Gelderland, ademais de rexións de Dinamarca, Italia, Romanía, Luxemburgo, República Checa e Ucraína.

O Proxecto CEMTex busca un punto de encontro entre os diferentes países participantes, con diferentes normativas en materia de residuos, para traballar nun obxectivo común co uso dos materiais téxtiles sanitarios.

A Estratexia de Economía Circular do Servizo Galego de Saúde ten entre os seus obxectivos acadar unha acadar unha Galicia climaticamente neutra, con cero emisións no 2040, conciliando a excelencia na atención sanitaria coa sustentabilidade.