Santiago de Compostela, 10 de novembro de 2025

A Consellería de Emprego, Comercio e Emigración reunirá na Ribeira Sacra os vindeiros 27 e 28 de novembro a 60 referentes nacionais e internacionais, 30 empresas tractoras e 150 participantes do ecosistema emprendedor no encontro de emprendemento Ultreia Galicia, emprendemento ligado ao territorio. Trátase dunha cita que se enmarca no recoñecemento á comunidade galega como Rexión Emprendedora Europea 2025, xunto con Mazovia (Polonia) e Krapina Zagorje (Croacia) e que precisamente conectará iniciativas galegas con outras europeas poñendo en valor a capacidade da comunidade para innovar desde o local.

Neste sentido, o programa das dúas xornadas deste foro combinará experiencias inmersivas, debates, mesas redondas e presentacións relacionadas co emprendemento arredor de tres eixos estratéxicos clave que reflicten a identidade e o potencial transformador de Galicia e que son o sector primario (agro e mar), o dos recursos naturais e o comercio-turismo.

En concreto, o 27 de novembro, un grupo de participantes de distintas rexións europeas formará parte de experiencias inmersivas no territorio e que conectan emprendemento, patrimonio e cultura galega. O 28 de novembro será a xornada do congreso no Monasterio de Santo Estevo de Ribas de Sil -no concello ourensán de Nogueira de Ramuín-, aberta a todo o público e distribuída en tres espazos, que son o de innovación, o de emprendemento e o de Galicia Rexión Emprendedora, que albergarán máis de 20 mesas e ponencias con expertos, institucións, empresas líderes e proxectos inspiradores.

Os tres espazos do congreso

O eixe institucional do evento é o de Galicia Rexión Emprendedora e nel, entre outras cuestións, terá lugar a conmemoración dos 20 anos do observatorio internacional GEM (Global Entrepreneurship Monitor) en Galicia coa presentación do Informe Especial GEM Galicia 2024-2025, un percorrido pola evolución e as chaves do emprendemento galego. Tamén acollerá unha mesa redonda sobre emprendemento xuvenil e un concurso da Rede de polos no que se premiará o mellor proxecto dos 15 polos de emprendemento. Ademais, haberá outra mesa redonda que consistirá no intercambio de experiencias entre as Rexións Emprendedoras Europeas 2025: Galicia, Krapina-Zagorje e Mazovia.

O apartado de emprendemento será un espazo de emprendedores, empresas, inversores e entidades comprometidas co desenvolvemento sostible do territorio. Abarcará mesas de debate centradas nos tres sectores estratéxicos de emprendemento ligado ao territorio e nelas analizaranse ferramentas existentes en Galicia para impulsar o emprendemento, a colaboración empresarial como motor de desenvolvemento e as oportunidades de financiamento para empresas emerxentes. Pola súa banda, a sala de innovación, centrada na inspiración e proxección internacional, albergará casos de éxito e historias de innovación de empresas. Ademais, debaterase sobre o papel das empresas tractoras arraigadas no territorio e que medran desde el.

Foro para reforzar o ecosistema emprendedor

O Goberno galego busca consolidar Ultreia Galicia como foro de referencia nacional e internacional en emprendemento sostible, así como reforzar o ecosistema emprendedor galego, xerar oportunidades de investimento e abrir novas vías de colaboración entre institucións, polos de emprendemento, entidades, empresas tractoras, inversores e empresas de recente creación. As persoas interesadas neste evento poderán obter máis detalles na páxina web desta iniciativa www.ultreiagalicia.com, na que tamén se poderán inscribir de xeito gratuíto.