Lugo, 28 de outubro de 2025

O secretario xeral da Lingua, Valentín García, mantivo hoxe un encontro con deportistas e responsables de entidades deportivas da provincia de Lugo dedicadas a moi diversas disciplinas para abordar “as posibilidades de mellora no uso e prestixio da lingua neste ámbito, sobre todo, pola súa relevancia para chegar á mocidade”.

Así, xunto co delegado territorial da Xunta, Javier Arias, o responsable de Lingua indicou que a xuntanza responde “á vontade de escoita con todos os sectores, que vimos mantendo desde que anunciamos o Pacto pola Lingua”, puntualizando neste senso, que o eido deportivo está incluído nun dos bloques de traballo, o de sociedade, no que se dividen as comisións de expertos designadas para levar a cabo a renovación do Plan xeral de normalización da lingua galega, un dos piares dese Pacto.

Deste xeito, Valentín García lembrou que “a promoción do galego no deporte é unha das claves para fomentar a súa presenza pola cantidade de persoas que move en todos os puntos de Galicia”. Tomando como referencia as achegas das entidades convocadas hoxe en Lugo, desde clubs de elite como o Breogán ata outros dedicados a moi diferentes prácticas como a patinaxe e mesmo a billarda, segundo indicou, “as propostas recadadas serán moi útiles para implementar novas medidas de impulso da lingua”.