Santiago de Compostela, 22 de agosto de 2025

A Xunta vén de publicar no Portal de Contratos de Galicia a licitación, por 1.693.758 euros, do subministro de equipos de mamografía dixital para a diagnose do cancro de mama con destino a varios hospitais do Servizo Galego de Saúde.

Este procedemento responde á necesidade de dar unha correcta cobertura sanitaria de xeito integral para todas as mulleres galegas ca adquisición do equipamento necesario para levar a cabo a diagnose e seguimento hospitalario das imaxes mamográficas.

A licitación contempla a substitución dos equipos de mamografía do Hospital Arquitecto Marcide de Ferrol, do Hospital Montecelo de Pontevedra e do Hospital Meixoeiro de Vigo.

Os novos equipos estarán dotados de imaxe dixital de alta resolución e tecnoloxía dixital 3D (tomosíntesis), que reduce a superposición de tecidos mellorando a taxa de detección e reducindo o número de biopsias.

Este novo equipamento Incorpora imaxe sintetizada a partir da imaxe de tomosíntese sen dose de radiación engadida e de imaxe con contraste, o que reduce o número de probas complementarias como a resonancia magnética. Ademais inclúen sistemas de guiado para biopsia en 2D, 3D e con contraste e estacións de revisión diagnóstica con software de axuda.

O contrato terá unha duración de dous meses dende a súa formalización.

As empresas interesadas neste procedemento teñen ata o 8 de setembro para presentar as súas ofertas.