Cuntis, 22 de outubro de 2025

O delegado territorial da Xunta en Pontevedra, Agustín Reguera, visitou esta mañá o Hotel Castro Balneario, no concello de Cuntis, un dos establecementos adheridos ao programa do Bono Turismo.

O delegado destacou os resultados desta campaña que esgotou os máis 16.666 bonos descargables en apenas tres días e lembrou que os establecementos aínda están a tempo de participar nesta iniciativa na que Turismo de Galicia inviste un millón de euros e que mobilizará 2.5 millóns.

Cabe destacar que o bono turístico foi unha campaña que naceu coa pandemia e que nos últimos anos demostrou ser unha ferramenta moi efectiva á hora desestacionalizar e descentralizar o turismo en Galicia. Nesta edición, cada usuario puido descargar ata un máximo de dous bonos de 150 euros cada un, dos cales a Xunta financia o 40%. Así, por cada 300 euros, o usuario solo debe asumir 180 euros.

Os usuarios poderán utilizar os seus bonos do 15 de setembro ata o 25 de decembro en calquera dos establecementos adheridos á campaña. Estes establecementos, así como toda a información sobre o funcionamento da campaña, poden atoparse na web bonoturismo.gal.

A día de hoxe hai preto de 320 establecementos turísticos de aloxamento adheridos en Galicia dos cales preto de 90 corresponden á provincia de Pontevedra.

O delegado territorial rematou a visita lembrando a importancia de manter un sector turístico “activo, de calidade e descentralizado cuxo éxito se traduza nunha mellora das condicións de vida de todos os galegos e galegas”.