As Pontes (A Coruña), 3 de outubro de 2025

A delegada territorial da Xunta en Ferrol, Martina Aneiros, participou esta mañá na presentación dun dos partidos amigables que disputarán as seleccións absolutas femininas de fútbol sala de España e Portugal en Galicia, no marco da súa preparación para a Copa Mundial Feminina de Futsal da FIFA 2025, unha cita que se celebra por primeira vez este ano e que terá como sede Filipinas.

Os partidos, que se dirimirán os días 7 e 8 de outubro en Vilalba e As Pontes, respectivamente, suporán un evento de primeiro nivel. “Galicia converterase estes días nun escaparate internacional, e facémolo coa ilusión de saber que estamos acollendo ás mellores xogadoras do mundo nun momento clave da súa preparación para unha cita histórica”, indicou Aneiros quen destacou a oportunidade que supón para a comarca de Ferrolterra albergar un destes partidos.

Por último, agradeceu tanto á Real Federación Española de Fútbol como á Real Federación Galega da disciplina os seus esforzos de cara a demostrar que “Ferrolterra, e por extensión Galicia, está á altura dos grandes retos”.