Santiago de Compostela, 6 de novembro de 2025

A directora xeral de Traballo Autónomo e Economía Social, Marta Mariño, salientou hoxe na Comisión 5ª de Sanidade, Política Social e Emprego o compromiso firme e continuado da Xunta de Galicia co impulso do cooperativismo, ao que definiu como un modelo empresarial estratéxico para o desenvolvemento económico, a cohesión social e a fixación de poboación no territorio.

Fíxoo no marco da resposta a unha pregunta sobre o balance do cooperativismo na Comunidade, na que indicou que o cooperativismo galego se atopa nun momento histórico que confirma a consolidación do sector. Por primeira vez, salientou, superouse o fito das 2.000 cooperativas activas, cifra que supón un incremento do 40 % con respecto a hai tan só cinco anos, e que se traduce nun volume global de facturación superior aos 3.000 millóns de euros anuais. Ademais, fixo fincapé en que durante o ano 2024 se crearon 190 novas cooperativas, que implicaron a máis de 500 persoas promotoras.

En relación á súa distribución territorial, explicou que se trata dun modelo presente de xeito significativo en todas as provincias, o que pon de manifesto a súa capacidade de adaptación a contornas e necesidades territoriais moi diferentes. Non obstante, detallou unha maior concentración en Ourense, seguida de Pontevedra, A Coruña e Lugo. Tamén destacou o incremento das cooperativas de traballo asociado, con especial presenza das xuvenís, e o crecemento das cooperativas de consumidores e usuarias/os.

Neste senso, Marta Mariño puxo de relevo a diversificación sectorial que está caracterizando ao cooperativismo nos últimos anos. Xunto ao peso tradicional no sector primario, o modelo avanza con forza en servizos urbanos relacionados coa educación, a cultura, a hostalaría ou os coidados. Neste sentido, resaltou a función de resiliencia territorial que estas entidades desempeñan no rural e nas comarcas, así como o seu papel de innovación social e cohesión comunitaria nos ámbitos urbanos, sendo especialmente relevante a súa contribución fronte a desafíos como o despoboamento, o envellecemento demográfico ou a concentración da actividade económica no eixo atlántico.

Futura Lei de Cooperativas de Galicia

Na súa intervención, a directora xeral tamén explicou que no contexto da declaración do Ano Internacional das Cooperativas 2025 por parte da ONU, a Xunta está a reforzar a visibilización e o diálogo permanente co sector, mediante a tramitación do Anteproxecto da nova Lei de Cooperativas de Galicia, coa previsión de contar cun texto definitivo no primeiro trimestre de 2026. A futura Lei configurará unha panca normativa orientada a facilitar a creación e consolidación de cooperativas, a impulsar o Rexistro Autonómico e a adaptar o marco regulador ás novas necesidades da economía social. O texto poñerá especial atención ao desenvolvemento do cooperativismo en ámbitos estratéxicos como os coidados, a enerxía e a vivenda.

Finalmente, indicou tamén que o compromiso co sector queda reflectido nos orzamentos da Xunta para 2026, que destinan 10,6 millóns de euros ao reforzo de programas clave como Aprol Economía Social, ES-Transforma, ES-Factory e o Bono Consolida. A eles engádense ademais 2,7 millóns de euros para fortalecer a Rede Eusumo e apoiar ás entidades representativas da economía social para o desenvolvemento de accións de información, divulgación, asesoramento, formación e promoción en todo o territorio galego.