Vigo, 3 de setembro de 2025

A delegada territorial da Xunta en Vigo, Ana Ortiz, destacou este mércores o apoio do Goberno galego á emblemática regata Le Figaro para a súa chegada este mes de setembro ao porto vigués. No acto de presentación celebrado na Autoridad Portuaria, a representante autonómica sinalou que a cidade converterase “durante uns días no epicentro da navegación en solitario”.

“Apoiamos este proxecto para conseguir o ambicioso obxectivo de afianzar o liderado de Vigo e Galicia como foco de atención mundial da vela. Eventos como esta competición contribúen de forma decisiva e sen dúbida a potenciar Vigo no lugar que se merece, reivindicando o seu papel central no deporte”, apuntou durante a rolda de prensa na que tamén estiveron presentes a vicepresidenta da Deputación, Luisa Sánchez; o presidente da Autoridade Portuaria, Carlos Botana, e o presidente da Fundación Traslatio, Mario Cardama.

Ortiz engadiu que “Vigo será clave na celebración da emblemática regata” Solitaire du Figaro Paprec, unha proba en solitario de 1.850 millas náuticas que celebra a súa 56ª edición entre Rouen, na Bretaña francesa, e Saint-Vaast-A-Hougue, en Normandía, con parada intermedia tamén no porto de Roscoff.

Para a celebración da regata, dividida en tres etapas, prevese a participación de 35 dos mellores regatistas oceánicos do momento. Na súa maioría son de orixe francesa, 30 navegantes, mentres que os demais son de Reino Unido (2), unha norteamericana, unha suíza e o defensor do título, o irlandés Tom Dolan. 

Galicia sabe a mar

O porto de Vigo será sede da chegada da segunda etapa e tamén acollerá a saída da terceira e última etapa, tras catro días na cidade. Coa campaña Galicia sabe a mar da Consellería de Mar, a dársena viguesa transformarase nun espazo aberto ao público, con actividades deportivas, culturais e gastronómicas, cos Xardíns do Cable como espazo de lecer, antes de que o 21 de setembro, desde o corazón da ría de Vigo, os navegantes emprenderán a etapa final da regata, na Canle da Mancha.