Santiago de Compostela, 6 de outubro de 2025

Catro axentes ambientais da Unidade de Investigación de Incendios Forestais (UIFO) e do Distrito Forestal XII Miño-Arnoia, integrados no Servizo de Prevención e Defensa contra os Incendios Forestais da Consellería do Medio Rural; foron recoñecidos pola súa colaboración coa Policía Nacional na identificación do presunto autor de varios lumes na zona de Canibelos, no concello de Ourense, o 5 de agosto. Os axentes recibiron un diploma no acto celebrado o pasado venres con motivo dos Santos Anxos Custodios.

Durante a realización dos traballos de investigación e de vixilancia no lugar por parte dos investigadores da UIFO e axentes do distrito, detectouse a un home, de 28 anos e veciño do lugar, mentres provocaba de forma intencionada un incendio forestal na citada zona. Tras ser identificado polos axentes, foi detido pola Policía Nacional e trasladado ás dependencias policiais para tomarlle declaración, para posteriormente pasar a disposición xudicial.

A actuación levouse a cabo no marco dunha investigación conxunta entre a Policía Nacional, a UIFO e o persoal do Distrito Forestal XII, despois de detectar unha actividade incendiaria anómala na zona, con varios lumes reiterados. O operativo especial de vixilancia, que contou co apoio dun helicóptero do Corpo Nacional de Policía e varios drons da UIFO, permitiu localizar e sorprender o presunto autor no momento xusto no que iniciaba un novo incendio.

Cómpre lembrar que a UIFO foi creada no ano 2021 e está despregada por todo o territorio galego, onde continúa coas investigacións e recadando probas para traballar na identificación e posta a disposición xudicial de presuntos incendiarios.