O conselleiro de Sanidade, xunto co director xeral de Asistencia Sanitaria do Servizo Galego de Saúde e o xerente da área sanitaria de Vigo, mantivo esta tarde unha xuntanza co presidente e representantes do Colexio Oficial de Médicos de Pontevedra
Gómez Caamaño traslada ao Colexio de médicos de Pontevedra o compromiso da Xunta de acadar a descentralización efectiva de medicina, de acordo coas propostas do grupo de traballo
Apela á responsabilidade e á colaboración de todos para acadar a descentralización da docencia do 4º e 5º cursos para garantir a mellor formación das novas xeracións de médicos
Vigo, 10 de setembro de 2025
O conselleiro de Sanidade, Antonio Gómez Caamaño, trasladou ao Colexio Oficial de Médicos de Pontevedra a vontade e o compromiso da Xunta por acadar a descentralización efectiva dos estudos de Medicina, de acordo coas propostas nas que está a avanzar o grupo de traballo creado para tal fin.
Nunha reunión co presidente e representantes do Colexio Oficial de Médicos de Pontevedra celebrada esta tarde en Vigo, e na que tamén participaron o director xeral de Asistencia Sanitaria do Servizo Galego de Saúde e o xerente da área sanitaria de Vigo, Antonio Gómez Caamaño lembrou que existe un sentir maioritario sobre as vías para descentralizar os estudos de Medicina.
Esta vía, segundo lembrou, pasa por ampliar a descentralización da docencia que xa existe en 6º curso de Medicina, a 4º e a 5º, creando en Vigo e na Coruña unidades docentes nas que se integren profesores das tres universidades galegas.
O conselleiro de Sanidade apelou á responsabilidade e ao espírito colaborativo de todos para acadar a descentralización da docencia práctica e teórica co obxectivo de garantir a mellor formación das novas xeracións de médicos.
Neste sentido, agarda que neste novo período o grupo de traballo poida madurar e concretar propostas para a descentralización dos estudos de Medicina, acadando a mellor fórmula para Galicia, pero tamén para Vigo, para A Coruña e para Santiago de Compostela.
